¿Kʼuxi ti tspoj epal krixchanoetik kʼalal laj yakʼ xkuxlejal li Jesuse?
Li kʼusi chal Vivliae
Li Jeovae la stunesbe xkuxlejal Jesus sventa xuʼ xichʼ pojel ta mulil xchiʼuk ta lajelal li krixchanoetike. Li Vivliae chal ti xchʼichʼel Jesuse jaʼ toj-o sventa xkichʼtik-o pojele (Efesios 1:7; 1 Pedro 1:18, 19). Jech oxal, li Jesuse laj yal ti tal sventa chakʼ xkuxlejal kʼuchaʼal pojelal «sventa tspoj epal krixchanoetik» (Mateo 20:28).
¿Kʼu chaʼal skʼan pojel li epal krixchanoetike?
Li baʼyel vinik la spas Diose jaʼ li Adane, tukʼil krixchano toʼox, mu snaʼ spas smul. Jech xtok, xuʼ ox xkuxi sbatel osil, pe mu jechuk kʼot ta pasel ta skoj ti muʼyuk xa la xchʼunbe smantal Diose (Jenesis 3:17-19). Li xnichʼnabtak Adane la xkuchik li mulile (Romanos 5:12). Jech oxal, li Vivliae chal ti Adane la xchon sba stuk xchiʼuk la xchon xnichʼnabtak li ta mulil xchiʼuk ta lajelale (Romanos 7:14). Mi junuk krixchano xuʼ spojutik, yuʼun jkotoltik jpasmulilutik (Salmo 49:7, 8).
Li Diose kʼuxubaj ta yoʼonton li snitilulaltak Adan ti chʼabal spatobil yoʼontonike (Juan 3:16). Pe li Diose tukʼ snaʼ xchapanvan, jech oxal mu stakʼ ti jech noʼox ta xchʼay li mulile (Salmo 89:14; Romanos 3:23-26). Ta skoj ti skʼanoj li krixchanoetike, oy kʼusi laj yakʼ sventa xakʼbe ta perton li smulike xchiʼuk ti stupbe-o skʼoplal li mulile (Romanos 5:6-8). Taje jaʼ skʼoplal li pojelale.
¿Kʼusi snitojbe sba skʼoplal li pojelale?
Li ta Vivlia kʼalal «pojelal» xie, oxtos kʼusi snitojbe sba skʼoplal:
Jaʼ ti oy kʼusi chichʼ tojele (Numeros 3:46, 47).
Kʼalal mi laj xa ox yichʼ tojele, oy buchʼu chichʼ koltael batel o oy kʼusi tsut talel (Eksodo 21:30).
Li buchʼu chichʼ koltael batel o oy kʼusi chichʼ sutesel tale, koʼol sbalil xchiʼuk ti kʼu yepal chichʼ tojel batele.a
Li oxtos ti laj xa kalbetik skʼoplale, jkʼeltik kʼuxi snitojbe sba skʼoplal xchiʼuk li pojelal laj yakʼ Jesukristoe.
Oy kʼusi chichʼ tojel. Li Vivliae chal ti yajtsʼaklomtak Kristoe laj yichʼik manel (1 Korintios 6:20; 7:23). ¿Kʼuxi toj-o? Jaʼ li ta xchʼichʼel Jesuse. Li ta xchʼichʼel Jesuse la sman «sventa xkʼotik ta yuʼun Dios li krixchanoetik ti jeltos snitilulalik, skʼopik, steklumalik xchiʼuk slumalike» (Apokalipsis 5:8, 9).
Sventa jta jkoleltik. Ti laj yakʼ xkuxlejal li Jesuse tskoltautik sventa xijkol lokʼel li ta mulile (1 Korintios 1:30; Kolosenses 1:14; Ebreos 9:15).
Koʼol sbalil xchiʼuk ti kʼu yepal chichʼ tojel batele. Li xkuxlejal laj yakʼ ta matanal li Jesuse koʼol tajek sbalil xchiʼuk li stukʼil kuxlejal Adan ti la xchʼaye (1 Korintios 15:21, 22, 45, 46). Xi chal li Vivliae: «Jech kʼuchaʼal ep kʼotik ta jpasmulil ta skoj noʼox jun vinik [Adan] ti muʼyuk bu la xchʼun mantale, jaʼ jech ep tukʼ chkʼotik ek ta stojolal noʼox jun vinik [Jesukristo] ti la xchʼun mantale» (Romanos 5:19). Liʼe jamal chalbutik ti xuʼ xchʼay jmultik li jun noʼox vinike. Ta melel, ti laj yakʼ xkuxlejal li Jesuse jaʼ sventa xtoj-o skotol li krixchanoetik ti oy kʼusi tspasik sventa stabeik sbalil taje (1 Timoteo 2:5, 6).
a Li ta ebreo xchiʼuk ta griego kʼalal «pojelal» xie, chakʼ ta aʼiel ti oy kʼusi chichʼ tojel sventa xtojolin-o jtosuk kʼusie. Li ta ebreoe tstunesik toʼox chaʼpʼel kʼop ta sventa li pojelale. Li june jaʼ kafár ti jaʼ chakʼ ta aʼiel ti oy kʼusi chichʼ pixel o makele. Li ta Vivliae li jpʼel kʼop taje chichʼ tunesel sventa xakʼ ta aʼiel ti chichʼ akʼel ta perton o chichʼ pixel xkaltik li jmultike (Salmo 65:3). Li yan jpʼel kʼop ta ebreo xtoke jaʼ kófer ti jaʼ skʼan xal pojelal eke. Li jpʼel kʼop taje chichʼ tunesel kʼalal oy kʼusi chichʼ tojel yoʼ skoltaik talel junuk krixchano o sventa mu smilike (Eksodo 21:30). Li ta griegoe li jpʼel kʼop ti ep ta velta tstunesik sventa xichʼ albel skʼoplal li pojelale jaʼ lýtron ti jaʼ skʼan xal ti oy kʼusi chichʼ tojel sventa oy buchʼu skoltaik talele (Mateo 20:28). Li jtsʼibajometik ta griegoe tstunesik li jpʼel kʼop taje sventa jaʼ chalbeik skʼoplal li tojolil chichʼ akʼel sventa skoltaik talel junuk krixchano ti la stsakik kʼalal oyik toʼox ta paskʼop li soltaroetike o sventa xichʼ koltael lokʼel li jun mosoile.