Li stestigotak Jeovae chukbilik ta skoj li kʼusi xchʼunojike | Eritrea
Ta epal xa onoʼox jabiletike, li ajvalil ta Eritreae la stikʼan ta chukel li stestigotak Jeovae ti te tsakal skʼoplal antsetik xchiʼuk li buchʼutik oy xa sjabilalike. Pe chʼabal xichʼik chapanel. Li ta 25 yuʼun oktuvre ta 1994, lokʼ jun mantal yuʼun li ajvalil Afewerki laj yal ti maʼuk xa slumalik Eritrea li stestigotak Jeovae ta skoj ti muʼyuk la spasik votar li ta 1993 xchiʼuk ti muʼyuk x˗ochik ta servisio militare. Kʼalal muʼyuk toʼox spersail tspasik li servisio militare, li j˗abteletik ta Eritreae chakʼik toʼox permiso sventa spasik yan abtelal. Taje jech la spas talel epal stestigotak Jeova akʼo mi xkʼex li ajvaliletike. Li j˗abteletike tskʼupil kʼoptaik ti jech tspasik li abtelale, jaʼ yuʼun ch˗akʼbatik li «Certificado de Cumplimiento del Servicio Nacional». Pe ti kʼuxi lokʼ yuʼun mantal li ajvalil ta 1994, li j˗abteletike stikʼojan ta chukel li stestigotak Jeovae, yilbajinojik xchiʼuk skontrainojik. Yuʼun li kʼusi oy ta yoʼontonike, jaʼ ti xiktaik li kʼuxi xchʼunojike.
Te to tikʼajtik ta chukel 64 stestigotak Jeova (37 viniketik xchiʼuk 27 antsetik). Li ta septiembre ta 2024, ta anil noʼox epaj li buchʼutik ochemik ta chukele. Li polisiaetike ochik ta persa ta jpʼej na ti bu yakal tsjelubtasik tsobajele xchiʼuk chukatik batel 24 ta voʼ. Ta tsʼakal jutuke, la slokʼesik ta chukel chaʼvoʼ kʼoxetik ti mu to sta 18 sjabilalike. Jun chib kʼakʼal ta tsʼakale, la stikʼik ta chukel jun stestigo Jeova ti 85 sjabilale. Li 23 stestigotak Jeovae laj yichʼik ikʼel batel ta chukinab ta Mai Serwa. Li ta 7 yuʼun disiembre ta 2024, lokʼ ta chukel li Saron Ghebru ti baluneb u xchiʼuk yole xchiʼuk ti jaʼ sba yole. Li ta 15 yuʼun enero ta 2025, la slokʼesik ta chukel Mizan Gebreyesus ti 82 sjabilale.
Li ta 1 yuʼun noviembre ta 2024, li polisiaetike la stsakik yan velta li stestigotak Jeovae, la xchukik batel chanvoʼ kerem tsebetik ti yichʼojik 16 xchiʼuk 18 sjabilalike. Oy kʼusitik jakʼbatik xchiʼuk ikʼatik noʼox batel ta chukinab ta Mai Serwa. Jech xtok, li ta 22 yuʼun noviembre, li polisiaetike ay yikʼik lokʼel ta eskuela li stseb Almaz Gebrehiwot, vaʼun laj yikʼik batel ta snail polisiaetik. Kʼalal ay saʼ stseb li Almaze, jaʼ xa laj yichʼ chukel komel li stuke. Li avie, li kermanatike te tikʼil ta chukel ta Asmara.
Jaʼtik to xtoke, laj yichʼik lokʼesel ta chukel chaʼvoʼ ermanaetik. Li ta 25 yuʼun fevrero ta 2025, li Mikal Taddesse lokʼ ta chukel te ta Mai Serwa xchiʼuk li ta 12 yuʼun marso ta 2025, li Berekti Gebretatyose lokʼ ta chukel te ta Adi Abeto.
