Tijbat yoʼonton yuʼun yan jchukeletik

Li ta 2011, oy jun vinik jatav lokʼel ta slumal ta Eritrea, te kʼot ta Noruega. Kʼalal la xchiʼin ta loʼil stestigotak Jeovae, laj yal ti oy xa onoʼox xojtikin yan stestigotak Jeova li ta slumale. Yuʼun kʼalal tikʼil toʼox ta soltaroile, laj yil ti chichʼik tikʼel ta chukel ta skoj li kʼusitik xchʼunojike. Akʼo mi tsots chichʼik ilbajinel, pe jpʼel ta yoʼontonik ti muʼyuk ch-ochik ta soltaroile.

Mu jnaʼtik kʼuchaʼal, pe li vinike och ta chukel. Te laj yojtikinik oxvoʼ stestigotak Jeova ti laj yichʼik tikʼel ta chukel ta 1994 ta skoj li xchʼunel yoʼontonike. Jaʼik Paulos Eyasu, Negede Teklemariam xchiʼuk Isaac Mogos.

Te laj yakʼ venta ti chakʼ ta xkuxlejalik li kʼusi chakʼik ta chanele, yuʼun mu snaʼ sjutik kʼop xchiʼuk chchʼakbe sba yuni veʼelik. Jech xtok, laj yakʼ venta ti chchan Svivliaik skotol orae xchiʼuk chalbeik yantik ti akʼo jmoj xchanike. Xuʼ xlokʼik-o ta chukel stestigotak Jeova mi la spasik firmar jlikuk vun ti bu chal ti chiktaik li kʼusitik xchʼunojike, pe muʼyuk bu jech la spasik.

Toj labal sba laj yil, jaʼ yuʼun kʼalal kʼot ta Noruegae, lik sabe skʼoplal kʼu yuʼun toj tsots xchʼunel yoʼontonik li stestigotak Jeovae. Kʼalal laj yichʼ tael yuʼun stestigotak Jeovae, lik xchan Vivlia xchiʼuk lik batuk ta tsobajel.

Li vinik taje kʼot ta stestigo Jeova, yuʼun laj yichʼ voʼ ta septiembre ta 2018. Avi une, chcholbe mantal li buchʼutik te likemik ta Eritrea xchiʼuk ta Sudane. Chalbe ti akʼo xchanik Vivlia sventa lekuk xchʼunel yoʼontonik ta stojolal Diose.