¿Kʼusi chal Vivlia ta sventa li xchikʼel animaetike?
Li kʼusi chal Vivliae
Li Vivliae muʼyuk bu jamal chalbe skʼoplal ta sventa li xchikʼel animaetike. Muʼyuk bu chal mi skʼan xichʼ mukel o xichʼ chikʼel li animaetike.
Li ta Vivliae chalbe skʼoplal jlom yajtuneltak Dios ti la smuk li yutsʼ yalalike. Jun skʼelobile jaʼ li Abraane ti laj yakʼ yipal sventa skʼel lek bu xuʼ smuk li yajnile, ti Sara sbie (Génesis 23:2-20; 49:29-32).
Li ta Vivliae chal ti oy jlom yajtuneltak Diose la xchikʼik li animaetike. Kʼalal cham ta jun paskʼop li ajvalil Saul xchiʼuk li oxvoʼ xnichʼnabtake, li sbekʼtalike te kom li ta yosil yajkontraike xchiʼuk muʼyuk bu lek laj yichʼik mukel. Kʼalal laj yaʼiik jlom soltaroetik ti jaʼik j-israeletike ay skʼanik talel li sbekʼtal animaetike, vaʼun la xchikʼik, ti kʼu yepal muʼyuk xkʼakʼe la smukik (1 Samuel 31:8-13). Li Vivliae chakʼ ta ilel ti lek li kʼusi la spasik li tukʼil viniketik taje (2 Samuel 2:4-6).
Li kʼusi mu jechuk tsnopik ta sventa li xchikʼel animae
Xi xchʼunojik jlome: Kʼalal chichʼ chikʼel li animaetike muʼyuk chichʼ ichʼbel ta mukʼ li sbekʼtalike.
Li kʼusi melele: Li Vivliae chal ti kʼalal chijchamutike chijsut ta lum yan velta, yuʼun jaʼ li kʼusi onoʼox chkʼot ta pasel kʼalal mi kʼaʼ li jbekʼtaltike (Génesis 3:19). Li xchikʼel animaetike ta xakʼ ti akʼo spas ta anil ta tan o ta lum yan velta li jbekʼtaltike.
Xi xchʼunojik jlome: Li ta skʼakʼalil Vivliae jaʼ noʼox la chichʼik chikʼbel sbekʼtalik li buchʼutik muʼyuk lek ilatik yuʼun Diose.
Li kʼusi melele: Oy onoʼox jlom ti laj yichʼ chikʼbel sbekʼtal animaetik ti muʼyuk la xchʼunik mantale, jech kʼuchaʼal li Akan xchiʼuk yutsʼ yalale (Josué 7:25). Akʼo mi jaʼ jech laj yichʼ pasbel, pe maʼuk skʼan xal ti jech skʼan pasele (Deuteronomio 21:22, 23). Kʼuchaʼal laj xa kaltike, oy jlom tukʼil yajtuneltak Dios ti jech laj yichʼ chikʼbel sbekʼtalik kʼalal chamemik xa oxe, jech kʼu chaʼal li Jonatan ti jaʼ li xnichʼon ajvalil Saule.
Xi xchʼunojik jlome: Kʼalal chichʼ chikʼel jun animae mu xuʼ xchaʼkuxesat yuʼun li Diose.
Li kʼusi melele: Li Diose xuʼ xchaʼkuxes tal jun krixchano mu ventauk ti kʼu yelan chame, mi yichʼ mukel, mi yichʼ chikʼel, mi cham ta yut nab o laj ta tiʼel ta jkotuk chonbolom (Apokalipsis 20:13). Li Dios ti jaʼ li Buchʼu skotol xuʼ yuʼune, xuʼ xchaʼpasbe ta achʼ sbekʼtal li jun krixchanoe (1 Korintios 15:35, 38).