¿Kʼusi skʼan xal li yaveetik akʼbat Pedroe?
Li kʼusi chal Vivliae
Li yaveetik akʼbat Pedroe o ti ojtikinbil kʼuchaʼal syavealtak sventa «chijʼoch yoʼ bu chventainvan li Diose», jaʼ skʼan xal ti jaʼ akʼbat yabtel sventa sjambe stiʼ li Ajvalilal yuʼun Dios yoʼ x-ochik batel li krixchanoetike (Mateo 16:19; Echos 14:22 Xchʼul Cʼop Jtotic Dios, ta skʼop Chenalhó).a Li Jesuse xi laj yalbe li Pedroe: «Voʼon chkakʼbot li syaveal Ajvalilal ta vinajele». Taje jaʼ skʼan xal ti akʼbat snaʼ Pedro buchʼutik ti oy xchʼunel yoʼontonike xuʼ xichʼik li chʼul espiritu sventa x-ochik li ta vinajele.
¿Kʼuxi lik stunes yave li Pedroe?
Li Pedroe akʼbat sbain yuʼun Dios ti akʼo sjambe stiʼ li Ajvalilal yuʼun Dios sventa x-och oxchop krixchanoetik:
Jaʼ li judaetik xchiʼuk li buchʼutik pasik ta judaetike. Kʼalal mu to jaluk slajel li Kristoe, li Pedroe la stijbe yoʼonton judaetik xchiʼuk li buchʼutik pasik ta judaetik ti akʼo xchʼunik ti jaʼ tʼujat yuʼun Dios sventa x-och ta Ajvalil li Jesuse. Jech xtok, laj yalbe kʼusi skʼan spasik sventa sta skolelik. Taje jaʼ jech jambatik sbelel sventa x-ochik li ta Ajvalil yuʼun Diose. Jaʼ yuʼun, ta smilal xa noʼox la xchʼamik li skʼop Diose (Echos 2:38-41).
Li jsamariaetike. Ta mas tsʼakale, takat batel ta Samaria li Pedroe, vaʼun te la stunes li yan yave sventa Ajvalilale.b Jaʼo la stunes kʼalal la spasik orasion xchiʼuk jtakbol Juan «sventa chichʼik chʼul espiritu li jsamariaetike» (Echos 8:14-17). Taje jaʼ jech jambatik sbelel sventa x-ochik li ta Ajvalil yuʼun Diose.
Li jyanlumetike. Kʼalal oxib jabil xchiʼuk oʼlol xa ox slajel li Jesuse, li Pedroe akʼbat snaʼ yuʼun Dios ti xuʼ x-ochik ta Ajvalilal yuʼun Dios li jyanlum krixchanoetik ti maʼuk judaetike. Kʼalal la xcholbe mantal jyanlumetik li Pedroe, jaʼ jech la stunes li yan yavee. Jaʼ jech jambatik tiʼ na sventa xichʼik li chʼul espiritue, ti xkʼotik ta yajtsʼaklom Kristoe xchiʼuk ti xuʼ x-ochik li ta Ajvalilal yuʼun Diose (Echos 10:30-35, 44, 45).
¿Kʼusi skʼan xal ti ch-ochik li ta Ajvalilal ta vinajele?
Li buchʼutik chbatik ta vinajele koʼol ch-ajvalilajik xchiʼuk li Jesuse. Li Vivliae yaloj xa onoʼox ti chchotiik li ta chotlebal sventa ajvalile xchiʼuk ch-ajvalilajik ta spʼejel balumil (Lukas 22:29, 30; Apokalipsis 5:9, 10).
Li kʼusi mu jechuk tsnopik ta sventa li yaveetik akʼbat Pedroe
Xi xchʼunojik jlome: Jaʼ chal Pedro buchʼu chbat ta vinajel.
Li kʼusi melele: Li Vivliae chal ti jaʼ Jesukristo li «buchʼu chchapan li buchʼutik kuxul xchiʼuk li buchʼutik» chamemike, maʼuk li Pedroe (2 Timoteo 4:1, 8; Juan 5:22). Xi laj yal stuk Pedro ta stojolal li Jesuse: «Vaʼanbil yuʼun Dios sventa xkʼot ta jchapanvanej ta stojolal li buchʼutik kuxulike xchiʼuk li buchʼutik chamemike (Echos 10:34, 42).
Xi xchʼunojik jlome: Li vinajele la smala Pedro kʼusi ora tstunes li yaveetik sventa Ajvalilale.
Li kʼusi melele: Kʼalal chiʼinat ta loʼil yuʼun Jesus li Pedro ta sventa li yaveetik sventa Ajvalilale, xi to albate: «Kʼusiuk noʼox ti chachuk liʼ ta sba balumile chukbil xa li ta vinajele xchiʼuk kʼusiuk noʼox ti chatitun liʼ ta sba balumile titunbil xa li ta vinajele» (Mateo 16:19). Li jlom krixchanoetik kʼalal tskʼelik ta Svivliaike, chaʼibeik smelolal ti kʼusi chkʼot ta nopel yuʼun Pedro liʼ ta Balumile, jaʼ xa jech tspasik li ta vinajele. Pe ti kʼu yelan laj yichʼ tsʼibael li ta voʼneal griegoe chakʼ ta ilel ti baʼyel chichʼ nopel ta vinajele, ti jaʼ tsʼakal to chkʼot ta snopben li Pedroe.
Junantik versikuloetik ta Vivliae chakʼ ta ilel ti jaʼ la xchʼun Pedro li kʼusi albat yuʼun Dios ta sventa kʼuxi tstunes li yaveetik sventa Ajvalilale. Jun skʼelobile, jaʼo kʼalal la stunes li yoxibal yavee, jaʼ la xchʼun li kʼusi albat yuʼun Diose (Echos 10:19, 20).
a Oy bakʼintik li ta Vivliae li jpʼel kʼop «yave» xie, jaʼ skʼan xal ti oy kʼusi tsbain jun krixchanoe o ti ch-akʼbat yabtele (Isaias 22:20-22; Apokalipsis 3:7, 8).
b Li srelijion jsamariaetike jelel xchiʼuk li srelijion judaetike, pe xchʼamojik xa onoʼox junantik chanubtaseletik xchiʼuk smantaltak Moises.