Li misioneroetike chkʼotik «kʼalal to ta namal balumil»

Li Jesuse xi laj yalbe li yajchankʼoptake: «Chavalik batel jkʼoplal [...] kʼalal to ta namal balumil» (Echos 1:8). Li stestigotak Jeova avie ta sjunul yoʼonton chakʼik persa sventa xkʼot ta pasel li kʼusi laj yal Jesuse. Akʼo mi jech, oy to bu muʼyuk cholbil mantal li ta spʼejel balumile, jech kʼuchaʼal liʼe, li ta lumetik ti mukʼtik tajeke xchiʼuk ti ep jnaklejetik tee. Jech xtok, ta junantik lume juteb li testigoetike (Mateo 9:37, 38). ¿Kʼusi chichʼ pasel sventa xichʼik cholbel mantale?

Sventa xkʼot ta pasel li kʼusi laj yal Jesuse, li Komite sventa Cholmantal yuʼun li Jtsop Jbeiltasvanej yuʼun stestigotak Jeovae tstak batel misioneroetik ti bu mas chtun koltaele. Li avie, oy 3,090 misioneroetik ti chkoltavanik ta spʼejel balumile.a Jutuk mu skotolikuk ayemik ta junuk chanob vun, jech kʼuchaʼal li ta Chanob vun sventa j-al lekil aʼyejetik yuʼun Ajvalilal yuʼun Diose. Li misioneroetik taje ta sjunul yoʼonton yiktaoj snaik xchiʼuk batemik ta yan lum. Ti yijik ta mantal, ti yichʼojik lek chanubtasele xchiʼuk ti jal xa tunemik tale jaʼ koltabilik sventa xcholik batel li lekil aʼyejetike xchiʼuk ep kʼusitik chchan yuʼunik li achʼ jcholmantaletike.

Chichʼ koltael li misioneroetike xchiʼuk tskoltaik yantik ek

Ta jujun Betele, li ermanoetik ti tskʼelik li buchʼutik chtunik ta tsʼakal ora li ta Departamento sventa Cholmantale ch-abtej xchiʼuk li Komite ta Betel sventa skoltaik li misioneroetik li ta kʼusitik chtun yuʼunike. Tsabat yuni nailalik, chchabiatik kʼalal ch-ipajike xchiʼuk ch-akʼbatik juteb uni takʼin sventa saʼik li kʼusitik jtunel yuʼunike. Li cholmantal ti lik ta septiembre ta 2019 kʼalal ta agosto 2020, li stestigotak Jeovae lajem yuʼunik jutuk mu 27 miyon dolar (li ta jtakʼintike mas ta 500 miyon) sventa skoltaik li misioneroetike. Koliyal ti vaʼ yelan chichʼik koltaele, li misioneroetike jaʼ mas chakʼ ta yoʼontonik xchiʼuk chakʼ yipalik li ta cholmantale. Jech xtok, jaʼ sventa skoltaik li tsobobbailetik bu chkoltavanike.

¿Kʼuxi chkoltavanik ta cholmantal li misioneroetike? Frank Madsen jun li ta Komite ta Betel te ta Malauie, xi chale: «Ti tsots yoʼontonike xchiʼuk ti lek xtojobike, li misioneroetike skoltaojik li tsobobbailetik sventa xcholik mantal ti bu vokol ta cholel mantale, jech kʼu chaʼal li ta parajeetik ti muʼyuk buchʼu mas xuʼ x-ochik tee xchiʼuk li krixchanoetik ti jelel skʼopike. Jech xtok, chakʼik persa xchanel li stalel xkuxlejalike xchiʼuk xchanbel li skʼopike, ti jech tspasik taje lek kʼusi chakʼik ta chanel. Maʼuk noʼox taje, yuʼun tstijbe yoʼonton kerem tsebetik sventa xtunik ta tsʼakal ora. Ta jtojbetik tajek ta vokol Jeova ti chkoltavanik li misioneroetike».

Jun Komite ta Betel ta yan lume, xi chale: «Li misioneroetike jaʼ jun slekil kʼelobil ti stestigotak Jeovae jaʼik jun jteklum ta spʼejel balumil ti jmoj tsobolike. Li buchʼutik maʼukik stestigotak Jeovae yakʼojik venta ti muʼyuk chchʼakutik akʼo mi jelel jlumaltike. Li kʼusi ta jchantik ta Vivliae jaʼ tskoltautik sventa jmoj tsobolutik ta spʼejel balumil».

¿Kʼuxi tskoltaik jcholmantaletik li misioneroetike? Paulo ti te likem ta Timor orientale, tstoj tajek ta vokol li yabtel tspasik li misioneroetik te ta stsobobbaile, xi chale: «Ti bu nakalunkutike kʼixin tajek, akʼo mi ta sikil osil likemik tal li misioneroetike, muʼyuk ta xiktaik cholmantal akʼo mi kʼixin tajek. Muʼyuk chikta sbaik jsetʼuk li ta tsobajeletik sventa cholmantal ta jujun sobe xchiʼuk ep ta veltae chkom spasik revisita kʼalal to ta oʼlol kʼakʼal kʼuk chaʼal mi solel kʼixin ta jyalel. Jech xtok, chcholik to mantal ta mal kʼakʼal. Epal krixchanoetik skoltaojik ta yojtikinel li kʼusi melele, te tsakal jkʼoplal ek. Ta sjunul yoʼontonik chtunik ta stojolal Jeova, taje jaʼ chtijbat-o yoʼontonik sjunul li tsobobbail sventa baxboluk xtunik ta stojolal Dios eke».

Ketti ti jaʼ jun prekursora regular ta Malauie, chal kʼu yelan koltabil yutsʼ yalal yuʼun jun nupultsʼakal ti jaʼik misioneroetike: «Kʼalal talik ta jtsobobbailkutike, jtuk toʼox stestigoun Jeova li ta kutsʼ kalale. La skoltaikun tajek xchiʼuk laj yamigoinik sjunlej li kutsʼ kalale, li kalabe jaʼ to te yakʼik venta ti jaʼ noʼox xuʼ xijmuyubaj mi chijtun ta stojolal Jeovae. Ta skoj li slekil talelalike li oxvoʼ jtsebetake jaʼik xa prekursora regularetik xchiʼuk li jmalale lik xa kʼotuk ta tsobajeletik».

¿Bu chlokʼ talel li takʼin sventa xichʼ koltael li misioneroetike? Jaʼ te chlokʼ tal li ta matanal takʼin chichʼ akʼel li ta spʼejel li balumile. Ep buchʼutik jaʼ te tstakik batel li ta donate.jw.org. Kolavalik tajek ti oy jech ta avoʼonton chavakʼike.