¿Buchʼu jaʼ li bankilal anjel Miguele?

Li kʼusi chal Vivliae

Kʼalal chichʼ alel Miguel o «san Miguel» kʼuchaʼal chal junantik relijione, jaʼ jech sbi chichʼ albel ta Vivlia li Jesus kʼalal skʼan toʼox xtal ta balumile xchiʼuk kʼalal sutem xa ox echʼel ta vinajele.a Li Vivliae chal ti Miguele la stsak sbaik ta k’op xchiʼuk Satanas kʼalal chamem xa ox li Moisese xchiʼuk ti la skolta jun anjel sventa xakʼbe Daniel jun aʼyej yuʼun Diose (Daniel 10:13, 21; Judas 9). Li Miguele tspakbe skʼoplal ti kʼu yelan tspas mantal li Jeovae xchiʼuk tstsak ta kʼop li yajkontratak Diose. Jaʼ yuʼun, sta-o ti Miguel chichʼ albele ti jaʼ skʼan xal: «¿Buchʼu xkoʼolaj jech kʼuchaʼal li Diose?» (Daniel 12:1; Apokalipsis 12:7).

Jkʼeltik echʼel k’u yuʼun xuʼ jchʼuntik ti jaʼ bankilal anjel Miguel li Jesuse.

• Li Miguele jaʼ «bankilal anjel» (Judas 9). Kʼalal bankilal anjel xie, jaʼ smelolal bankilal yuʼun anjeletik xchiʼuk ta chib noʼox versikulo xvinaj li ta Vivliae. Kʼalal bankilal anjel xie, jun noʼox buchʼu chichʼ albel skʼoplal, jaʼ xkaltik, jun noʼox anjel ti jech chichʼ albel skʼoplale. Kʼalal chaʼkuxiem xa ox li Jesuse, jun li ta versikuloe xi chalbe skʼoplale: «Chyal talel ta vinajel li Kajvaltike, tsots ch-avan sventa xtakvan ta ikʼel kʼuchaʼal yechʼomal ye bankilal anjel» (1 Tesalonisenses 4:16). Jech kʼuchaʼal chal li teksto taje, li Jesuse jech yechʼomal ye kʼuchaʼal bankilal anjel. Jaʼ yuʼun, xuʼ jchʼuntik ti jaʼ Jesus li Miguel li bankilal anjele.

• Li Miguele jaʼ bankilal yuʼunik li epal anjeletike. Li Miguel xchiʼuk yaj-anjeltake ‹la spasik kʼop xchiʼuk li dragone›, jaʼ xkaltik, li Diabloe (Apokalipsis 12:7). Tsots kʼusi sbainoj li ta vinajele. Li Vivliae xi chalbe skʼoplale: «Bankilal ti tsots yabtel yichʼoje» xchiʼuk «bankilal» (Daniel 10:13, 21; 12:1). Ti jech chichʼ albele, chakʼ ta aʼiel ti jaʼ bankilal yuʼun soltaroetik li ta vinajele. Taje jaʼ jech chalbe skʼoplal Miguel li David Aune ti xchanojbe lek skʼoplal li Achʼ Testamentoe.

  Kʼalal chal Vivlia li buchʼu tspas ta mantal li anjeletik ta vinajele, tstunes to jun biil. Yuʼun chal ti «kʼalal mi vinaj ta vinajel ta jun kʼokʼ li Kajvaltik» Jesuse te xchiʼuk li yaj-anjeltak ti oy sjuʼelike (2 Tesalonisenses 1:​7, 8; Mateo 16:27). Jech xtok, xi ch-albat skʼoplal Jesus ta 1 Pedro 3:21, 22: «Yuʼun bat ta vinajel, jech xtok, laj yichʼ akʼbel ta yok skʼob li anjeletike, li buchʼutik oy yabtele xchiʼuk li buchʼutik oy sjuʼele». Jaʼ yuʼun, muʼyuk smelolal jechuk ti chaʼvoʼ to buchʼu laj yichʼ vaʼanel ta bankilal yuʼun li anjeletike. Jech oxal, jun buchʼu skʼoplal kʼalal Jesus xchiʼuk Miguel xie.

• Li Miguele jaʼo «chtots tal» kʼalal jaʼo «yorail vokolil» ti muʼyuk bu jech ilbil-oe (Daniel 12:1). Kʼalal tstots tal xi li ta slivroal Daniele, jaʼ mas chalbe skʼoplal kʼalal tstsak yabtel junuk ajvalil ti stuk noʼox jech k’usi tspase (Daniel 11:2-4, 21). Li Jesus ti biiltasbil kʼuchaʼal «Skʼop Diose» ta stsak yabtel k’ucha’al «Ajvalil yuʼunik li ajvaliletike» sventa slajes li yajkontratak Diose xchiʼuk ti xchabi li steklumale (Apokalipsis 19:11-16). Taje jaʼo chkʼot ta pasel li ta yorail «mukʼta tsatsal vokolil ti muʼyuk bu jech kʼotem-o ta pasel kʼalal lik tal li balumil kʼalal to avie» (Mateo 24:21, 42).