Ta jtabetik sbalil jkotoltik li Chanob vun sventa Galaade

Jujun jabil li buchʼutik ch-abtejik ta tsʼakal ora ta spʼejel balumile, chbatik li ta Chanob vun sventa Vivlia ta Galaad yuʼun Watchtower ti te chjelav ta Snail Chanob vun yuʼun Watchtower ta Patterson (Nueva York).a Li ta chanvune li jchanunetike chchanik lek spasel li yabtelik li ta s-organisasion Jeovae. Chchanubtasatik sventa skoltaik li tsobobbailetike xchiʼuk li Beteletik ta spʼejel balumile.

Oy ta spʼejel balumil li Chanob vun sventa Galaade. Jun skʼelobile, li chanvun 147 ti tsuts ta 2019 ay 56 jchanunetik ti likemik tal 29 lumetike. Li buchʼutik ayik ta chanune chtunik xa onoʼox ta tsʼakal ora. Ti jaʼik jbetelitaetik, misioneroetik, prekursor espesialetik o jkʼelvanejetik ta sirkuito.

Kʼalal muʼyuk toʼox xlik li chanune oy xa onoʼox kʼusi laj yichʼ chapanel. Jun skʼelobile, jaʼ li chanvun 147. Li Departamento de Viajes li ta smeʼ nail abtelale la sman li voleto sventa li jchanunetike. Te van 21, 400 (1,075 dólares) la stojik sventa xtal xbat li jujun jchanune. Li jchanunetik ta islas Salomone chankot to avion la stsakik sventa xkʼotik li ta Patterson xchiʼuk oxkot avion la stsakik sventa sut echʼel ta snaike. Mas ta 35, 400 kilometro xanavik ta skotole. Li stojol li svoletoik ta jujuntale mas ta 45, 000 (2.300 dólares). Sventa mu xichʼ lajesel mas takʼine, li Departamento de Viajese tstunes jun programa sventa saʼ mi oy mas yalem li voletoetike. Pe akʼo mi smanojik xa ox li voletoe, ta to onoʼox saʼik ti bu mas yaleme. Li Departamento de Viajese tstunes li créditos de aerolínea o li millas de viajero frecuente ti tskʼelan li ermanoetike.

Li jchanunetike ep buchʼutik chtun yuʼunik visa sventa xjelavik echʼel li ta Estados Unidose. Jaʼ yuʼun, li Departamento de Asuntos Legales li ta smeʼ nail abtelale la skolta li jchanunetik sventa slokʼes li svisaike. Sventa slokʼesik li visae te van 10,000 peso stojol (510 dólares) jujun krixchano.

¿Kʼuxi tskoltautik li chanubtasel chichʼik li jchanunetike? Li Hendra Gunawan ti chtun kʼuchaʼal mol ta tsobobbail ta Sureste Asiaticoe laj yal ti te kʼot jun nupultsʼakal ti ayemik ta chanun ta Galaade, xi chale: «Kʼalal muʼyuk toʼox talem li nupultsʼakale, muʼyuk toʼox junuk prekursor regular li ta tsobobbaile. Pe kʼalaluk vulike la stijbeik yoʼonton yantik sventa x-ochik ta prekursor. Ta mas tsʼakale, oy jun ermana ti ay li ta Chanob vun sventa j-al lekil aʼyejetik yuʼun Ajvalilal yuʼun Diose».

Li Sergio Panjaitan ti te ch-abtej ta Betel ta Sureste Asiaticoe, ch-abtej xchiʼuk junantik ermanoetik ti ayemik ta chanun ta Galaade. Xi chale: «Li chanubtasel laj yichʼik li ermanoetike, maʼuk noʼox tstabe sbalil stukik, yuʼun ta jbekutik sbalil ek. Ep kʼusitik la xchanik, pe maʼuk xa tstoy-o sbaik, yuʼun chakʼik ta chanel li kʼusi xchanojike. Taje tspat koʼontonkutik xchiʼuk xuʼ jpatbekutik yoʼonton li yantik eke».

¿Bu tstaik li takʼin sventa li chanob vun taje? Jaʼ te chlokʼ li ta matanal takʼin sventa li abtelal ta spʼejel balumile. Li matanal takʼinetik taje ep ta tos kʼuxi ta akʼel li ta donate.jw.org. Koliyal li matanal takʼin chakʼ ta sjunul yoʼontonike, xuʼ xichʼ pasel li chanun taje.