¿Mi ta buyuk noʼox oy li Diose?
Li kʼusi chal Vivliae
Li Diose xil skotol xchiʼuk tstunes sjuʼel ti buyuk noʼox ta skʼane (Proverbios 15:3; Ebreos 4:13). Li Vivliae muʼyuk chal ti buyuk noʼox xjoyet li Diose, yuʼun chal ti oy jun yavil ti mu xvinaj ta kʼelele.
Kʼu yelan li Diose: Jaʼ jun kuxlejal ti mu xvinaj ta kʼelele, jaʼ yuʼun mi junuk krixchano yiloj li Diose (Juan 4:24; 1:18). Li Vivliae chal ti kʼalal la xchiʼinan ta loʼil yajtuneltak li Diose, jun noʼox yavil ti bu kʼopoje muʼyuk chal ti xtal xbat noʼoxe (Isaias 6:1, 2; Apokalipsis 4:2, 3, 8.
Bu nakal li Diose: Jaʼ te nakal ti bu mu xvinaj ta kʼelele, yuʼun li Vivliae chal ti stuk noʼox ti bu nakal te ta vinajele (1 Reyes 8:30). Jech xtok, chalbe skʼoplal ti oy jun velta bat svaʼan sbaik ta yeloval Jeovaa li anjeltake, taje chakʼ kaʼitik ti jun noʼox bu nakal li Diose (Job 1:6).
¿Mi xuʼ van xchabiun Dios ti jun noʼox yavil bu oye?
Tana. Akʼo mi mu xkiltik bu nakal li Diose, pe oy ta yoʼonton li krixchanoetike. Jech xtok, chakʼ venta kʼalal chkakʼtik persa xchʼunbel smantale xchiʼuk tskoltautik (1 Reyes 8:39; 2 Kronikas 16:9). ¿Kʼuxi chakʼ ta ilel ti oyutik ta yoʼonton xchiʼuk chchabiutike?
Kʼalal ta jkʼopontike: Li Jeovae chaʼi j-orasiontik kʼalal xyaket ta jkʼopontike (2 Kronikas 18:31).
Kʼalal ta jvul koʼontontike: «Nopol oy Jeova ta stojolal li buchʼutik muʼyuk xa te tsakal chaʼi li yoʼontonike; tskolta li buchʼutik chat yoʼontonike» (Salmo 34:18).
Kʼalal ta jkʼantik tojobtasele: Li Jeovae ta tspʼijubtasutik ta Skʼop xchiʼuk chchanubtasutik ti bu beal skʼan jtamtik batele (Salmo 32:8).
Li kʼusitik xchʼunojik ti ta buyuk noʼox la oy li Diose
Li kʼusi xchʼunoj yantike: Te oy Dios ta skotol li spasbentake
Li kʼusi melele: Li Diose muʼyuk liʼ nakal ta balumile xchiʼuk mu xkiltik bu stukʼil nakal li ta vinajele (1 Reyes 8:27). Li Vivliae chal ti kʼanaletik xchiʼuk li yan spasbentake chalbeik smukʼulal li Diose (Salmo 19:1). Pe maʼuk skʼan xal ti te xchiʼuk ta jujuntal li spasbentake. Jech kʼuchaʼal li buchʼu tsbon jun kuadroe, maʼuk ti te xa nochʼol-o xchiʼuk li kʼusitik tsbone, pe xuʼ me xkilbetik kʼu yelan stalelal li buchʼu tsbone. Jaʼ noʼox jech ek li Diose xuʼ xkilbetik li stalelaltake, jech kʼuchaʼal juʼelal, pʼijilal xchiʼuk kʼanelal (Romanos 1:20).
Li kʼusi xchʼunoj yantike: Sventa snaʼ skotol xchiʼuk ti skotol xuʼ yuʼun li Diose, persa skʼan ta buyuk noʼox oy.
Li kʼusi melele: Ta skoj li xchʼul espiritue jaʼ sventa snaʼ kʼusi chkʼot ta pasel ta stojolal li spasbentake xchiʼuk xuʼ kʼusiuk spas mu ventauk bu, kʼusiuk ora akʼo mi muʼyuk te oy (Salmo 139:7).
Li kʼusi xchʼunoj yantike: Li ta Salmo 139:8 chakʼ ta ilel ti ta buyuk noʼox oy li Diose xi chale: «Ati ximuy batel ta vinajele, te oyot, ati xkichʼ batel jtem li ta Mukinale, te oyot xtok».
Li kʼusi melele: Li teksto taje maʼuk skʼan xal ti ta buyuk noʼox oy li Diose. Ti jech laj yale jaʼ noʼox jun nichimal kʼop (poética), jaʼ xkaltik, ti xuʼ skoltautik ti mu ventauk bu oyutike.
a Li Vivliae chal ti jaʼ Jeova li sbi Diose.