Jlik livro ti stuk noʼox jech sventa jchantik li Vivliae

Li ta enero ta 2021, li Jtsop Jbeiltasvaneje laj yal ti chlokʼ jlik achʼ livro sventa xichʼ chanel li Vivliae, xi sbie: K’upino akuxlejal.a ¿Kʼu yelan laj yaʼiik ermanoetik kʼalal laj yichʼ alel taje? Xi laj yal Matthew ta Canadae: «¡Mu jchʼun laj kaʼi!, kʼalal laj kaʼi li diskursoetik xchiʼuk laj kil li videoetik ti chal kʼu yuʼun chlokʼ li livro taje xchiʼuk ti pasbil xa preva ta cholmantale, limuyubaj tajek. ¡Ta jkʼan xa kaʼi ta jkʼel xchiʼuk ti xlik xa noʼox jtunese!».

Li achʼ livro liʼe jelel xa kʼu yelan ti chkakʼtik-o chanubtasel ta Vivliae. Pe oy to yan ti kʼusi jelel-o xchiʼuk li livroetik ti la jtunestik toʼox sventa yakʼel estudioe. Mi oy xa jlikuk avuʼun li achʼ livro taje, xuʼ van laj xa avil ti oy kʼusitik jelel-oe. ¿Mi chakʼan chanaʼ kʼusi? Jaʼ ti kʼu yelan laj yichʼ pasel li livro K’upino akuxlejale.

Jlik livro ti jelel laj yichʼ pasele

Mas pim svunal. Sventa xichʼ pasel li livro K’upino akuxlejale, skʼan mas pim xichʼ tunesel li vune. ¿Kʼu yuʼun? Yuʼun li livro liʼe yichʼoj mas ta 600 lokʼoletik ti lek kʼupilik sba skolorale. Lajuneb to velta mas ep yichʼoj tal lokʼoletik kʼuchaʼal li livro Chchanubtasvane. Jech xtok, oy ep xokajtik ti chʼabal sletrailtak o ti chʼabal slokʼoltake. Vaʼun kʼalal jeche, tsots jutuk un, yuʼun xuʼ van xkiltik ta yan pajina li lokʼoletike. Kʼalal joy tajek li svunale, xuʼ van xkiltik li lokʼol li ta pajina chtale, manchuk mi uni jutuk. Sventa mu jechuk xkʼot ta pasele, li ermanoetik ta Departamento Internacional de Impresión ta Wallkill, Nueva Yorke, la spasik preva chantos vunetik ti yichʼoj xa onoʼox tunesel ta j-imprentatike. Li Komite sventa Stsʼibael vunetik yuʼun li Jtsop Jbeiltasvaneje la skʼelik lek tajek, vaʼun la stʼujik jtos vun ti mas pim ti mu xvinaj li lokʼoletik ta yan pajina chtale. Melel onoʼox chaʼa, li vun la stʼujik taje, 16% mas toyol stojol kʼuchaʼal li yan vunetik ti ta onoʼox jtunestike. Akʼo mi jech, mas to tskʼupinik xchanel yuni vunik li buchʼutik chichʼ s-estudioike, yuʼun mu xvinaj li lokʼoletik ti oy ta yan pajinae.

Li xpix spate. Li spat li livro K’upino akuxlejale jelel ta aʼiel kʼalal ta jpiktike. Yuʼun li xpix spate yichʼoj jtos laminado ti stuk noʼox jeche. Li spat yan livroetike xjapapet xvinaj, pe li mate yichʼoj liʼe jaʼ sventa masuk to lek xvinaj li lokʼoletike. Jech xtok, li laminado yichʼoj li livro liʼe, jaʼ chkoltavan sventa masuk jal jpiktik. Melel onoʼox, li laminado mate laj yichʼ tunesel liʼe, mas toyol stojol, voʼob to velta xjelav stojol kʼuchaʼal li yantik ti xjapapet xvinaje. Jaʼ yuʼun, oy jayibuk Beteletik jmoj abtejik sventa masuk yalel stojol xlokʼ li laminado tstunesike.

Vaʼun chaʼa, mi mas toyol stojole, ¿kʼu yuʼun jaʼ chichʼ tunesel taje? Xi chal jun ermano ti te ch-abtej ta Departamento Internacional de Impresione: «Ta skoj ti jal tajek chichʼ tunesel li livroe, ta jkʼantik ti lekuk-o xvinaje». Li Eduardo ti te ch-abtej ta Oficina ta Imprenta ta Betel ta Brasile, xi chal eke: «Xijmuyubaj tajek ti tstunes lekil materialetik li organisasion ta sventa li jun livro ti toj alakʼ sbae, ti jal xkuch yuʼune xchiʼuk ti lek chichʼ tunesel li matanal takʼine».

