¿Buchʼutik te tsʼibabil sbi li ta «livro sventa kuxlejale»?

Li kʼusi chal Vivliae

Li «livro sventa kuxlejale», li «sbalbalvunal kuxlejale» o li «livro sventa svulesobil ta [jolile]» jaʼ te tsakal sbiik junantik krixchanoetik ti ch˗akʼbat xkuxlejalik sbatel osil yuʼun li Diose (Revelación [Apokalipsis] 3:5; 20:12; Malakias 3:16). Jaʼ noʼox te chichʼ tsakbel sbiik li buchʼutik chchʼunbeik smantal Diose (Juan 3:16; 1 Juan 5:3).

¿Kʼusi livroal taje? Ti kʼuxi lik talel li kuxlejale, li Diose te˗o ta sjol li kʼusi spasoj talel li yajtuneltak ti tukʼ laj yakʼ sbaike, xkoʼolaj kʼuchaʼal tstsʼibabe ta jlik livro li sbiike (Apokalipsis 17:8). Li buchʼu baʼyel la stsʼibabe sbi li ta livro taje jaʼ li Abel ti tukʼ laj yakʼ sbae (Ebreos 11:4). Pe taje maʼuk skʼan xal ti ta jech noʼox tstsakan batel biil li Diose. Moʼoj, yuʼun li Jeovae «xojtikin li buchʼutik jaʼ yuʼune» xchiʼuk skʼanojan, jech oxal tstsakbe sbi (2 Timoteo 2:19; 1 Juan 4:8).

¿Mi xuʼ xtupʼ jbitik li ta «livro sventa kuxlejale»?

Xuʼ. Oy jun veltae muʼyuk la xchʼunbeik smantal Dios li j˗israeletike, jech oxal xi laj yale: «Ta jtupʼbe sbi ta jlivro li buchʼu la saʼ smul ta jtojolale» (Eksodo 32:33). Pe li buchʼu tukʼ chakʼ sba ta stojolal Diose muʼyuk me bu chtupʼbat sbi li ta «sbalbalvunal kuxlejale» (Apokalipsis 20:12).