¿Kʼusi chal Vivlia ta sventa li yakʼel kʼusi x-ayan kuʼuntike?
Li kʼusi chal Vivliae
Li Vivliae tstij koʼontontik sventa xlokʼ ta koʼontontik yakʼel li kʼusi x-ayan kuʼuntike xchiʼuk chal ti skʼan jpastik ta skoj slekil koʼontontike. Kʼalal oy kʼusi ta jpastik ta slekil koʼontontike, ta jtabetik sbalil xchiʼuk stabeik sbalil li yantike (Proverbios 11:25; Lukas 6:38). Xi laj yal li Jesuse: «Jaʼ mas xmuyubaj li buchʼu chakʼe, jaʼ mu sta li buchʼu chichʼe» (Echos 20:35).
¿Kʼusi ora skʼan xkakʼtik li kʼusi x-ayan kuʼuntike?
Kʼalal chlokʼ ta koʼontontik yakʼel li kʼusi x-ayan kuʼuntike, toj lek kʼusi chkʼot ta pasel. Xi chal li Vivliae: «Ta jujuntal akʼik ti kʼu yepal chlokʼ ta avoʼontonike, mu me xchibetuk avoʼonton xavakʼik o mu me sujbiluk chavaʼi abaik, yuʼun kʼanbil yuʼun Dios li buchʼu xkuxet noʼox yoʼonton chakʼe» (2 Korintios 9:7).
Li Diose tskʼan ti oyuk slekil yoʼonton li buchʼutik ch-ichʼat ta mukʼe (Santiago 1:27). Xkoʼolaj ti ta jkoltatik Dios kʼalal ta jkoltatik li buchʼu chtun yuʼunik koltaele, vaʼun li Diose xkoʼolaj chaʼi ti oy yil ta jtojolaltik kʼalal oy kʼusi ta jpastik ta slekil koʼontontike (Proverbios 19:17). Li Vivliae chal ti chakʼ jmotontik Dios mi jech ta jpastike (Lukas 14:12-14).
¿Kʼusi ora skʼan mu xkakʼtik li kʼusi x-ayan kuʼuntike?
Jaʼ kʼalal oy kʼusi ta jpastik ta skoj ti chopol kʼusi oy ta koʼontontike, jech kʼuchaʼal liʼe:
Kʼalal ta jkʼantik ti labaluk sba chil yantike (Mateo 6:2).
Kʼalal oy kʼusi ta jkʼantik akʼbele (Lukas 14:12-14).
Kʼalal ta jnoptik ti jaʼ ta jta-o jkolebaltike (Salmo 49:6, 7).
Kʼalal nitil skʼoplal xchiʼuk li kʼusitik muʼyuk lek chil Diose. Jech kʼuchaʼal liʼe, chopol ti chkakʼbetik takʼin junuk krixchano sventa xtajin ta takʼin, xyakub o tsman-o sdrogae (1 Korintios 6:9, 10; 2 Korintios 7:1). Chopol noxtok ti xkakʼbetik takʼin junuk krixchano ti yolbaj mu skʼan x-abteje (2 Tesalonisenses 3:10).
Kʼalal tsmakutik ta spasel li kʼusi yakʼoj jbaintik Diose. Li Vivliae chal ti jolil ta utsʼ alalile skʼan xakʼbe yutsʼ yalal skotol li kʼusi chtun yuʼunike (1 Timoteo 5:8). Muʼyuk lek ti mu xa xakʼbe kʼusi chtun yuʼun yutsʼ yalal ta skoj ti jaʼ tskolta li yantike. Li Jesuse muʼyuk lek laj yil li buchʼutik mu skʼan skolta stot smeʼik ti malubemik xa ta skoj ti chalik ti jaʼ xa yuʼun Dios li kʼusi x-ayan yuʼunike (Markos 7:9-13).