«Ta xcʼuxubine yuʼun Dios ti buchʼu xmuyubaj ta xaqʼue»

¿Kʼusi matanalil ti xuʼ xamuyubaj yuʼune? Muʼyuk xijmuyubaj yuʼun mi ta sujbil laj kichʼtik akʼbel junuk matanale, jaʼ mas lek chkaʼi jbatik yuʼun mi oy ta yoʼonton ta melel li buchʼu chakʼbutike. Tsots skʼoplal mi ta melel chlokʼ ta yoʼonton chakʼbutik li matanale, ¿mi mu jechuk? Mi jech tsots skʼoplal chkiltike, mas to tsots skʼoplal chil li Diose. Jkʼelbetik jun skʼelobil li kʼusi la stsʼiba jtakbol Pablo ti jaʼ akʼbat snaʼ yuʼun Diose. (2 Corintios 9:7, Ch.)

¿Kʼu yuʼun jech laj yal li Pabloe? Yuʼun tskʼan tstijbe yoʼontonik li yajtsʼaklomtak Cristo ta Corinto sventa skoltaik yermanotakik ta Judea ti oy svokolike. ¿Mi la suj ta persa yermanotak ta Corinto sventa xakʼik matanal li jtakbol Pabloe? Mu jechuk ta melel. Xi laj yale: «Ti jujune acʼo yacʼ ti cʼu yepal acʼbat snaʼ yuʼun ti sjol yoʼnton, ti maʼuc xchibal yoʼntone, ti maʼuc sujbile, yuʼun ta xcʼuxubine yuʼun Dios ti buchʼu xmuyubaj ta xaqʼue». Jchanbetik to mas skʼoplal li tojobtasel liʼe.

«Ti cʼu yepal acʼbat snaʼ yuʼun ti sjol yoʼnton[e].» Li Pabloe laj yal ti kʼalal oy kʼusi chakʼ li jun melel yajtsʼaklom Cristoe yuʼun jech lokʼem ta yoʼonton ta melel. Jech xtok, tsnopik lek ti kʼuxi xuʼ tskoltaik xchiʼilik ta chʼunolajel li melel yajtsʼaklom Cristoe. Jun krixchano ti chchanbe skʼoplal Vivliae, chalbe smelolal ti jpʼel kʼop ta griego ti jelubtasbil kʼuchaʼal «cʼu yepal acʼbat snaʼ» xie, jaʼ la skʼan xal «ti baʼyel xa onoʼox snopoje». Jaʼ yuʼun, ta snop lek ta sventa kʼusi chtun yuʼun yermano li jun yajtsʼaklom Cristoe xchiʼuk ta skʼel kʼuxi xuʼ skolta lek (1 Juan 3:17).

«Ti maʼuc xchibal yoʼntone, ti maʼuc sujbile.» Li Pabloe ta xal chib talelaletik ti mu jechuk tspasik li yajtsʼaklomtak Cristoe: jaʼ ti xchibet xchiʼuk ti sujbile. Li jpʼel kʼop ta griego ti xchibet xi chichʼ jelubtasele, jaʼ skʼan xal ti «chat yoʼonton (o ti kʼux chaʼi)» chakʼe. Jlik livroe chal ti buchʼu mu ta skotoluk yoʼonton ta xakʼe, «chat yoʼonton kʼalal ta snop ti chakʼ li stakʼine». Li krixchano ti ta persa chakʼe sujbil chaʼi sba. ¿Buchʼu van tskʼan chchʼam jun matanal ti ta sujbil ch-akʼbate?

«Ta xcʼuxubine yuʼun Dios ti buchʼu xmuyubaj ta xaqʼue.» Jech, xmuyubaj skʼan xakʼ matanal li jun yajtsʼaklom Cristoe. Yuʼun mi ta skotol koʼontontik chkakʼtike xuʼ xijmuyubaj ta melel (Hechos 20:35). Kʼalal xijmuyubaj chkakʼtike xuʼ me xakʼik venta li yantik eke. Ta melel, kʼalal ta xmuyubaj xie jaʼ chalbe skʼoplal ti kʼuyelan chaʼi sbae xchiʼuk ti kʼuyelan xvinaj ta sat li buchʼu chakʼ matanale. Li buchʼu ta skotol yoʼonton ta xakʼ li matanale xmuyubaj ta xaʼi li buchʼu ta xchʼame xchiʼuk jech xmuyubaj li Dios eke. Oy xi yichʼoj jelubtasel li jun teksto xtoke: «Li bochʼo slequil yoʼnton chacʼ cʼusi oy yuʼune jaʼ chcʼanat yuʼun Dios» (Achʼ Testamento, ta skʼop Chenalhó).

Li kʼusi la stsʼiba li jtakbol Pabloe jaʼ jun mantal ti skʼan xchʼunik kʼalal ta xakʼik matanal li yajtsʼaklomtak Cristoe. Akʼo mi jaʼ noʼox chkakʼ koratik, kiptik o li kʼusitik oy kuʼuntike, ta skotoluk koʼontontik xkakʼtik xchiʼuk jaʼuk ta skoj ti ta jkʼupintik yakʼbel yantik li kʼusi oy kuʼuntike, mas to li buchʼutik ta xtun yuʼunike. Mi jech ta jpastike maʼuk noʼox xijmuyubaj, xuʼ lek chilutik li Diose, yuʼun skʼanoj «ti buchʼu xmuyubaj ta xaqʼue».