¿Mi xuʼ skoltautik Vivlia mi iputike?

Li kʼusi chal Vivliae

Tana. Li Diose oy ta yoʼonton li tukʼil yajtuneltak ti ipike. Xi ch-albatik li ta Vivliae: «Ch-ikat yuʼun Jeova kʼalal telel ta stem ta skoj chamele» (Salmo 41:3). Mi stsakojot tsatsal chamele, xuʼ me skoltaot li oxtos kʼusi chkalbetik batel skʼoplal liʼe:

1. Jkʼanbetik kipaltik Dios sventa xkuch kuʼuntik. Li ‹jun oʼontonal yuʼun Diose›, tskoltautik sventa mu stsalutik li vul oʼontone xchiʼuk chakʼ kipaltik sventa xkuch kuʼuntik (Filipenses 4:6, 7).

2. Skʼan xijmuyubaj noʼox. Xi chal li Vivliae: «Li oʼontonal ti xmuyubaj noʼoxe jaʼ lekil poxil, pe mi kʼux li koʼontontike, tslajes kipaltik» (Proverbios 17:22). Ti xijtseʼet noʼoxe, maʼuk chʼay-o batel li at-oʼontone, yuʼun tskoltautik sventa lekuk noʼox oyutik

3. Jtsatsubtas li spatobil koʼontontike. Li spatobil koʼontontike xuʼ skoltautik sventa xijmuyubaj akʼo me iputik (Romanos 12:12). Li Vivliae chal ti chkʼot skʼakʼalil ti muʼyuk xa buchʼu xi chale: «Toj ipun» (Isaias 33:24). Li Diose ta slajesbe skʼoplal skotol li chameletik ti muʼyuk lajem yuʼunik li pʼijil viniketike. Jech xtok, ta slajesbe skʼoplal skotol li vokoliletik ta skoj li malubele, yuʼun xi chal li Vivliae: «Akʼo lekubuk li sbekʼtale, masuk to lek kʼuchaʼal li sbekʼtal jun olole; akʼo xchaʼta yav ti kʼu toʼox yelan yipal ta skeremale» (Job 33:25).

Nota: Li stestigounkutik Jeovae jpatoj koʼontonkutik ta stojolal Dios, pe ta onoʼox jsaʼ jpoxilkutik kʼalal chi-ipajkutike (Markos 2:17). Akʼo mi jech, muʼyuk chkalbekutik xpoxil jtosuk chamel, yuʼun ta jujun tal ta jnopkutik kʼusi poxil ta jkʼan chkichʼkutik.