Proverbios 22:6 | «Chanubtaso bu beal skʼan stam batel li kereme»

«Chanubtaso bu beal skʼan stam batel li kereme; vaʼun muʼyuk chkʼejpʼuj lokʼel ta be akʼo mi mol xa ox» (Proverbios 22:6, Xchʼul Kʼop Dios sventa Achʼ Balumil).

«Chanubtasic lec avalab anichʼnabic ti bu beal [skʼan] tstam batele, jech mu scomtsanic o ti cʼalal mol meʼelic xae» (Proverbios 22:6, Xchʼul Cʼop Jtotic Dios, ta skʼop Chenalhó).

Li kʼusi skʼan xal Proverbios 22:6

Li totil meʼiletik ti chchanubtas yalab xnichʼnabik sventa skʼanik xchiʼuk xchʼunbeik smantal li Diose, chtun yuʼunik ta sjunul xkuxlejal li yalab xnichʼnabike.

«Chanubtaso bu beal skʼan stam batel li kereme». Li teksto taje xuʼ xi xichʼ jelubtasel xtoke: «Beiltaso sventa jaʼuk stam batel lekil be». Li slivroal Proverbiose chtijbat yoʼonton li totil meʼiletik ti ta sbikʼtaluk noʼox xlik xchanubtas li yalab xnichʼnabik sventa snaʼik stʼujel li kʼusi leke (Proverbios 19:18; 22:15; 29:15). Li alab nichʼnabiletike xuʼ stʼuj stukik li kʼusi tskʼan tspas ta xkuxlejalike. Akʼo mi jech, li totil meʼiletike skʼan xchanubtasik xchiʼuk skoltaik sventa snaʼuk srasonajik. Taje jaʼ chkoltaatik li alab nichʼnabiletik sventa lekuk kʼusi xkʼot ta nopel yuʼunik kʼalal mi chʼiike xchiʼuk ti spasik li kʼusi sbainojik spasele (Deuteronomio 6:6, 7; Kolosenses 3:21).

Kʼalal chal ta Ebreo «chanubtaso bu beal skʼan stam batel li kereme» xie, junantik buchʼu xchanojbeik skʼoplal Vivliae chalik ti jaʼ la skʼan xal ti xichʼ chanubtasel li jun kerem jech kʼuchaʼal tskʼan yoʼontone. Xuʼ van melel yaʼeluk li kʼusi chalike, pe ti kʼusi van skʼan xale jaʼ ti skʼan chanubtasel sventa lekuk xbat li xkuxlejale. Li slivroal Proverbiose chalbe skʼoplal chib be ti xuʼ stam li jun krixchanoe. June xi chichʼ albele: «sbe li buchʼutik lekike», «sbelel pʼijilal» xchiʼuk «tukʼil be» (Proverbios 2:20; 4:11; 23:19). Li yane xi chichʼ albel xtoke, «sbe li jpaschoplejaletike», «sbe li buchʼu bole» xchiʼuk «chopol be» (Proverbios 4:14; 12:15; 16:29). Jaʼ yuʼun, kʼalal li ‹be skʼan stam batel li kerem› xie, jaʼ skʼan xal li «tukʼil be» chal li Vivliae (Salmo 119:105).

«Vaʼun muʼyuk chkʼejpʼuj lokʼel ta be akʼo mi mol xa ox». Kʼalal chchanubtas yalab xnichʼnabik li totil meʼiletik li ta smantaltak Diose, xuʼ van jaʼ xkoltaatik˗o li alab nichʼnabiletik sventa jaʼ stamik˗o batel li tukʼil bee. Pe taje maʼuk skʼan xal ti muʼyuk xa chikta˗o li Diose, yuʼun mi la xchiʼin li buchʼutik tspasik kʼusi chopole, xuʼ xiktaik li tukʼil bee xchiʼuk jaʼ xlik spasik li kʼusi chopole (Proverbios 2:12-16; 1 Korintios 15:33). Jech oxal, kʼalal chchanubtas yalab xnichʼnabik li totil meʼiletik li ta smantaltak Diose, yakal me tskoltaik sventa lekuk xbat li xkuxlejale (Proverbios 2:1, 11).

Stsʼak loʼil ta Proverbios 22:6

Li ta kapitulo 22 ta slivroal Proverbiose te chal junantik mantaletik ti xuʼ skoltautik sventa jaʼuk jpastik jujun kʼakʼal li kʼusi lek chil Diose. Jech xtok, chal ti skʼan lekuk jkʼoplaltik ta stojolal li Jeovae,a taje tspas kuʼuntik mi bikʼit chkakʼ jbatik, mi lek koʼontontik xchiʼuk mi chkakʼbetik yipale (Proverbios 22:1, 4, 9, 29). Li ta yan versikuloetik xtoke chakʼ ta ilel ti chchapan Dios li buchʼutik mu xchʼunbeik smantal Diose xchiʼuk li buchʼutik chilbajin li buchʼutik abol sbaike (Proverbios 22:8, 16, 22-27).

Akʼo mi maʼuk sjunlej kapitulo 22 ta Proverbios ti chalbe skʼoplal ti kʼuxi xuʼ xchanubtasik li yalab xnichʼnabike, te chal xtok kʼuxi xuʼ lek xkil jbatik xchiʼuk li Diose xchiʼuk jtatik li jun oʼontonale (Proverbios 22:17-19). Li totil meʼiletik ti chchanubtas yalab xnichʼnabik jech kʼuchaʼal chal li Vivliae, chakʼik ta ilel ti tskʼan ti lekuk xbat li xkuxlejal yalab xnichʼnabike (Efesios 6:1-3).

Sventa xavaʼibe smelolal kʼusi chal li slivroal Proverbiose, kʼelo li video liʼe.