¿Kʼusi chal Vivlia ta sventa ti ta jkʼan jba jtuktike?

Li kʼusi chal Vivliae

Li Vivliae chal ti leke, ti skʼan jech jpastike xchiʼuk ti ta spʼisoluk noʼox jkʼan jba jtuktike. Taje te tsakal skʼoplal ti jchabi jbatike, ti xkichʼ jbatik ta mukʼe xchiʼuk ti oyuk jbalil xkaʼi jbatike (Mateo 10:31). Li Vivliae chal ti muʼyuk lek chil Dios li jtoybailetike xchiʼuk chal ti oyuk noʼox spʼisol ti kʼu yelan ta jkʼan jba jtuktike.

¿Buchʼu ti mas tsots skʼoplal skʼan jkʼantike?

1. Skʼan ti jaʼuk mas jkʼantik li Diose. Li Vivliae chal ti jaʼ mas tsots skʼoplal li mantal liʼe: «Skʼan xakʼan ta sjunul avoʼonton li Jeova Dios avuʼune» (Markos 12:28-30; Deuteronomio 6:5).

2. Li xchibal mantal ti mas tsots skʼoplale jaʼ liʼe: «Skʼan me xakʼan achiʼil jech kʼuchaʼal akʼanoj aba atuke» (Markos 12:31; Levitiko 19:18).

3. Akʼo mi muʼyuk jamal chal Vivlia ta sventa ti akʼo jkʼan jba jtuktike, li mantal ti «skʼan me xakʼan achiʼil jech kʼuchaʼal akʼanoj aba [atuk]» ti xie, chakʼ ta ilel ti stalel onoʼox ti skʼan akʼo jkʼan jbatike, pe ti ta spʼisoluk noʼoxe xchiʼuk ti xkichʼ jbatik ta kʼuxe.

¿Buchʼu ti mas tsots skʼoplal la skʼan li Jesuse?

Li Jesuse laj yakʼ ta ilel kʼu yelan ta kʼanel li Diose, kʼu yelan ta kʼanel li jchiʼiltaktike xchiʼuk ti kʼu yelan ta jkʼan jba jtuktike. Maʼuk noʼox, yuʼun laj yalbe yajtsʼaklomtak ti jechuk spasik eke (Juan 13:34, 35).

1. Li Jesuse jaʼ mas tsots skʼoplal laj yaʼi skʼanel li Diose, jaʼ yuʼun ta sjunul yoʼonton la spas skotol li kʼusi albate. Xi laj yal stuke: «Sventa snaʼ krixchanoetik ti jkʼanoj li Totile, jaʼ jech yakal ta jpas ti kʼu yelan yalojbun mantal li Totile» (Juan 14:31).

2. Li Jesuse skʼanoj tajek li krixchanoetike, yuʼun la skolta kʼalal oy kʼusitik chtun yuʼun laj yile. Maʼuk noʼox, yuʼun laj yakʼ xkuxlejal ta stojolalik (Mateo 20:28).

3. Li Jesuse laj yakʼ ta ilel ti skʼanoj sbae, yuʼun la xchʼakbe yorail sventa xkux, xveʼ xchiʼuk ti xchʼay yoʼonton xchiʼuk li yajchankʼoptake xchiʼuk li krixchanoetik ti xuʼ xkʼotik ta yajtsʼaklomtake (Markos 6:31, 32; Lukas 5:29; Juan 2:1, 2; 12:2).

¿Mi muʼyuk mas xijmuyubaj kʼalal jaʼ mas jkʼanojtik li yantike?

Moʼoj, mu jechuk. Yuʼun jaʼ ta slokʼol la spasutik li Diose, yuʼun li stalelal mas tsots skʼoplale jaʼ li kʼanelal ti mu kʼusi xkoʼolaj-oe (Jenesis 1:27; 1 Juan 4:8). Jaʼ xkaltik, jaʼ jech pasbilutik sventa jkʼantik li yantike. Akʼo mi muʼyuk chopol ti jkʼan jba jtuktike, li kʼusi mas tsots skʼoplale jaʼ ti jkʼantik li Diose xchiʼuk ti oyuk kʼusi lek jpastik ta stojolal li yantike. Vaʼun mas me xijmuyubaj, yuʼun xi chal li Vivliae: «Jaʼ mas xmuyubaj li buchʼu chakʼe, jaʼ mu sta li buchʼu chichʼe» (Echos 20:35).

Avie oy epal krixchanoetik chalik ti jaʼ la mas xmuyubajik mi jaʼ mas skʼanoj sba stukike. Vaʼun jaʼ mas tsots skʼoplal chaʼi sbaik, maʼuk li xchiʼiltakike. Pe ti jamal xkaltike, jaʼ mas chlekub-o jkuxlejaltik, muʼyuk mas chij-ipaj xchiʼuk mas xijmuyubaj mi la jchʼuntik li pʼijil tojobtasel ta Vivlia liʼe: «Ta jujuntal akʼo saʼik li kʼusi lek chaʼi yan krixchanoe, maʼuk akʼo saʼik li kʼusi lek chaʼi stukike» (1 Korintios 10:24).