¿Kʼu yuʼun muʼyuk tstikʼ sbaik ta politika li stestigotak Jeovae?
Li stestigounkutik Jeovae muʼyuk ta jtikʼ jbakutik ta politika, yuʼun oy lek srasonal kuʼunkutik ta sventa jrelijionkutik ti lokʼem ta Vivliae. Maʼukunkutik jtsop krixchanoetik ti ta jpaskutik votar ta sventa junuk partido o ta sventa junuk ajvalile, muʼyuk bu ta jkʼankutik tʼujel sventa xi-ochkutik ta ajvalil xchiʼuk muʼyuk ta jkʼankutik ti akʼo xjel ti kʼu yelan ch-ajvalilajike. Jtaojbekutik lek srasonal ta Vivlia ti kʼu yuʼun mu jtikʼ jbakutik ta politikae. Jaʼik srasonaltak liʼe:
Skʼan jchanbekutik li stalelal Jesuse ti muʼyuk la skʼan sventa xtikʼat ta ajvalile (Juan 6:15). Li Jesuse laj yal ti «muʼyuquic xa ta sventa banamil» li yajtsʼaklomtake, jaʼ yuʼun muʼyuk ta jtikʼ jbakutik sventa skoltael junuk partido (Juan 17:14, 16; 18:36; Marcos 12:13-17).
Jaʼ tukʼ chkakʼ jbakutik ta stojolal li Ajvalilal yuʼun Diose, li ajvalilal ti xi laj yalbe skʼoplal Jesuse: «Persa baʼyuc ta xichʼ cholel ta sbejel banamil li Lequil Aʼyej ta jventae [o Ajvalilal]» (Mateo 24:14). Ta skoj ti jaʼ yajkʼopojelunkutik li Ajvalilal yuʼun Diose, muʼyuk bu ta jtikʼ jbakutik ta politika ta buyuk lumal, manchuk mi jaʼ jlumalkutik. Maʼuk noʼox, yuʼun oy ta jbakutik ta xcholbel skʼoplal ti chtal li ajvalilal taje (2 Corintios 5:20; Efesios 6:20).
Kʼalal muʼyuk ta jtikʼ jbakutik ta politikae jaʼ tskoltaunkutik ta yalbel skʼoplal lekil aʼyej ta sventa Ajvalilal yuʼun Dios li krixchanoetik ti jelel snopbenike. Chkakʼbekutik yipal ti xkakʼkutik ta ilel ta jloʼilkutik xchiʼuk ta jtalelalkutik ti jpatoj koʼontonkutik ti jaʼ chchʼay jvokoltik li Ajvalilal yuʼun Diose (Salmo 56:11).
Mi ta kap jbakutik ta politikae muʼyuk xa me bu jmoj oyunkutik xchiʼuk li kermanotakutik ta spʼejel Balumile (Colosenses 3:14; 1 Pedro 2:17). Yan li relijionetik ti tstikʼ sbaik ta politikae muʼyuk bu jmoj oy xchiʼuk yermanotakik (1 Corintios 1:10).
Kichʼojkutik ta mukʼ li ajvaliletike. Manchuk mi muʼyuk bu ta jtikʼ jbakutik ta politika, kichʼojkutik ta mukʼ li ajvaliletik ti sventainoj jlumalkutike. Jaʼ jech ta jchʼunkutik li kʼusi chal Vivlia liʼe: «Scotol cristiano tscʼan acʼo xchʼunbeic smantal li ajvaliletique» (Romanos 13:1). Ta jchʼunbekutik smantal li ajvaliletike, ta jtoj jpatankutik xchiʼuk ta jkolta jbakutik kʼalal chal ajvalil ti oy kʼusi skʼan spasel ta jlumalkutike. Muʼyuk bu ta jmakbekutik ta be yabtel li ajvalile, moʼoj, yuʼun ti kʼusie ta jchʼunkutik li kʼusi chal Vivlia liʼe: «Tscʼan chacʼopanbeic Dios [...] li ajvaliletique xchiʼuc scotol li bochʼotic oy yabtelique» (1 Timoteo 2:1, 2). Pe mas to jech ta jpaskutik orasion ta stojolalik kʼalal oy kʼusitik tsnopbeik skʼoplal ti xuʼ smak ta be li yichʼel ta mukʼ Diose.
Jech xtok, muʼyuk bu chopol chkilkutik ti kʼusi tsnopik ta jujuntal li krixchanoetik ta sventa li politikae. Jech kʼuchaʼal liʼe, muʼyuk bu chbat jsaʼkutik kʼop ti bu tspasik votare, mi jaʼuk ti chkalkutik ti mu stakʼ spasik votar li yantike.
¿Mi achʼ to slikel ti muʼyuk ta jtikʼ jbakutik ta politikae? Moʼoj, yuʼun jaʼ onoʼox jech muʼyuk bu la stikʼ sbaik ta politika li jtakboletik xchiʼuk li yan yajtsʼaklomtak Cristo ta baʼyel sigloe. Xi chal jlik livro ta sventa taje: «Manchuk mi snaʼojik onoʼox ti skʼan xichʼik ta mukʼ j-abteletik li baʼyel yajtsʼaklomtak Cristoe, snaʼojik lek xtok ti mu stakʼ stikʼ sbaik ta politikae» (Beyond Good Intentions—A Biblical View of Politics [Maʼuk noʼox li kʼusi lek oy ta yoʼontonike. Li kʼusi chal Vivlia ta sventa li politikae]). Jech xtok, xi laj yal jun vinik ti chchanbe skʼoplal Dios (teólogo) ti kuxi ta siglo 2 xchiʼuk 3, ti Orígenes sbie: «Mu skʼan xichʼ yabtelik yajtsʼaklomtak Cristo ti tsakal skʼoplal ta politikae».
¿Mi chil-o svokol jlumalkutik ti muʼyuk ta jtikʼ jbakutik ta politikae? Moʼoj. Muʼyuk srasonal ti chiʼ kuʼunkutik li ajvaliletike, yuʼun mu jnaʼ jsaʼkutik kʼop. Jkʼeltik avil kʼusi laj yal jlik vun ti lokʼ ta 2001 yuʼun li Academia Nacional de Ciencias ta Ucrania. Xi laj yal ta sventa ti muʼyuk ta jtikʼ jbakutik ta politikae: «Xuʼ van mu lekuk chil skotol krixchanoetik ti muʼyuk tstikʼ sbaik ta politika li stestigotak Jeovae. Jaʼ yuʼun tikʼbat smulik yuʼun li tsatsal ajvaliletik, jech kʼuchaʼal li ajvalil nazie xchiʼuk komunistae». Manchuk mi toj tsots laj yichʼik ilbajinel stestigotak Jeova yuʼun li tsatsal ajvalil ta Unión Sovieticae, xi to chal li vun ta stojolalike: «Jaʼik lekil jnaklejetik ti tstsakik ta mukʼ li mantale», ti «lek tukʼ sjol yoʼonton xchiʼuk ti xmuyubaj noʼox ch-abtejik ta osiltik xchiʼuk ta favrika» xchiʼuk ti «muʼyuk bu xakʼik ta vokol li ajvalil komunistae». Kʼalal tstsuts xa sloʼil li vun taje, chal ti «muʼyuk la bu chakʼbe ta vokol xkuxlejal yan jnaklejetik xchiʼuk ti muʼyuk tsaʼik kʼop» li stestigotak Jeova ta sventa li kʼusi xchʼunojik xchiʼuk li kʼusi tspasike.