Proverbios 16:3 | «Acʼbo sventain Mucʼul Dios scotol li cʼusitic chapase»

«Kʼusiuk noʼox ti chapase akʼbo sventain li Jeovae, vaʼun lek chkʼot ta pasel li kʼusi anopoj chapase» (Proverbios 16:3, Xchʼul Kʼop Dios sventa Achʼ Balumil).

«Acʼbo sventain Mucʼul Dios scotol li cʼusitic chapase, jech lec chbat li cʼusitic chanope» (Proverbios 16:3, Xchʼul Cʼop Jtotic Dios, ta skʼop Chenalhó).

Li kʼusi skʼan xal Proverbios 16:3

Li proverbio taje, chalbe ti buchʼutik chichʼik ta mukʼ li melel Diose, lek chbat yuʼunik ta pasel skotol mi tspat yoʼontonik ta stojolale xchiʼuk mi chchʼunbeik smantale.

«Kʼusiuk noʼox ti chapase akʼbo sventain li Jeovae». Kʼalal oy kʼusi tsnop tspas li jun yajtunel Jeovae,a bikʼit chakʼ sba xchiʼuk tsaʼ li beiltasel yuʼune (Santiago 1:5). ¿Kʼu yuʼun? Yuʼun li krixchanoetike xuʼ oy kʼusi tsots tsnuptanik ta anil ti mu xa kʼusi stakʼ spasike o bateltike oy kʼusi xuʼ snuptanik ti oy to kʼusi stakʼ spasike (Eklesiastes 9:11; Santiago 4:13-15). Jech xtok, xuʼ van mu xtojobik snopel lek li kʼusi snopoj tspasike. Ta skoj taje, ep buchʼutik chakʼik ta ilel ti oy spʼijilik kʼalal jaʼ chakʼbeik sventain Jeova li kʼusi tskʼan tspasike xchiʼuk kʼalal chalbeik li kʼusi oy ta yoʼontonik spasele. Jech ta spasik kʼalal ta skʼanbeik beiltasel Jeova ta orasion xchiʼuk kʼalal jech ta spasik li kʼusi tskʼan yoʼonton li Diose, jaʼ xkaltik, kʼuchaʼal chal li ta Vivliae (Proverbios 3:5, 6; 2 Timoteo 3:16, 17).

Kʼalal chal «acʼbo sventain Mucʼul Diosb scotol li cʼusitic chapase», jaʼ skʼan xal «balalino batel ta stojolal Mukʼul Dios li kʼusitik chapase». Oy jlik livro chalbe skʼoplal ti jaʼ la kʼalal «ta jyalestik li kʼusi jkuchojtik batele, vaʼun ta jbalalinbetik batel Dios ti mu kʼusi ol chaʼie». Li buchʼutik manxoike xchiʼuk ti tspat yoʼontonik ta stojolal Diose, xuʼ xchʼunik lek ti chkoltaatike xchiʼuk ti ch˗ikatike (Salmo 37:5; 55:22).

Kʼalal ta xal «kʼusiuk noʼox ti chapase», maʼuk skʼan xal ti lek ta xil Dios o ti chakʼbe bendision skotol li kʼusitik tskʼan tspas li jun krixchanoe. Sventa lek ta xil li Jeovae oy kʼusi chaʼtos skʼan spas: skʼan jechuk oy ta yoʼonton li Diose xchiʼuk ti jechuk spas kʼuchaʼal chal li smantale (Salmo 127:1; 1 Juan 5:14). Pe li Diose muʼyuk ta xakʼbe bendision li buchʼutik muʼyuk chchʼunik mantale. Xi ta xal li Vivliae: «Li buchʼutik toj chopolike chtuchʼbe ta be li kʼusi snopoj tspasike» (Salmo 146:9). Pe jech xtok, chal ti tskolta li buchʼutik chakʼ sbaik ta beiltasele xchiʼuk ti ta xchʼunbeik li smantaltak ta Vivliae (Salmo 37:23).

«Vaʼun lek chkʼot ta pasel li kʼusi anopoj chapase». Oy Vivliaetike chal «lec chbat li cʼusitic chanope» o «ta xcʼot ta pasel ti cʼusi anopoje». Li ta Tsʼibetik ta Ebreo kʼop ti ojtikinbil xtok, kʼuchaʼal Poko Testamentoe, li jpʼel kʼop ti jelubtasbil ta tsotsil kʼuchaʼal, «lek chbat o ta xkʼot ta pasel» xiʼe, jaʼ chakʼ ta aʼiel ti «oy lek snakleb akʼbile» xchiʼuk ep ta velta jaʼ chalbe skʼoplal ti lek snakleb o ti lek la spas li spasbentake Diose (Proverbios 3:19; Jeremias 10:12). Jech xtok, li Diose tskolta sventa xkʼot ta pasel li kʼusi tsnop tspas li buchʼu chchʼunbe smantale xchiʼuk tskolta sventa lekuk noʼox xkuxlejalik xchiʼuk junuk yoʼontonik (Salmo 20:4; Proverbios 12:3).

Stsʼak loʼil ta Proverbios 16:3

Jutuk mu skotoluk li slivroal Proverbiose jaʼ la stsʼiba li ajvalil Salomone, jech kʼuchaʼal li ta Proverbios 16:3. Koliyal li spʼijil akʼbil yuʼun Diose, la stsʼiba ta smilal noʼox proverbioetik (1 Reyes 4:29, 32; 10:23, 24).

Ta slikebal li kapitulo 16, li Salomone tskʼupil kʼoptabe li spʼijil Diose xchiʼuk chakʼ ta ilel ti tspʼaj tajek jtoybaetik li Jeovae (Proverbios 16:1-5). Ta mas jelavel jutuk li ta kapitulo taje, li buchʼu tskʼele oy kʼusi chakʼbe snop ti ep ta velta jech chvinaj li ta slivroal Proverbiose. Jaʼ liʼe: li krixchanoetike jaʼ noʼox xuʼ sta spʼijilik ta melel xchiʼuk xuʼ lek chbat xkuxlejalik, mi bikʼit chakʼ sbaik xchiʼuk mi chakʼ sbaik ta beiltasel yuʼun li Diose (Proverbios 16:3, 6-8, 18-23). Taje, ep ta velta jech chalbe skʼoplal li ta Vivliae (Salmo 1:1-3; Isaias 26:3; Jeremias 17:7, 8; 1 Juan 3:22).

Sventa xavaʼibe smelolal kʼusi chal li slivroal Proverbiose, kʼelo li video liʼe.