¿Kʼuxi xuʼ x˗iktaj kuʼun skʼelel li pornografiae?
Li kʼusi xuʼ xapase
Aʼibo smelolal kʼusi smakoj li skʼelel pornografiae. Li pornografiae (videoetik, lokʼoletik, musikaetik xchiʼuk kʼusitik tsʼibabil ti tstij oʼontonal sventa mulivajele) tsokesbe skʼoplal li chiʼinejbail ta vayele. Pe li Diose oy lek stu laj yakʼ li chiʼinejbail ta vayele. Mi lavaʼibe smelolal taje, jaʼ tskoltaot sventa xapʼaj li kʼusi chopole (Salmo 97:10).
Kak nopo li kʼusitik xuʼ xkʼot ta pasele. Chopol chkom skʼoplal li buchʼutik te chvinajik ta pornografiae xchiʼuk li buchʼutik tskʼelike. Jaʼ yuʼun, li Vivliae jamal chal «li buchʼu pʼije tsta ta ilel li vokolile, vaʼun tsnakʼ sba» (Proverbios 22:3).
Nopo lek kʼusi xuʼ xapas. Jech xapas kʼuchaʼal li tukʼil Job ti xi laj yale: «Li vuʼune calojbe coʼnton o ti muʼyuc ta jpichʼ˗oʼnta tsebetique» (Job 31:1, Xchʼul kʼop Jtotik Dios, ta skʼop Chenalhó). ¿Mi jech avalojbe avoʼonton ek? ¿O kʼusitik yan anopoj xuʼ xapas? Kʼelavil junantik li kʼusi xuʼ xapase:
Mu me xa-och ta Internet kʼalal atuk oyote.
Mako me ta anil junuk pajina o junuk anuncio ti bu chakʼ ta ilel li pornografiae.
Albo junuk avamigo ti lek pʼij sventa xuʼ skoltaote.
Jaʼ jech tstsʼotot kʼalal chakʼelilan li pornografiae, vaʼun vokol xa me chkom avuʼun
Chapbo Dios. Jun jtsʼibajom ta Salmo xi la stsʼiba kʼalal la skʼanbe vokol li Jeova Diose: «Joypʼino batel jsat sventa mu xil li kʼusi mu kʼusi xtun˗oe» (Salmo 119:37). Oy ta yoʼonton tskoltaot li Diose. Mi lakʼopone, jaʼ chakʼbot avipal (Filipenses 4:13).
Oyuk buchʼu xavalbe. Sventa xkom avuʼun skʼelel li pornografiae, skʼan xachapbe junuk avamigo ti lek pʼije (Proverbios 17:17).
Teuk ta ajol liʼe: kʼalal tstsʼik avuʼun skʼelel jujukoj li pornografiae, yuʼun xa chapas kanal un bi. Mi jech tstsal batel avuʼune, tojbo ta vokol Jeova ti jaʼ la skoltaote. Jech xtok, nopbo skʼoplal ti xmuyubaj avuʼun Jeova mi laj avikta skʼelel li pornografiae (Proverbios 27:11).