Tsots laj yichʼik ilbajinel ta chukinab
Li stestigotak Jeova ti te oyik ta Mai Serwae xchiʼuk li ta yan chukinabetike, tsots tajek chil svokolik. Bikʼit tajek ti bu tikʼajtik ta chukele. Mu stakʼ lek stelan sbaik, jaʼ yuʼun tsʼeʼajtik chvayik xchiʼuk pakʼajtik oyik ta jujuntal. Jech xtok, chʼabal vanyoetik. Li viniketik xchiʼuk li antsetike, jaʼ noʼox chaʼkoj ta kʼakʼal xuʼ xchʼay sbaik xchiʼuk akʼbil yorail bakʼin xuʼ xbatik xchiʼuk chabibilik˗o ta soltaroetik. Muʼyuk lek buchʼu xuʼ xpoxtavan, jech xtok chʼabal lek ch˗akʼbat sveʼelik xchiʼuk yaʼalik.
Oy chanvoʼ stestigotak Jeova ti chamik li ta chukinab ta Eritreae. Jech xtok, oy oxvoʼ ti oy xa sjabilalike lokʼesatik ta chukel, pe muʼyuk xa jal xkuxiik ta skoj ti tsots tajek ilbajinatik kʼalal te toʼox tikʼajtik ta chukinabe.
Li ta sjabilal 2011 xchiʼuk 2012, cham chaʼvoʼ stestigotak Jeova ta skoj ti tsots tajek kʼusi pasbatik li ta chukinab Meitire. June 62 sjabilal ti Misghina Gebretinsae sbie, ti cham ta julio ta 2011 ta skoj ti kʼixin tajek ti bu akʼbat kastigo ti «el subterráneo» sbie. Li buchʼu jaʼtik jech laj yichʼ pasbele jaʼ li Yohannes Haile ti 68 sjabilale, cham li ta 16 yuʼun agosto ta 2012 kʼalal chanib xa ox jabil te tikʼil ta chukele. Oy oxvoʼ stestigotak Jeova ti oy xa sjabilalik ti jaʼ Kahsai Mekonnen, Goitom Gebrekristos xchiʼuk Tsehaye Tesfariam chamik kʼalal mu toʼox jaluk slokʼelik li ta chukele, ta skoj ti tsots tajek kʼusi pasbatik li ta chukinab Meitire.
Oxvoʼ stestigotak Jeova ti oy xa sjabilalik ti jaʼik li Kahsai Mekonnen, Goitom Gebrekristos xchiʼuk li Tsehaye Tesfamariam chamik kʼalal mu toʼox jaluk slokʼelik ta chukele. Yuʼun tsots tajek laj yil svokolik kʼalal te toʼox tikʼilik ta chukel ta Meitire.
Li ta 2018, cham chaʼvoʼ stestigotak Jeova kalal laj yichʼik jelubtasel batel li ta chukinab Mai Serwae. Li ta 3 yuʼun enero ta 2018, cham li Habtemichael Tesfamariam ti 76 sjabilale xchiʼuk li ta 6 yuʼun marso ta 2018 cham li Habtemichael Mekonnen ti 77 sjabilale. Li ta 2008, chukatik batel yuʼun li j˗abteletik ta Eritreae akʼo mi chʼabal smulik.
Mu nabajuk ti kʼu sjalil chichʼik tikʼel ta chukele
Jutuk mu skotoluk li stestigotak Jeovae muʼyuk albilik ti kʼusi ora chlokʼik ta chukele, yuʼun jaʼ to chlokʼesatik mi chamike o kʼalal jutuk xa ox skʼan xchamike. Ta skoj ti chʼabal junuk mantal ti xuʼ xichʼik lokʼesel ta chukel li ta lum taje, xkoʼolaj ti te batik˗o ta chukele.
Ti kʼu yelan xcholet kʼot ta paselea
20 yuʼun mayo ta 2025
Oy 64 stestigotak Jeova tikʼajtik ta chukel.
22 yuʼun noviembre ta 2024
La xchukik li Almaz Gebrehiwot ta skoj ti muʼyuk la stikʼ sba ta politika ta slumale.
1 yuʼun noviembre ta 2024
La xchukik batel chanvoʼ kerem tsebetik ti jaʼik stestigotak Jeovae xchiʼuk laj yikʼik batel ta chukinab ta Mai Serwa.
27 yuʼun septiembre ta 2024
La xchukik batel 23 stestigotak Jeova xchiʼuk laj yikʼik batel ta chukinab ta Mai Serwa. Ta tsʼakale, chaʼvoʼ laj yichʼik lokʼesel.
