Li stestigotak Jeovae chukbilik ta skoj li kʼusi xchʼunojike | Singapur

Li ta Singapure oy 8 ta voʼ keremetik ti jaʼik stestigotak Jeova ti te tikʼajtik ta chukel ta skoj ti mu skʼan spasik li servisio militare. Oy chanvoʼ ti xchibal xa velta laj yichʼik tikʼel ta chukel ta skoj ti mu skʼan spasik li servisio militare. Ta skoj li mantaletik yakʼoj li ajvalile, mu kʼusi stakʼ pasel sventa xichʼ pojel li keremetike, yuʼun oy spersail skʼan xichʼ pasel li servisio militare xchiʼuk mu tstsakbeik ta venta ti kʼu yelan chaʼi li sjol yoʼontonike.

Kʼalal tstaik 18 jabile, skotol li keremetike oy spersail sventa xbat stsak sbiik sventa x˗ochik li ta soltaroal ta Singapure. Mi oy buchʼu mu skʼan spas ta skoj ti mu xakʼ li sjol yoʼontone, ta xichʼik chukel jun jabil ti bu oy li soltaroetike. Kʼalal tstsʼaki yuʼunike, chlokʼesatik li ta chukele, vaʼun ch˗albatik ti akʼo slapik li uniforme yuʼun soltaroetike xchiʼuk chichʼik chapanel sventa soltaroal. Mi mu skʼan spasike, ta xtakatik batel yan velta li ta nail chapanobbail yuʼun soltaroetike. Vaʼun, ch˗albatik ti chtikʼatik ta chukel te van jun jabil xchiʼuk oʼlole. Jaʼ yuʼun, li keremetik ti jaʼik stestigotak Jeova ti mu skʼan spasik li servisio militar ta skoj ti mu xakʼ sjol yoʼontonike, chib to velta ch˗ochik ta chukel, jaʼ xkaltik, ti chib jabil xchiʼuk oʼlol chichʼik tikʼel ta chukele.

Li ajvalile mu skʼan spas li kʼusi chal Naciones Unidase

Ta epal jabiletik li Naciones Unidase yaloj mantal ti «akʼo xichʼ tsakbel ta venta kʼu yelan chaʼi sjol yoʼontonik li buchʼu mu skʼan spasik li servisio militare. Yuʼun oy sderechoik sventa xalik li kʼusi tsnopike, ti kʼu yelan chaʼi sjol yoʼontonike xchiʼuk ti xuʼ stʼuj stukik li srelijionike. Taje, jaʼ jech chal ek li Declaración Universal de Derechos Humanos». Akʼo mi te xa onoʼox tsakal skʼoplal ta Naciones Unidas li Singapur ta 1965, muʼyuk tstsak ta venta kʼu yelan chaʼi sjol yoʼonton li keremetik ta sventa li servisio militare. Jun bankilal j˗abtel ta Singapure la stakbe batel jlik karta li Comisión de Derechos Humanos ta ONU ta 24 yuʼun avril ta 2002, xi laj yale: «Li kʼusi xchʼunoj o li kʼusi tspas li jun krixchanoe, muʼyuk sbalil chkom [mi tskontrain li mantal ta jun lume], jaʼ skʼan xichʼ chʼunel li mantaletik oy ta slumale, ti jaʼ skʼan xichʼ chabiel li lume». Xi to laj yale: «Ta junantik lume muʼyuk spersail chichʼ pasel li servisio militare, pe maʼuk skʼan xal ti jaʼ xa jech chichʼ pasel ta spʼejel balumile».

Ti kʼu yelan xcholet kʼot ta paselea

1. 19 yuʼun mayo ta 2025

   Oy vaxakvoʼ stestigotak Jeova tikʼajtik ta chukel ta skoj ti oy kʼusi mu x˗akʼbat spas li sjol yoʼontonike.

   

2. 24 yuʼun avril ta 2002

   Jun j˗abtel ta Singapure laj yal ti ajvalile mu stsakbe ta venta sjol yoʼonton li keremetike.

3. Fevrero ta 1995

   Mas to epaj ti laj yichʼik chukel batel xchiʼuk ti laj yichʼik kontrainel li stestigotak Jeova ta Singapure.

4. 8 yuʼun agosto ta 1994

   Li Tribunal supremo ta Singapure muʼyuk la xchapan li stestigotak Jeova ti laj ox skʼanik chapanele.

5. 12 yuʼun enero ta 1972

   Li ajvalil ta Singapure muʼyuk xa la stsak ta venta kʼuchaʼal jun relijion li stestigotak Jeovae.