Jenesis 1:26 | «Jpastik krixchano jech kʼuchaʼal voʼotike»

«Xi laj yal li Diose: ‹Jpastik krixchano jech kʼuchaʼal voʼotike, jlokʼoltikuk xbat kuʼuntik. Akʼo spasik ta mantal li choyetik ta nabe, li kʼusitik kuxajtik ti chvilik ta vinajele xchiʼuk li tsʼunbal chonbolometike. Jech xtok, akʼo sventainik spʼejel li balumile xchiʼuk skotol li chonbolometik ti xkilet chanavik ta balumile›» (Jenesis 1:26, Xchʼul Kʼop Dios sventa Achʼ Balumil).

«Tsʼacal to jech laj yal: ‘Jpastic cristiano jech chac c’u cha’al vu’utic; ja’ jloc’ol jq’uexoltic chc’ot. Yu’un ac’o sventainic li choyetique, li mutetique, li chonbolometic ti stac’ ts’unele, xchi’uc ti mu stac’ ts’unele, xchi’uc li chonetic ti xquilet ta banamil chanovique‘, xi» (Jenesis 1:26, Xch’ul C’op Jtotic Dios, ta sk’op Chenalhó).

Li kʼusi skʼan xal Jenesis 1:26

Li krixchanoe laj yichʼ pasel ta slokʼol Dios, jaʼ xkaltik, ti xuʼ xchanbe stalelal Diose. Jech kʼuchaʼal ti snaʼ xkʼanvan, ti xaʼibe xkʼuxul svokol yantik xchiʼuk ti tukʼ kʼusi tspase.

«Xi laj yal li Diose: ‹Jpastik krixchano jech kʼuchaʼal voʼotike›». Kʼalal skʼan toʼox spas kʼusitik li Jeovae,a baʼyel la spas jun tsatsal anjel ti Jesus laj yichʼ ojtikinel ta tsʼakale. Li Jesuse la skolta ta abtel Dios sventa yichʼ «pasel skotol li kʼusitik yantik ta vinajele [xchiʼuk] li kʼusitik ta sba balumile» (Kolosenses 1:16). Li stalelal Jesuse xkoʼolaj xchiʼuk li Jeovae, yuʼun «jaʼ slokʼol li Dios ti mu xvinaj ta kʼelele» (Kolosenses 1:15). Jaʼ yuʼun, li Diose xi laj yalbe li Jesuse: «Jpastik krixchano jech kʼuchaʼal voʼotike».

‹Akʼo spasik ta mantal li tsʼunbal chonbolometike xchiʼuk ti sventainik spʼejel li balumile›. Li chonbolometike mu jechuk laj yichʼik pasel kʼuchaʼal slokʼol li Diose. Jech xtok, muʼyuk stalelalik kʼuchaʼal li krixchanoetike, jech kʼuchaʼal liʼe, muʼyuk snopbenik xchiʼuk mu snaʼ xkʼanvanik. Akʼo mi jech, li Diose oy ta yoʼonton ti lekuk noʼox oy li chonbolometike. Jaʼ yuʼun, laj yalbe krixchanoetik ti ‹akʼo spasik ta mantal skotol li chonbolometike›. Taje xuʼ van xi chichʼ jelubtasele: ‹Ti oyuc ta yoc ta scʼobike› (Xch’ul C’op ti Jtotic Diose, ta sk’op Chamula) o ‹ti ac’o sventainike› (Xch’ul C’op Jtotic Dios, ta sk’op Chenalhó). Ti jech laj yal li Jeovae jaʼ yakal chalbe krixchanoetik ti jaʼ oy ta sbaik xchabiel li chonbolometike (Salmo 8:6-8; Proverbios 12:10). Li Jeovae oy ta yoʼonton ti xichʼ chabiel li balumile xchiʼuk li kʼusitik kuxajtike.

Stsʼak loʼil ta Jenesis 1:26

Li baʼyel chib kapitulo ta Jenesise chalbe skʼoplal ti kʼu yelan laj yichʼ pasel li vinajel balumile xchiʼuk ti kʼuxi lik li kuxlejal ta balumile. Skotol li kʼusitik la spas Jeovae toj labalik sba, pe li krixchanoetike stuk xa noʼox jech ti toj labal sba pasbil li ta balumile. «Kʼalal spasoj xa ox jech li Diose, lek tajek laj yil» (Jenesis 1:31).

Mi chakʼan to chanabe mas yaʼyejal li kʼusi chal Jenesis ta sventa ti kʼu yelan laj yichʼ pasel li kʼusitike, kʼelo li video liʼe.

Li kʼusi mu jechuk chalik ta sventa Jenesis 1:26

Li kʼusi xchʼunoj yantike: Li Jenesis 1:26 chakʼ ta ilel ti jaʼ Dios li Jesuse.

Li kʼusi melele: Li Dios xchiʼuk Jesuse lek tajek xil sbaik, jech kʼuchaʼal jun totil xchiʼuk nichʼonile. Pe maʼuk koʼolik. Li Jesuse chanubtasvan ti jaʼ mas mukʼ skʼoplal li Diose, jaʼ mu sta li stuke (Juan 14:28). Mi chakʼan to chanabe mas yaʼyejale, kʼelo li video ¿Mi jaʼ Dios li Jesukristoe? o chano li mantal «¿Kʼu yuʼun Xnichʼon Dios chichʼ albel li Jesuse?».

Sventa xavaʼibe smelolal kʼusi chal li slivroal Jenesise, kʼelo li video liʼe.