1 yuʼun fevrero ta 2021
La slokʼesik ta chukel oxvoʼ stestigo Jeova.
29 yuʼun enero ta 2021
La slokʼesik ta chukel jun stestigo Jeova.
4 yuʼun disiembre ta 2020
La slokʼesik ta chukel 28 stestigotak Jeova.
6 yuʼun marso ta 2018
Cham li Habtemichael Mekonnen ti 77 sjabilal kʼalal jelubtase batel ta chukinab Mai Serwa.
3 yuʼun enero ta 2018
Cham li Habtemichael Tesfamariam ti 76 sjabilal kʼalal jelubtase batel ta chukinab Mai Serwa.
Julio ta 2017
Skotol li stestigotak Jeova ti te toʼox tikʼajtik ta chukel ta Meitire laj yichʼik jelubtasel batel li ta chukinab Mai Serwa, ti te xkom ta stiʼil Asmarae.
25 yuʼun julio ta 2014
Jutuk mu skotoluk li buchʼutik laj yichʼik chukel li ta 14 yuʼun avrile lokʼesatik xa ta chukel. Pe li buchʼutik tsakatik batel li ta 27 yuʼun avrile te to tikʼajtik ta chukel 20 ta voʼ.
27 yuʼun avril ta 2014
Laj yichʼik chukel batel 31 ta voʼ stestigotak Jeova kʼalal jaʼo te tsobol chchanik Vivliae.
14 yuʼun avril ta 2014
Kʼalal jaʼo tspasik li Snaʼobil slajel Kristoe, laj yichʼik chukel batel mas ta 90 stestigotak Jeova.
16 yuʼun agosto ta 2012
Cham li Yohannes Haile kʼalal 68 sjabilal ti te tikʼil ta chukel kʼalal jaʼo tsots tajek ch˗akʼbat kastigoe.
Julio ta 2011
Cham li Misghina Gebretinsae kʼalal 62 sjabilal kʼalal jaʼo te tikʼil ta chukel kʼalal jaʼo tsots tajek ch˗akʼbat kastigoe.
28 yuʼun junio ta 2009
Li polisiaetike kʼotik ta anil ta sna jun ermano kʼalal jaʼo te tsobol chichʼik ta mukʼ Diose. Li j˗abteletike la xchukik batel li 23 ta voʼ te tsobolike. Li buchʼu mas bikʼit laj yichʼ chukel batele yichʼoj chib jabil, li buchʼu mas oy sjabilale 80 sjabilal.
28 yuʼun avril ta 2009
Li j˗abteletike la xchukik batel skotol li stestigotak Jeovae, li june la stakik batel ta chukinab Meitir.
8 yuʼun julio ta 2008
Li j˗abteletike ta anil ochik ta sna li stestigotak Jeova xchiʼuk ti bu ch˗abtejike, vaʼun la xchukik batel 24 ta voʼ. Jutuk mu skotoluk ti buchʼutik laj yichʼik chukel batele jaʼik li buchʼutik tsaʼik takʼin sventa smakʼlin li yutsʼ yalalike.
Mayo ta 2002
Li ajvalile laj yal ti mu xa stakʼ stsob sbaik li relijionetik sventa xichʼik ta mukʼ Dios mi maʼuk te skʼoplal li ta chanib relijion ti lek chil li ajvalile.
25 yuʼun oktuvre ta 1994
Li ajvalile la slokʼel jun mantal ti maʼuk xa la te slumalik li stestigotak Jeovae xchiʼuk chʼabal xa sderecho kʼusi skʼanik jech kʼuchaʼal li yan jnaklejetik tee.
17 yuʼun septiembre ta 1994
Li Paulos Eyassu, Isaac Mogos xchiʼuk Negede Teklemariam laj yichʼik tikʼel ta chukel ta jech noʼox xchiʼuk muʼyuk laj yichʼik chapanel ta junuk nail chapanobbail.
Ta sjabilaltik 1950 kʼalal ta 1959
Te lik stsob sbaik talel li baʼyel stestigotak Jeova ta Eritreae.
a Jaʼ baʼyel laj yichʼ akʼel li bu mas achʼik toe, jaʼ ta tsʼakal xa li bu mas voʼneike.