Li stestigotak Jeovae chukbilik ta skoj li kʼusi xchʼunojike | Corea del Sur
Li ta 26 yuʼun oktuvre ta 2020, sba to velta laj yal li ajvalil ta Corea del Sur ti xuʼ spasik yan abtelal li buchʼutik mu x˗akʼbat sjol yoʼontonik spasel li servisio militare. Pe li buchʼutik ch˗abtejik ta derechos humanos ta Corea del Sure, laj yalik ti jaʼ jtos ilbajinel tspasik ta skoj ti toj tsots xchiʼuk to jal li yan abtelal ch˗akʼbat spasike. Yuʼun oxib jabil chjalij, jaʼ xkaltik, oʼlol to chjelav sjalil ti kʼu sjalil tspasik li servisio militare, pe taje mu jechuk chal li smantal ajvaliletike. Yuʼun mu stakʼ ti oʼlol to xjelav ti kʼu sjalil tspasik li yan abtelal ti jechuke, jaʼ to mi oy lek srasonal ti kʼu yuʼun jech tspasike. Oy junantik stestigotak Jeovae muʼyuk xchʼamojik spasel li yan abtelal ch˗akʼbat spasik ta skoj ti muʼyuk tstsakbatik ta venta li sderechoike xchiʼuk skʼanojik parte ta stojolal li nail chapanobbailetike. Pe li ta 30 yuʼun mayo ta 2024 li nail chapanobbail ta Corea del Sure muʼyuk la skʼan la xchapan. Akʼo mi jech, laj yal ti jaʼ jtos ilbajinele. Yuʼun xi laj yale: «Li yan abtelal liʼe, jaʼ jtos ilbajinel chichʼik pasbel li buchʼutik mu xakʼ sjol yoʼontonik spasel li servisio militare, yuʼun muʼyuk tstsakbatik ta venta li sderechoike».
Li Woo˗jin Byeone jaʼ jun vinik ti nupuneme xchiʼuk ti 29 sjabilale, laj yichʼ tikʼel ta chukel ta skoj ti muʼyuk la xchʼam li yan abtelal ch˗akʼbat spase. Taje jech kʼot ta nopel yuʼun stuk, pe ta slekil yoʼonton laj yal ti muʼyuk bu tspas ta skoj ti muʼyuk tstsakbat ta venta li sderechoe. Akʼo mi jech, mi oy akʼbat junuk abtelal ti bu muʼyuk bu ilbajinbil chaʼi sbae laj yal ti tspase. Pe li ta 24 yuʼun julio ta 2024 li nail chapanobbaile laj yal ti ch˗och ta chukel jun jabil xchiʼuk oʼlole.
Avie, oy 13 ta voʼ viniketik stestigotak Jeova ti muʼyuk xchʼamojik spasel li yan abtelaletike xchiʼuk yakal to chichʼik chapanel, te skʼoplal li Woo˗jin Byeon eke. Mi laj xa ox yichʼik chapanele jaʼ to te chichʼik albel mi ch˗ochik ta chukel xchiʼuk ti k’u sjalile. Akʼo mi jech, ep onoʼox buchʼutik tspasik li yan abtelaletik ta skoj ti mu xakʼ sjol yoʼontonik spasel li servisio militare, akʼo mi xichʼik˗o ilbajinel.
Ti kʼu yelan xcholet kʼot ta pasele
24 yuʼun julio ta 2024
Li nail chapanobbaile laj yal ti ch˗och ta chukel jun jabil xchiʼuk oʼlol li Woo˗jin Byeon ta skoj ti muʼyuk tspas li yan abtelaletike.
10 yuʼun noviembre ta 2022
Kʼalal laj yichʼ akʼbel karta sventa ch˗albat ti tspas li servisio militare, li Woo˗jin Byeone tsʼibaj batel li ta Administración de Reclutamiento Militar sventa xal batel ti muʼyuk chchʼame xchiʼuk ti muʼyuk tspas li yan abtelal ta skoj ti mu xakʼ sjol yoʼontone.
26 yuʼun oktuvre ta 2020
Li ajvalil ta Corea del Sure laj yal ti xuʼ spasik yan abtelal li buchʼutik mu xakʼ sjol yoʼontonik spasik li servisio militare.
1 yuʼun noviembre ta 2018
Li mukʼta ta nail chapanobbail ta Corea del Sure laj yal ti muʼyuk chopol ti oy buchʼutik mu skʼan spasik li servisio militar ta skoj ti mu xakʼ sjol yoʼontonike (balunvoʼ laj yalik ti leke, xchiʼuk chanvoʼ laj yalik ti muʼyuk leke).
28 yuʼun junio ta 2018
Li Tribunal Constitucional ta Corea del Sure la xchʼaybeik sbalil jvokʼ mantal li ta mantaletik sventa servisio militar ta skoj ti muʼyuk ch˗akʼbat stʼujik yan abtelal li buchʼutik mu xakʼ sjol yoʼontonik spasik li servisio militare.
18 yuʼun oktuvre ta 2016
Sba to jech laj yal li Tribunal de Apelación ta jteklum Gwangju ti muʼyuk smulik li oxvoʼ ti la skʼanik parte ta skoj ti oy kʼusi mu xakʼ sjol yoʼonton spasike.
30 yuʼun agosto ta 2011
Li Tribunal Constitucionale laj yal ti oy˗o sbalil li mantal ti xuʼ xichʼik chukel li buchʼutik mu skʼan spasik li servisio militare.
26 yuʼun agosto ta 2004
Li Tribunal Constitucionale laj yal ti jech chal smantal slumalik ti xuʼ xichʼik chukel li buchʼutik oy kʼusi mu xakʼ sjol yoʼonton spasike.
1975
Li ajvalile laj yal ti persa skʼan spasik li servisio militare.
1973
Li ajvalile lik yakʼbe svokol li stestigotak Jeova ti tikʼajtik ta chukele; jech˗o la spas kʼalal to ta sjabilaltik 1995.
1953
Li ajvalile laj stikʼ ta chukel li baʼyel stestigo Jeova ti muʼyuk la spas servisio militar ta skoj ti mu xakʼ sjol yoʼontone.