Li stestigotak Jeovae chukbilik ta skoj li kʼusi xchʼunojike | Ucrania

Jutuk mu 30 jabil staojbeik sbalil stestigotak Jeova ta Ucrania li mantal yaloj ajvalil ti xuʼ spasik yan abtelal ta skoj ti mu xakʼ sjol yoʼontonik spasel li servisio militare. Jaʼ yuʼun, xuʼ spasik yan abtelal ti bu muʼyuk chopol chaʼi sjol yoʼontonike.

Pe kʼalal lik li paskʼop ta Ucrania li ta 24 yuʼun fevrero ta 2022, muʼyuk xa x-akʼbat spasik yan abtelal, yuʼun sujatik xa ta spasel li servisio militare. Jech oxal, ta sienal xa noʼox stestigotak Jeova yakal chichʼik chapanel ta skoj ti mu xakʼ sjol yoʼontonik spasel li servisio militare. Ti vaʼ yelan tspasik li j-abteletike, yakal chakʼik ta ilel ti muʼyuk xa yakal tstsakik ta venta li kʼusi xchʼunoj o li kʼusi tsots skʼoplal chil li jun krixchanoe. Jech xtok, muʼyuk xa tstsakbatik ta venta sderechoik ta skoj ti tsujatik xa spasel li servisio militare. Ti vaʼ yelan yakal tspasike jamal xvinaj ti muʼyuk yakal tstsakbeik ta venta sderecho li jun krixchanoe xchiʼuk muʼyuk tstsakik ta venta li kʼusi chal Constitución yuʼun Ucraniae, yuʼun xi yaloje: «Mi muʼyuk tspas servisio militar jun krixchano ta skoj kʼusi xchʼunoj o ta skoj li srelijione xuʼ spas yan abtelal».

Li ta 19 yuʼun mayo ta 2025 oy xa ox chanvoʼ stestigotak Jeova ti laj yichʼik chukel oxib jabil ta skoj ti mu xakʼ sjol yoʼontonik spasel li servisio militare. Jech xtok, oy oxvoʼ tikʼajtik ta chukel ti muʼyuk to yichʼojik albel kʼu sjalil te chkomike.

Tsvul yoʼontonik junantik organisasionetik

Kʼalal laj yilik li kʼusi yakal chkʼot ta pasele, oy oxvoʼ j-abteletik ta ONU laj yalik ti tsvul yoʼontonik ta skoj ti muʼyuk chakʼik ta pasel yan abtelal li ta Ucraniae. Xi laj yalbeik li ajvalil ta Ucrania li ta 8 yuʼun noviembre ta 2023: «Ta jvul koʼontonkutik ti yakal chachapanik li buchʼutik muʼyuk tspasik servisio militar ta skoj ti mu xakʼ sjol yoʼontonike xchiʼuk li buchʼutik chpakbat-o skʼoplalik eke».

Ti kʼu yelan xcholet kʼot ta paselea

1. 19 yuʼun mayo ta 2025

   Oy vukvoʼ stestigotak Jeova tikʼilik ta chukel.

2. 24 yuʼun fevrero ta 2022

   Kʼalal lik li paskʼope lik sujvanikuk ta spasel li servisio militare.

3. 23 yuʼun junio ta 2015

   Li Tribunal Superior ta Ucraniae tspakbe skʼoplal sderechoik li buchʼutik mu xakʼ sjol yoʼontonik spasik servisio militar kʼalal jaʼo yakal paskʼope, jech kʼuchaʼal yakal tsnuptan li Vitaliy Shalaikoe.

4. Disiembre ta 1991

   Lokʼ jun mantal ti bu chal ti xuʼ spasik yan abtelal ti muʼyuk te skʼoplal li ta servisio militare.

5. 28 yuʼun fevrero ta 1991

   Laj yichʼik ojtikinel kʼuchaʼal jun relijion ta stojolal ajvalil li stestigotak Jeovae.