Mas vokol laj kaʼitik ti xichʼ pasel imprimir vunetik ta skoj li COVID-19

Lik yichʼ pasel imprimir li livro K’upino akuxlejal ta marso ta 2021. Jaʼo kʼalal likem xa ox li COVID-19, jaʼ yuʼun toj ep kʼusitik lijmak-o. Mu stakʼ xlokʼik ta Betel li ermanoetik ti te chtunike xchiʼuk mu stakʼ x-ochik tal yan ermanoetik sventa xkoltavanik ta spasel li abtelal ta imprentae. Xchiʼuk mi jaʼuk xuʼ x-och achʼ ermanoetik ta Betel. Jaʼ yuʼun, ta jlom Beteletike muʼyuk buchʼu xu‘ xkoltavan, ta jlom imprentaetik xtoke laj yich‘ makel ta skoj ti jech laj yal mantal li ajvalile.

¿Kʼusi stak‘ pasel ta skoj taje? Kʼalaluk xuʼ xa ox xichʼ pasel imprimire, laj yichʼ albel yan betelitaetik ti yan-o departamento bu ch-abtejik sventa skolta sbaik ta spasel imprimir li vunetik ti te noʼox kʼuk sjalil chkoltavanike. Li Joel ti te ch-abtej ta Departamento Internacional de Impresione, xi chale: «Li slekil yoʼontonik xchiʼuk ti oy ta yoʼontonik xchanel kʼusitik achʼe, jaʼ koltavan sventa stsuts kuʼunkutik li abtelale».

Akʼo mi ep kʼusitik makvan, ta smiyonal xa noʼox yichʼoj pasel imprimir li livro K’upino akuxlejal. Ep ta tos materialetik yichʼoj tunesel, jech kʼuchaʼal planchas de impresión, laminado, vun, tinta xchiʼuk spakʼobil. Li baʼyel voʼob u ti lik yichʼ pasel tal imprimire, laj xa mas ta 2.3 miyon dolar sventa xichʼ manel li materialetik taje. Jaʼ yuʼun, sventa jtsʼintik jutuk li takʼine chkakʼ kipaltik ti jaʼuk noʼox xichʼ pasel imprimir li livroetik ta sventa li tsobobbailetik ti ta melel chtun yuʼunike.

«Stuk xa noʼox jech ti kʼu yelan pasbile»

¿Kʼu yelan chaʼi sbaik li buchʼutik chakʼik chanubtasele xchiʼuk li buchʼutik chichʼik chanubtasel kʼalal tstunesik li achʼ livroe? Xi chal jun ermano ta Australia ti Paul sbie: «Ta jkʼupin tajek stunesel li livro sventa xkakʼ chanubtasel ta Vivliae. Toj alakʼ sba xchiʼuk toj kʼupil sba ta chanel, jamal tajek ta xal li mantale, chkʼot ta koʼontontik li sjakʼobiltake, li videoetike, li lokʼoletike, li tavlaetike xchiʼuk chal ti kʼusi skʼan spas li buchʼu chchanunaje. Stuk xa noʼox jech ti kʼu yelan pasbile. Ta jkʼan ti masuk to xitojob ta jchanubtasvanej yuʼune».

Xi chal jun vinik ta Estados Unidos ti yakal chichʼ estudioe: «Ta jkʼupin tajek li achʼ livroe. Li lokʼoletike tskoltaun sventa xkaʼibe smelolal li kʼusitik tsotsik skʼoplale. Jech xtok, li videoetike chkʼot ta koʼonton xchiʼuk tskoltaun sventa xkakʼ ta jkuxlejal li kʼusitik ta jchane». Li buchʼu chichʼ s-estudio liʼe, chkʼot ta skotol tsobajeletik xchiʼuk chib velta ta xemana chichʼ s-estudio.

Ta smiyonal to skʼan pasel imprimir ta jeltos kʼopetik li livro liʼe. Jech, li Jtsop Jbeiltasvaneje yaloj ti chichʼ pasel imprimir ta 710 jeltos kʼopetike, 340 mas ta jeltos kʼopetik kʼuchaʼal lokʼ toʼox li livro Chchanubtasvane.

¿Bu chichʼ tael li takʼin sventa xichʼ pasel li livroetik taje? Jaʼ li ta matanal takʼin ti chichʼ akʼel ta sventa li abtelal ta spʼejel balumile. Ep li matanal takʼin taje te chichʼ akʼel ta donate.jw.org. Toj ep sbalil chkilkutik li matanal takʼin chavakʼike. Koliyal ti jech chapasike, xuʼ xichʼ pasel vunetik sventa xchanik Vivlia li krixchanoetik ti tskʼan chojtikinik li Jeovae xchiʼuk ti tskʼan tskʼupinik li kuxlejal ta sbatel osile (Salmo 22:26).