¿Kʼu yuʼun muʼyuk chbatik ta paskʼop li stestigotak Jeovae?

Li stestigounkutik Jeovae muʼyuk chibatkutik ta paskʼop ta skoj li:

1. Smantal Diose. Li Vivliae chal ti yajtuneltak Diose «tspasik ta slokobil balumil li s-espadaike» xchiʼuk «muʼyuk xa tstsak sbaik ta kʼop li mukʼtik lumetike» (Isaias 2:4).

2. Smantal Jesuse. Li jtakbol Pedroe xi albat yuʼun li Jesuse: «Tikʼo ochel ta sna li a-espadae, yuʼun skotol li buchʼu chakʼ espadae, ta espada chlaj ek» (Mateo 26:52). Li Jesuse laj yal ta jamal ti mu stakʼ stsak yabtejebik li yajchankʼoptake.

   Laj yal xtok ti «muʼyuk te skʼoplalik ta balumil». Jaʼ yuʼun, skʼan mu stikʼ sbaik ta politika (Juan 17:16). Muʼyuk chopol chilik ti oy soltaroetike o ti buchʼu tskʼan ch-och ta soltaroale.

3. Skʼanoj sba skotolik li yajchankʼoptak Kristoe. Li Jesuse xi laj yalbe li yajchankʼoptake: «Kʼano me abaik ta jujuntal» (Juan 13:34, 35). Melel yermano sbaik ta spʼejel Balumil xchiʼuk muʼyuk tstsak sbaik ta kʼop ta jujuntal (1 Juan 3:10-12).

4. Li baʼyel yajchankʼoptak Kristoe muʼyuk xbatik ta paskʼop. Oy jlik livroe ti xi chale: «Li baʼyel yajchankʼoptak Jesuse muʼyuk la stikʼ sbaik ta paskʼop xchiʼuk muʼyuk x-ochik ta soltaroil». Xi to laj yal xtoke: «Ti mu jechuk chanubtasvan li Jesuse, yuʼun laj yal ti jkʼan jbatik ta jujuntal xchiʼuk jkʼantik li kajkontratike» (Encyclopedia of Religion and War). Li livro Historia de la decadencia y caída del Imperio romano, li j-al-lo’il ta Gran Bretaña ti Edward Gibbon sbie, xi laj yal ta jamale: «Muʼyuk oy ta yoʼontonik tstikʼ sbaik ta soltaroil [...] mi muʼyuk yiktaojik li xchʼunel yoʼontonike».

Ta jkolta jbakutik sventa lekuk oy li krixchanoetike

Li stestigounkutik Jeovae muʼyuk ta jtikʼ jbakutik ta kʼop xchiʼuk muʼyuk chkakʼkutik ta vokol xkuxlejal krixchanoetik ti bu nakalunkutike. Yuʼun jtsakojkutik ta venta li buchʼutik oy yabtelike, jaʼ ta jchʼunkutik li mantaletik ta Vivlia liʼe:

• «Skʼan xchʼunbeik smantal li buchʼutik oy yabtelik ti mas mukʼ skʼoplalike» (Romanos 13:1).

• «Tojbeik Sesar li kʼusitik jaʼ yuʼun Sesare, yan li kʼusitik jaʼ yuʼun Diose tojbeik Dios» (Mateo 22:21).

Jaʼ yuʼun, ta jtojkutik li patanetike xchiʼuk ta sjunul koʼontonkutik ta jpaskutik li kʼusi chal ajvalil sventa lekuk oy li jlumalkutike.