¿Kʼu yuʼun muʼyuk tstunesik li kruse?

Jutuk mu skotol li krixchanoetike jaʼ senyail chilik ti jaʼ yajtsʼaklom Cristo li buchʼu oy skruse. Akʼo mi jaʼ yajtsʼaklomunkutik Cristo li stestigounkutik Jeovae muʼyuk ta jtuneskutik xchiʼuk muʼyuk chkichʼkutik ta mukʼ li kruse. ¿Kʼu van yuʼun?

Yuʼun li Vivliae muʼyuk chal mi ta krus cham li Jesuse, jaʼ noʼox chal ti ta jtel teʼ chame. Jech noxtok, xi ch-albatik mantal li yajtsʼaklomtak Cristoe: «Jʼechʼel comtsanic yichʼel ta mucʼ li cʼusitic cuybil ta diosetique». Jaʼ yuʼun kʼalal chichʼ tunesel li kruse xkoʼolaj kʼuchaʼal chkichʼtik ta mukʼ jecheʼ diosetik (1 Corintios 10:14; 1 Juan 5:​21).

Pe li Jesuse laj yal ti jaʼ chichʼik-o ojtikinel melel yajtsʼaklomtak Cristo liʼe: «Cʼanano me abaic. Jech chac cʼu chaʼal la jcʼanoxuc li vuʼune, jaʼuc me jech chacʼanan abaic li voʼoxuque. Me jech chapasique, jech ta snaʼic o scotol cristianoetic ti voʼoxuc cajchancʼopoxuque» (Juan 13:34, 35). Jaʼ yuʼun chaʼa, li kʼusi chichʼik-o ojtikinel li melel yajtsʼaklomtak Cristoe jaʼ ti skʼanoj sbaik ta melele, maʼuk li krus o yan lokʼoletike.