¿Kʼusi chal Vivlia ta sventa ti ta jpaktik sutele?
Li kʼusi chal Vivliae
Akʼo mi oy srasonal chaʼi jun krixchano ti spak sutel skʼoplale, pe mu jechuk chchanubtasvan li Vivliae. Yuʼun xi chale: «Mu xiuk xavale: ‹Jaʼ jech ta jpakbe sutel jech kʼuchaʼal la spasbune; chkakʼbe stoj ta skoj li kʼusi la spase›» (Proverbios 24:29). Li Vivliae yichʼoj lekil tojobtaseletik ti skoltaoj krixchanoetik sventa mu spak skʼoplalike.
Li ta xchanobil liʼe, ta jkʼeltik batel:
¿Mi chopol ti ta jkʼan ta jpaktik sutele?
Kʼalal oy buchʼu chopol kʼusi la spasbutike, stalel onoʼox ti chij˗ilinutike xchiʼuk ta jkʼantik ti jechuk xichʼ pasbel eke, pe akʼo mi jech, mu jechuk chal Vivlia ti akʼo jpaktik sutele. ¿Kʼu yuʼun?
Li Diose muʼyuk lek chil ti jpaktik sutele. Xi chalbutik li Jeovaea: «Voʼon oy ta jba ta jpak; voʼon chkakʼbe stojol» (Romanos 12:19). Li ta Vivliae chkʼanbatik li buchʼutik oy kʼusi chopol yichʼojik pasbele, ti mi xuʼ chilike, ta slekiluk yoʼonton xchapan li skʼopike, maʼuk ti spakik sutele (Romanos 12:18). ¿Ati mi laj kakʼtik xa persa sventa xchapaj li jkʼoptike? Pe ¿mi muʼyuk xchapaj˗o une? ¿O mi muʼyuk xa kʼusi stakʼ pasel sventa ta slekiluk oʼontonal xichʼ chapanele? Li Vivliae tstojobtasutik ti akʼo jpat koʼontontik ta stojolal Jeovae, yuʼun jaʼ chchapan (Salmo 42:10, 11).
¿Kʼuxi ch˗akʼbat kastigo yuʼun Dios li buchʼu oy smule?
Avie, li Diose yakʼojbe to ta skʼob jchapanvanejetik sventa xakʼbe kastigo li buchʼutik chopol kʼusi tspasike (Romanos 13:1-4). Li ta mas jelavele, skotol li buchʼutik chopol kʼusi la spasike ch˗akʼbatik stoj smulik yuʼun Dios xchiʼuk tskʼel ti muʼyukuk xa buchʼu chil svokole (Isaias 11:4).
¿Kʼuxi tstsal kuʼuntik ti ta jkʼantik ta jpaktik sutele?
Jnaʼuk jpajtsan jbatik (Proverbios 17:27). Ep buchʼutik chopol kʼusi tspasik ta skoj ti ilinemike, pe ti chopol chaʼi sbaik ta tsʼakale. Akʼo mi jech, li buchʼutik tsnopik lek li kʼusi chalik o tspasike, lek kʼusi chkʼot ta pasel yuʼunik (Proverbios 29:11).
Jsabetik skʼoplal (Proverbios 18:13). Mi oy kʼusi chopol avichʼoj pasbele, xiuk xajakʼbe abae: «¿Mi jnaʼojbe srasonal yuʼun jech la spas? ¿Mi jaʼ ta skoj ti oy kʼusi la snuptane? ¿Mi muʼyuk xakʼ venta ti jech la spase?». Bakʼintike ta jnoptik ti jaʼ ta skoj xchopolil yoʼontone, pe ti melel xkaltike, xuʼ van muʼyuk laj yakʼ venta.
Li kʼusi mu jechuk chalik ta sventa ti ta jpaktik sutele
Li kʼusi xchʼunoj yantike: Li Vivliae chal ti xuʼ jpaktik sutele. ¿Mi mu xiuk chal chaʼa «mi la stʼus bekʼ satile, chichʼ tʼusbel sbekʼ sat ek»? (Levitiko 24:20).
Li kʼusi melele: Li mantal akʼbat j˗israeletik ta voʼnee, maʼuk sventa ti spakik sutele, yuʼun jaʼ sventa tukʼuk xchapanvanik li jchapanvanejetike (Deuteronomio 19:15-21).b
Li kʼusi xchʼunoj yantike: Li Vivliae chal ti mu stakʼ jpaktik sutele, mi jeche, jaʼ skʼan xal ti mu stakʼ jpoj jbatik mi oy buchʼu chopol kʼusi la spasbutike.
Li kʼusi melele: Li jun krixchanoe oy sderecho sventa spak skʼoplal o saʼ koltael ta stojolal li j-abteletike. Pe li Vivliae chal ti mi stakʼe, akʼo mu jsaʼtik kʼop (Proverbios 17:14).
a Li Vivliae chal ti jaʼ Jeova sbi li Diose.
b Mi chakʼan chanabe mas skʼoplal ta sventa liʼe, kʼelo li xchanobil ¿Kʼusi skʼan xal li mantal «li buchʼu tstupʼbe sbekʼ sat xchiʼile, akʼo yichʼ tupʼbel sbekʼ sat ek» xie?