¿Mi lek chil Dios ti oy jayvoʼ yajnil li viniketike?

Li kʼusi chal Vivliae

Li Diose laj yakʼ kʼuk sjaliluk ti oyuk jayvoʼ yajnil li vinike (Jenesis 4:19; 16:1-4; 29:18-29). Pe maʼuk jech oy ta yoʼonton ta slikebal li Diose, yuʼun jun noʼox yajnil laj yakʼbe li Adane.

Li Diose laj yakʼ ti junuk noʼox yajnil li vinike. Ta mas tsʼakale, laj yalbe Jesus ti akʼo xchaʼal li mantale (Juan 8:28). Kʼalal oy kʼusi jakʼbat ta sventa nupunel li Jesuse, xi laj yale: «La spas jun vinik xchiʼuk jun ants ta slikebal li buchʼu pasvane xchiʼuk ti xi laj yale: ‹Jech oxal, ta xikta komel stot xchiʼuk smeʼ li vinike, jaʼ xa chchiʼin˗o ta naklej li yajnile, vaʼun tspas ta jun sbekʼtalik li chaʼvoʼike›» (Mateo 19:4, 5).

Ta mas tsʼakale, li Diose laj yakʼbe snaʼ jun yajchankʼop Jesus ti akʼo xi stsʼibae: «Jaʼ lek ti oyuk yajnil li jujun vinike xchiʼuk jaʼ lek ti oyuk smalal li jujun antse» (1 Korintios 7:2). Li Vivlia xtoke chal ti skʼan «junuk noʼox yajnil» li vinik sventa xichʼ yabtel ta tsobobbaile (1 Timoteo 3:2, 12).