¿Kʼu yuʼun oy kʼusitik sjelojbeik smelolal li kʼusi xchʼunojik li stestigotak Jeovae?

Skotol li kʼusitik jchʼunojkutike te lokʼem talel ta Vivlia. Jaʼ yuʼun, ta jelkutik kʼalal oy kʼusi mas to jamal ta xkaʼibekutik smelolale.a

Li kʼusi chal Proverbios 4:18 tskoltautik ta yaʼibel smelolal kʼuchaʼal oy kʼusitik ta jelkutike: «Li sbe buchʼutik tukʼike xkoʼolaj kʼuchaʼal xojobal sakil osil ta sob ti yantik to tsakub batel jaʼ to mi sakjaman xa ox lek li kʼakʼale». Xkoʼolaj jech kʼuchaʼal li kʼakʼal ti ta kʼunkʼun chkiltik batel yuʼun li osil kʼalal tsakube. Jech tspas li Dios eke, kʼalal jaʼo yorail chile kʼunkʼun chakʼbe ta ilel yajtuneltak li kʼusi melele (1 Pedro 1:10-12). Li Vivliae laj onoʼox yalbe skʼoplal ti mas to jech ta spas Dios li ta slajebal kʼakʼale (Daniel 12:4).

Muʼyuk ta jvul koʼontontik xchiʼuk mu labaluk sba chkiltik kʼalal oy kʼusi ta xjele. Yuʼun li yajtuneltak Dios ta voʼne eke la sjelik li kʼusitik xchʼunojik toʼoxe, yuʼun laj yakʼik venta ti oy kʼusitik muʼyuk jech kʼot ta pasel li k’usi xchʼunojike.

• Kʼalal 40 xa ox jabil yichʼoj li Moisese, lokʼ ta yoʼonton tskolta li steklumal Diose, pe li Jeovae laj yakʼ to jelavuk 40 jabil xtok (Echos 7:23-25, 30, 35).

• Li jtakboletike muʼyuk toʼox laj yaʼibeik smelolal li albil kʼop ti chal ti chichʼ milel li Mesiase xchiʼuk ti chichʼ chaʼkuxesele (Isaias 53:8-12; Mateo 16:21-23).

• Junantik yajtsʼaklom Kristo ta voʼnee, la snopik ti jaʼ xa ox «skʼakʼalil Jeovae», pe mu jechuk kʼot ta pasel (2 Tesalonisenses 2:1, 2).

Li Diose kʼunkʼun la stojobtas li yajtuneltak ta voʼnee. Li avie, ta jkʼanbekutik ti jech akʼo spas ta jtojolalkutik eke (Santiago 1:5).