Isaias 41:10 | «Mu xaxiʼ, yuʼun liʼ jchiʼinojote»

«Mu xaxiʼ, yuʼun liʼ jchiʼinojote. Mu xavul avoʼonton, yuʼun voʼon Adiosun. Voʼon ta jtsatsubtasot, jech, voʼon ta jkoltaot, ta melel, ta xkikot lek ta jbatsʼikʼob ti tukʼ kʼusi tspase» (Isaias 41:10, Xchʼul Kʼop Dios sventa Achʼ Balumil).

«Jaʼ yuʼun mu me xaxiʼ, yuʼun vuʼun chajchiʼinot; mu cʼu xal avoʼnton, yuʼun vuʼun Diosun avuʼun. Vuʼun chacacʼbot atsatsal, vuʼun chajcoltaot; vuʼun chajtsacot lec ta jbatsʼicʼob ti xuʼ yuʼun tstsalvane» (Isaias 41:10, Xchʼul Cʼop Jtotic Dios, ta skʼop Chenalhó).

Li k’usi skʼan xal Isaias 41:10

Li Jeovaea jamal yalojbe li tukʼil yajtuneltak ti ta skolta kʼalal tsnuptanik kʼusiuk no’ox vokolale.

«Liʼ jchiʼinojote». Li Jeovae ta xalbe yajtuneltak ti akʼo mu xiʼike, yuʼun mu stukuk oyik. Li Jeovae xakʼ venta li kʼusi yakal tsnuptanike xchiʼuk chaʼibe li s˗orasionike. Xkoʼolaj ti te xchiʼinojan ta jujuntale (Salmo 34:15; 1 Pedro 3:12).

«Voʼon Adiosun». Li Jeovae chakʼbe spatobil yoʼonton li yajtuneltake, yuʼun tsvulesbe ta sjol ti jaʼo Sdiosike xchiʼuk ti lek ta xil ta jujuntale. Kʼusuk ti ta snuptanike xuʼ xchʼunik lek ti ta xchabiatike (Salmo 118:6; Romanos 8:32; Ebreos 13:6).

«Voʼon ta jtsatsubtasot, jech, voʼon ta jkoltaot, ta melel, ta xkikot lek ta jbatsʼikʼob ti tukʼ kʼusi tspase». Sventa xchʼunik lek ti ta xkoltaatik li yajtuneltake, li Jeovae oxkoj to chal ti kʼu yelan chkoltavane. Chalbe skʼoplal skʼob sventa snopbeik skʼoplal ti oy kʼusi tspas kʼalal tskʼanik koltaele. Kʼalal oy buchʼu chyal ta lume, li Diose tsyeʼ talel sbatsʼikʼob, vaʼun ta snit likel (Isaias 41:13).

Jtos ti kʼusi mas ta stunes Dios sventa skolta xchiʼuk tstsatsubtas li yajtuneltake, jaʼ li Vivliae (Josue 1:8; Ebreos 4:12). Yuʼun te chakʼ tojobtaseletik sventa xkuch kuʼuntik kʼalal ta jnuptantik vokoliletike, jech kʼuchaʼal li povreale, li chamele o kʼalal oy buchʼu chcham kuʼuntik ti jkʼanojtik tajeke (Proverbios 2:6, 7). Jech xtok, li Diose ta stunes xchʼul espiritu o yip sventa lekuk kʼusi xkʼot ta nopel yuʼunik li yajtuneltake xchiʼuk sventa mu xbat ta yoʼontonik li svokolike (Isaias 40:29; Lukas 11:13).

Stsʼak loʼil ta Isaias 41:10

Li kʼusi laj yal Jeova ta Isaias 41:10 tun yuʼun sventa spatbe yoʼonton li judaetik ti tukʼ yakʼoj sbaik ti ikʼatik batel ta Babilonia ta mas jelavele. Li Jeovae yaloj xa onoʼox ti kʼalal jutuk xa ox skʼan xlokʼik batel ta Babiloniae, chaʼibeik skʼoplal jun vinik ti tslajesbe skʼoplal Babilonia xchiʼuk li yan jteklumetik ti te nopajtike (Isaias 41:2-4; 44:1-4). Li krixchanoetik ta Babilonia xchiʼuk li lumetik te nopajtike solel chiʼik tajek. Yan li judaetike muʼyuk tsvul yoʼontonik, yuʼun ta xchabiatik yuʼun li Jeovae. Sventa xchʼunik lek ti chchabiatike, oxkoj to laj yal Jeova «mu xaxiʼ» (Isaias 41:5, 6, 10, 13, 14).

Li kʼusi chal Isaias 41:10 jaʼ laj yichʼik albel li judaetik ti tukʼ yakʼoj sbaik ti ikʼatik batel ta Babiloniae, pe li Jeovae laj yakʼ komel ta tsʼibael sventa spatbe yoʼonton skotol li yajtuneltake (Isaias 40:8; Romanos 15:4). Li Jeovae la skolta li yajtuneltak ta voʼnee xchiʼuk jech-o yakal ta spas li avie.