Mierkoles 16 yuʼun julio
Snaʼoj Jeova ti muʼyuk sbalil li kʼusitik tsnopik li buchʼu pʼijike (1 Kor. 3:20).
Mu me stakʼ ti lek xa chkiltik ti kʼu yelan tsnop krixchanoetike. Mi jech lik jnoptik kʼuchaʼal li buchʼutik muʼyuk chtunik ta stojolal Jeovae, xuʼ me xkiktatik li Jeovae xchiʼuk ti mu xa jchʼunbetik li smantaltake (1 Kor. 3:19). Yuʼun «li pʼijilal liʼ ta balumile» tstij koʼontontik ta spasel li kʼusi ta jkʼan jtuktike. Kalbetik skʼoplal li kʼusi kʼot ta pasel ta tsobobbail ta Pergamo xchiʼuk ta Tiatirae. Junantik yajtsʼaklomtak Kristoe jech lik snopik kʼuchaʼal li krixchanoetik ta skʼakʼalilike, ti chmulivajike xchiʼuk ti chichʼik ta mukʼ jecheʼ diosetike. Li Jesuse laj yalbe mantal li chib tsobobbail ta skoj ti lek chilik li mulivajele (Apok. 2:14, 20). Li avie, xuʼ van jech xa xlik jnoptik kʼuchaʼal li krixchanoetik eke. Oy van kutsʼ kalaltik xtok o kamigotaktik ti tstij koʼontontik sventa jpastik li kʼusi ta jkʼantike ti jaʼ xa mu jchʼunbetik smantal li Jeovae. Xuʼ van xalbutik ti muʼyuk chopol ti jpastik li kʼusi tskʼan koʼontontike xchiʼuk ti muʼyuk xa la chtun kuʼuntik li kʼusi chal Vivliae. Bakʼintike, xuʼ van jnoptik ti skʼan to sjambe lek smelolal Jeova li mantaletik chakʼe o ta van jkʼan to chkakʼbetik stsʼak li kʼusi te tsʼibabil ta Vivliae (1 Kor. 4:6). w23.07 16 par. 10, 11
Jueves 17 yuʼun julio
Li melel amigoile skotol ora chakʼ ta ilel ti chkʼanvane xchiʼuk jaʼ jchiʼiltik ta vokʼel chkʼot kʼalal oy jvokoltike (Prov. 17:17).
Li Maria ti jaʼ smeʼ Jesuse skʼan tsatsubtasbel yoʼonton, yuʼun chʼabal to malijem. Mu snaʼ kʼuxi ta tsʼitesel junuk olol, pe jaʼ ta stsʼites li Mesiase. Muʼyuk xchiʼinoj-o ta vayel mi junuk vinik xchiʼuk mu snaʼ kʼuxi chalbe Jose ti oy xa yole (Luk. 1:26-33). ¿Bu la sta stsatsal yoʼonton li Mariae? La skʼanbe koltael li yantike. Jun skʼelobile jaʼ ti laj yalbe Gabriel ti akʼo to x-albat li kʼusi tskʼan Jeova akʼo spase (Luk. 1:34). Ta mas tsʼakale, bat ta vitstikaltik ta Juda sventa xbat svulaʼan li Elisabete. Li Elisabete la skʼupil kʼopta li Mariae xchiʼuk koliyal li xchʼul espiritu Diose laj yal jun albil kʼop ta sventa li sneneʼ Mariae (Luk. 1:39-45). Li Mariae laj yal ti Jeovae toj labalik sba kʼusitik spasoj ta sjuʼel (Luk. 1:46-51). Li Jeovae la stunes Gabriel xchiʼuk Elisabet sventa stsatsubtas li Mariae. w23.10 14, 15 par. 10-12
Viernes 18 yuʼun julio
Jaʼ laj yakʼ ochkutik ta ajvalil xchiʼuk sventa xijkʼot ta yajpale li Sdios xchiʼuk ti jaʼ Stote (Apok. 1:6).
Li 144 mil ti yichʼojik tʼujel ta chʼul espiritue lek xil sbaik xchiʼuk li Jeovae. Li jtsop krixchanoetik taje koʼol chtunik ta paleal xchiʼuk li Jesus ta vinajele (Apok. 14:1). Avi ti liʼ to oyik ta balumile laj yichʼik tʼujel ta xchʼul espiritu Dios xchiʼuk chkʼotik kʼuchaʼal xnichʼnabtak. Li Chʼul Kuartoe jaʼ smelolal ti lek tajek xil sbaik xchiʼuk li Diose (Rom. 8:15-17). Li Batsʼi Lekil Chʼul Kuartoe jaʼ smelolal vinajel ti jaʼ te nakal li Jeovae. Li kortina ti jaʼ xchʼakoj li Chʼul Kuartoe xchiʼuk li Batsʼi Lekil Chʼul Kuartoe jaʼ skʼan xal li sbekʼtal Jesuse. Li sbekʼtale jaʼ toʼox chmakat-o sventa mu xbat ta vinajel sventa x-och li ta mero lekil Bankilal Pale li ta templo ta mantale. Kʼalal laj yakʼ ta matanal sbekʼtal li Jesuse, xuʼ xa ox xmuyik ta vinajel li buchʼutik tʼujbilik ta chʼul espiritue. Sventa staik li matanal taje, li buchʼutik tʼujbilike mu stakʼ xmuyik xchiʼuk li sbekʼtal stakopalike (Ebr. 10:19, 20; 1 Kor. 15:50). w23.10 28 par. 13