Yaʼyej jcholmantaletik

La stabe sbalil xkuxlejal

LI Jesuse laj yal ti xojtikin li yuni chijtake (Juan 10:14). Mi oy jun krixchano ti lek yoʼonton, ti tskʼan oyuk lekilal xchiʼuk tukʼilal li ta balumile tskʼan ta xchiʼinan li yajtsʼaklomtak Jesuse. Vaʼun, oy xa sbalil chaʼi li xkuxlejale, taje jaʼ jech kʼot ta stojolal jun ants ta Bélgica. Xi chal li sloʼil xkuxlejale:

«Jun veltae la stijik stiʼ jna li stestigotak Jeovae, jaʼo ipun ta at˗oʼonton xchiʼuk ta jkʼan ox ta jmil jba. Toj lek laj kaʼi kʼalal laj yalbeikun ti oy xchapanobil li kʼusitik chopol chkʼotanuk ta pasel liʼ ta balumile, pe li kʼusi muʼyuk lek laj kaʼie jaʼ kʼalal laj yalbeikun ti jaʼ la ta xchapan li Diose. Yuʼun ta skoj li kʼusitik chopol laj kil tspasik ta chʼulna leʼ xa ta xvaxakibal jabile, laj kikta. Yuʼun chʼabal lek ta xkil li kʼusitik ta spasike. Pe laj kakʼ venta ti jaʼ melel li kʼusitik chalik li stestigotak Jeovae xchiʼuk laj kaʼibe smelolal ti skʼan xkojtikin li Diose.

»Oy jayibuk velta li loʼilajkutik xchiʼuk li stestigotak Jeovae, pe muʼyuk xa la staikun ta saʼel ta tsʼakal. Lajemun tajek laj kaʼi. Chib cajetilla ta kʼakʼal chlaj kuʼun li sikʼolale, lik jtunes droga xtok. Ta skoj ti oy ta koʼonton ta jchiʼin ta loʼil li j-anima mukʼtote, la jtikʼ jba ta espiritista. ¡Laj kil tajek jvokol yuʼun! Li ta akʼobaltike, kʼalal jtuk tajek chkaʼi jbae, xkaʼi kʼu yelan ta xilbajinikun li pukujetike. Jech la spasbeikun jayibuk u. Li ta akʼobaltike, mu xa jkʼan jtuk oyun, yuʼun chixiʼ yuʼunik tajek.

»Jun kʼakʼal kʼalal lokʼ jchʼay koʼontone, jelel bu la jtam batel jbe, te likʼot ti bu yakal tsvaʼanik jun mukʼta nae. Toj labal sba laj kil ti ep tajek krixchanoetik ch˗abtejik tee. Kʼalal li nopaj batele, laj kakʼ venta ti jaʼ li stestigotak Jeova ti yakal tsvaʼanik jun Salon sventa Tsobobbaile. Vul ta jol kʼalal chkʼot tsvulaʼanikun ta jnae xchiʼuk la jnop ti toj jun to yutsil ti jechuk xkuxlejal skotol li krixchanoetik kʼuchaʼal li stukike.

»Oy ta koʼonton ti xbat svulaʼanikun yan velta ta jnae, jech oxal bat jchiʼinik ta loʼil li buchʼutik ch˗abtejik ta svaʼanel salone. La jkʼopon li Diose, kʼalal echʼ lajuneb kʼakʼale, jaʼ kʼot svulaʼanun li jcholmantal ti ay onoʼox xchiʼinun ta loʼil ta sba veltae. La jchʼam ta ora kʼalal laj yalbun ti akʼo xichanunajkutik yan veltae. La jchʼun kʼalal laj yalbun ti akʼo xibat li ta tsobajeletik ta salone. ¡Stuk xa noʼox jech li kʼusi laj kil tee! Voʼne xa onoʼox ta jsaʼ li krixchanoetik ti xmuyubajik tajek ta skoj ti skʼanoj sbaike. Li avie une, la jta un.

»Ti kʼuxi lik batkun ta tsobajeletike, muʼyuk jchʼayoj˗o jkojuk. Kʼalal echʼ oxib xemana ti lik kʼotkun ta tsobajele, laj kikta li sikʼolajele. La jip batel li jlivrotak sventa sabel smelolal kʼanaletike o astrología xchiʼuk la jip batel li jdiskotak sventa smusikail Satanase. Jaʼ jech laj kaʼi ti ta kʼunkʼun laj yiktaikun li pukujetike. Lik kakʼ ta jkuxlejal li mantaletik chal ta Vivliae. Oxib u ta mas jelavele, lik jchol mantal. Kʼalal echʼ vakib ue, laj kichʼ voʼ, chib kʼakʼal ta tsʼakale, li˗och ta prekursora auksiliar.

»Ta jtojbe tajek ta vokol Jeova skotol li kʼusitik spasoj ta jtojolale. Oy xa sbalil chkaʼi li jkuxlejale. Ta melel ‹li sbi Jeovae jaʼ jun tsatsal tayal kʼelob osil. Jaʼ te chbat ta anil li buchʼu tukʼe, vaʼun te chichʼ chabiel› (Proverbios 18:10). Jech tajek chkaʼi jba kʼuchaʼal laj yal li jtsʼibajom yuʼun Salmoe, xi la stsʼibae: ‹¡Akʼo mi jun noʼox kʼakʼal te oyun li ta avamakʼe, jaʼ toj lek, jaʼ mu sta li jmil kʼakʼal te oyun ta yan partee! Jaʼ ta jkʼan ti te chitun li ta yochebal sna li Jdiose, jaʼ mu jkʼan te xinaki ta skarpana li buchʼutik toj chopolike› ».

Ti bikʼit laj yakʼ sba li ants taje, la stabe sbalil li xkuxlejale. Skotol li krixchanoetik ti lek yoʼontonik ti ta saʼik li Jeovae, ta me staik ek.