Salmo 37:4 | «Jaʼ noʼox acʼo avoʼnton o ta stojol li Mucʼul Diose»

«Kʼupiluk tajek xavaʼi ti chatun ta stojolal Jeovae, vaʼun chakʼbot li kʼusi tskʼan avoʼontone» (Salmo 37:4, Xchʼul Kʼop Dios sventa Achʼ Balumil).

«Jaʼ noʼox acʼo avoʼnton o ta stojol li Mucʼul Diose, jech jaʼ chayacʼbot li cʼusi oy ta avoʼnton chacʼanbee» (Salmo 37:4, Xchʼul Cʼop Jtotic Dios, ta skʼop Chenalhó).

Li kʼusi skʼan xal Salmo 37:4

Li jtsʼibajom yuʼun Salmoe, tstijbe yoʼontonik ti skotol li buchʼu chichʼik ta mukʼ Diose ta muyubajeluk spasik. Kʼalal lek tajek xkil jbatik xchiʼuk li Jeovaea ta xakʼbutik li kʼusi ta jkʼanbetike.

«Kʼupiluk tajek xavaʼi ti chatun ta stojolal Jeovae». Li kʼusi chal liʼe, xuʼ xi chichʼ jelubtasele: «Jaʼuk xamuyubaj-o tajek ta stojolal li Jeovae» o «jaʼ noʼox akʼo avoʼonton ta stojolal li MUKʼUL DIOSE». Jaʼ xkaltik, ti jaʼ noʼox chakʼ jmuyubajeltik kʼalal chkichʼtik ta mukʼ li melel Diose (Salmo 37:4, nota). ¿Kʼu yuʼun?

Li buchʼutik chichʼik ta mukʼ Diose tspasik li kʼusi lek chile, mu baluk noʼox chaʼiik ti xojtikinik Jeovae, yuʼun chakʼik persa xtok ta xchʼunbel smantaltak. Vaʼun, sak noʼox li sjol yoʼontonike xchiʼuk muʼyuk tsta svokolik (Proverbios 3:5, 6). Jun skʼelobile, yuʼun akʼo mi lek noʼox yilel xbat xkuxlejalik li buchʼutik jaʼ noʼox tspasik li kʼusi tskʼan yoʼontonike, mu me xlik jkʼantik o ti jchanbetik stalelalike (Salmo 37:1, 7-9). Li yajtuneltak Diose snaʼojik onoʼox ti tsta yorail chakʼbe slajeb choplejal li Jeovae xchiʼuk ti chakʼbe smoton li buchʼutik tukʼ chtunik ta stojolale xchiʼuk ti lek chakʼ ta ilel stalelalike (Salmo 37:34). Jech xtok, ch˗akʼbatik tajek muyubajel ti snaʼojik ti lek ch˗ilatik yuʼun li Diose (Salmo 5:12; Proverbios 27:11).

«Chakʼbot li kʼusi tskʼan avoʼontone». Li kʼusi chal liʼe, xuʼ xi chichʼ jelubtasele: «Li stuke chakʼbot li kʼusi chakʼanbee» o «chakʼbot li kʼusi oy ta avoʼonton staele». Pe taje, maʼuk me skʼan xal ti chakʼbotik skotol Jeova li kʼusi ta jkʼanbetike. Yuʼun jech kʼuchaʼal jun totile, snaʼoj lek li kʼusi chakʼbe li xnichʼnabe. Jaʼ yuʼun, mi oy kʼusi ta jkʼanbetike, jaʼuk me jech jkʼanbetik jech kʼuchaʼal chal ta smantale xchiʼuk li kʼusi lek chaʼi stuke (Proverbios 28:9; Santiago 4:3; 1 Juan 5:14). Mi jaʼ jech la jpastike, jnaʼojtik ti xuʼ xijnopaj ta stojolale xchiʼuk xuʼ jpat koʼontontik ti ta onoʼox xaʼi li j˗orasiontike (Salmo 65:2; Mateo 21:22).

Stsʼak loʼil ta Salmo 37:4

Li Salmo 37 jaʼ la stsʼiba li ajvalil David li ta voʼneal Israele. Lek xcholet la stsʼiba kʼuchaʼal li sletrailtak ta Ebreoe (acróstico).b

Li Davide ep tajek laj yil svokol, yuʼun li ajvalil Saul xchiʼuk li yan krixchanoetike tskʼan ox ta smilik (2 Samuel 22:1). Akʼo mi jech, li Davide spatoj˗o tajek yoʼonton ta stojolal li Diose, yuʼun snaʼoj lek ti tsta yorail chchapan li chopol krixchanoetike (Salmo 37:10, 11). Jech xtok, akʼo mi lek xbat xkuxlejalik yilel li buchʼutik chopolike, xkoʼolajik noʼox kʼuchaʼal uni vomol ti unin toe, yuʼun tsta yorail ti chnukultajike, jaʼ xkaltik ti tsta onoʼox yorail chlaj skʼoplalike (Salmo 37:2, 20, 35, 36).

Li Salmo 37 chakʼ ta ilel kʼusi chkʼot ta stojolal li krixchanoetik ti chchʼunbeik smantal Diose xchiʼuk li buchʼutik mu xchʼunbeike (Salmo 37:16, 17, 21, 22, 27, 28). Jaʼ yuʼun, li Salmo liʼe tskoltautik sventa jta jpʼijiltik xchiʼuk ti jaʼuk jech jpas jtalelaltik jech kʼuchaʼal lek chil li Diose.

Sventa xavaʼibe smelolal kʼusi chal li slivroal Salmose, kʼelo li video liʼe.