¿Mi ta melel laj yichʼ tunesel li sudario de Turín sventa xichʼ pixbel sbekʼtal li Jesuse?

Li kʼusi chal Vivliae

Li Vivliae muʼyuk bu chalbe skʼoplal li manta ti sudario de Turín sbi yuʼunike, ti chʼul pokʼ, chʼul manta o ti chʼul sudario sbi yuʼunik xtoke. Taje jaʼ la jlik lino pokʼ ti ep buchʼutik xchʼunojik ti jaʼ la la xpixbeik-o sbekʼtal Jesukristo kʼalal laj yichʼ mukele. Jaʼ yuʼun, jlom krixchanoetik ti jech xchʼunojike toj echʼ xa noʼox tsots skʼoplal chilik li voʼneal manta taje. Avie, te skʼejojik ta katedral ta jteklum Turín (Italia). Lek tajek chabibil yuʼunik ta kristal sventa mu sok.

¿Mi oy bu chal ta Vivlia li sudario de Turín xie? Muʼyuk.

Kalbetik skʼoplal oxtosuk ti kʼu yuʼun muʼyuk te chalbe skʼoplal ta Vivliae.

1. Li sudarioe jaʼ jlik pokʼ ti chanib metro xchiʼuk 42 sentimetro snatile, ti jun metro xchiʼuk 13 sentimetro sjamleje. Jech xtok, oy kʼusi tsʼisbil ti kʼu snatil li pokʼe, vaxakib sentimetro sjamlej.

   Li kʼusi chal Vivliae: Maʼuk ta jlik lino pokʼ laj yichʼ pixbel li sbekʼtal Jesuse, yuʼun laj yichʼ tunesel jaylikuk pokʼ. Jech, jlik-o spokʼal ti kʼusi la xpixbeik-o sjole. Jaʼ yuʼun chal Vivlia ti kʼalal chaʼkuxiem xa oxe, och batel ta mukinal jun jtakbol, «vaʼun te votsajtik laj yil li lino pokʼe. Yan li pokʼ ti jaʼ toʼox pixil-o sjole muʼyuk bu te oy xchiʼuk li yantik pokʼetike, jot-o bu balal» (Juan 20:​6, 7).

2. Li ta sudarioe xvinaj ti muʼyuk laj yichʼ pokel li animae, yuʼun te to xvinaj xchʼichʼel.

   Li kʼusi chal Vivliae: Kʼalal cham li Jesuse jaʼ jech la xchapanbeik sbekʼtal kʼuchaʼal nopem xaʼi tsmuk yanimaik li judaetike (Juan 19:39-​42). Yuʼun nopem xaʼi tspokik, chjaxbeik aseite xchiʼuk muil poxiletik kʼalal mu to tsmukike (Mateo 26:12; Echos 9:​37). Jaʼ yuʼun chaʼa, li yajtsʼaklomtak Jesuse baʼyel la spokbeik sbekʼtal kʼalal mu to chpixike.

3. Li sudarioe «bonol jutuk xvinaj ta chʼichʼ, xkilbetik jutuk sat jun vinik xchiʼuk xkilbetik jutuk spat, xakʼel yilele la xpux sba ta sjol li mantae», jaʼ jech chal li Diccionario abreviado Oxford de las religiones del mundo.

   Li kʼusi chal Vivliae: Li jchankʼopetike laj yalbeik skʼoplal kʼalal cham li Jesuse, ti xokol ti bu muke xchiʼuk ‹laj yalik ti laj yilik anjeletik› li antsetike, ti jaʼ albatik ti chaʼkuxiem xa li Jesuse (Lukas 24:15-​24). Ti teuk votsol laj yilik sudario li yajchankʼoptak Jesuse, laj yalbeik skʼoplal ti jechuke xchiʼuk ti kʼusi te xvinaje. Pe ta melel muʼyuk bu jech chal Vivlia mi oy jech loʼilajik.

¿Mi lek ti xichʼ ichʼel ta mukʼ li sudarioe?

Muʼyuk lek. Manchuk onoʼox mi melel, mu stakʼ xichʼ ichʼel ta mukʼ. Jkʼeltik avil ta Vivlia ti kʼu yuʼun mu stakʼe.

1. Mu persauk. Xi laj yal li Jesuse: «Li Diose jaʼ jun Kuxlejal ti mu xvinaje, vaʼun li buchʼutik chichʼik ta mukʼe skʼan akʼo yichʼik ta mukʼ jech kʼuchaʼal tskʼan chʼul espiritu xchiʼuk li kʼusi melele» (Juan 4:​24). Sventa xkichʼtik ta mukʼ ta melel li Diose mu persauk jtunestik li kʼusitik voʼne kʼejbile o li slokʼoltak santoetike.

2. Mu stakʼ. Li ta Lajuneb Mantaletike jamal chal ti mu stakʼ ichʼel ta mukʼ li jecheʼ diosetike (Deuteronomio 5:​6-​10). Jaʼ jech albatik mantal ta Vivlia ek li yajtsʼaklomtak Kristoe: «Chʼako abaik lokʼel ta stojolal li santoetike» (1 Juan 5:​21). Oy van junantike chalik ti maʼuk jun jecheʼ dios li sudarioe, yuʼun jaʼ noʼox la jun lokʼol ta sventa li xchʼunel oʼontonale. Akʼo mi jech, li jun lokʼole chkʼot ta jun dios yuʼunik kʼalal chlik yichʼik ta mukʼe.a Jaʼ yuʼun chaʼa, li buchʼu oy ta yoʼonton ti xmuyubaj yuʼun li Diose mu me stakʼ xichʼ ta mukʼ li santoetike o li yan lokʼoletik kʼuchaʼal sudarioe.