-
¿Kʼusi xuʼ skoltaot sventa mu xavikta xchanel li Vivliae?¡Kʼupino akuxlejal ta sbatel osil! Li Vivliae xuʼ skoltaot ta stael
-
-
XCHANOBIL 12
¿Kʼusi xuʼ skoltaot sventa mu xavikta xchanel li Vivliae?
Kʼalal ta jchantik li Vivliae, xkoʼolaj kʼalal chijbat ta xanbal ta jun osiltik ti toj kʼupil sbae. Pe bakʼintike, mu kʼunuk chkaʼitik xchanel. Jaʼ yuʼun, ta van xanop mi xuʼ avuʼun ti xachan-o batele. ¿Kʼusi sbalil chatabe mi laj avakʼ persa xchanel li Vivliae? ¿Kʼusi xuʼ skoltaot sventa jechuk-o xachan batel manchuk mi oy kʼusitik xanuptan?
1. ¿Kʼusi sbalil chatabe mi la achan li Vivliae?
«Kuxul li skʼop Diose, oy sjuʼel» (Ebreos 4:12). Li Vivliae toj ep sbalil, yuʼun jaʼ te chal li kʼusi tsnop Diose xchiʼuk ti kʼu yelan skʼanojote. Jech xtok, maʼuk noʼox ti ep kʼusitik chachan batel tee, yuʼun lek kʼusi chkʼot ta nopel avuʼun xchiʼuk chata spatobil avoʼonton. Pe li kʼusi mas tsots skʼoplale jaʼ ti tskoltaot sventa xakʼot ta yamigo li Jeovae. Kʼalal chachan jujukoj li Avivliae, jaʼ tskoltaot sventa xjel batel li akuxlejale.
2. ¿Kʼu yuʼun toj tsots skʼoplal ti oyuk sbalil xavil li kʼusi chakʼ ta chanel Vivliae?
Li kʼusi chakʼ ta chanel Vivliae toj ep sbalil, xkoʼolaj kʼuchaʼal kʼulejal. Jaʼ yuʼun, xi chalbutik li Vivliae: «Mano li kʼusi melele xchiʼuk mu me bakʼinuk xachon batel» (Proverbios 23:23). Kʼalal te ta joltik ti ep sbalil li kʼusi chakʼ ta chanel Vivliae, jaʼ tskoltautik sventa xkakʼ kipaltik ta xchanel manchuk mi ep kʼusi ta jnuptantik (kʼelo Proverbios 2:4, 5).
3. ¿Kʼuxi tskoltaot Jeova sventa mu xavikta xchanel li Vivliae?
Ta skoj ti jaʼ spasoj skotol kʼusitik x-ayan li Jeovae xchiʼuk ti jaʼ avamigoe, xojtikinot lek xchiʼuk tskʼan tskoltaot sventa xavojtikin batel mas. Chakʼbot avipal sventa oyuk ta avoʼonton spasel xchiʼuk ti xuʼuk avuʼune (kʼelo Filipenses 2:13). Jaʼ yuʼun, mi chakʼan ti oyuk mas ta avoʼonton xchanel li Vivliae xchiʼuk ti xavakʼ ta akuxlejal li kʼusi yakal chachane, naʼo me ti jaʼ tskoltaot ta spasel li Diose. Mi la anuptan avokol o mi la skontrainoxuk li yantike, teuk me ta ajol ti chakʼbot avipal Dios sventa xkuch avuʼune. Kʼanbo koltael Jeova sventa jechuk-o xachan batel li Vivliae (1 Tesalonisenses 5:17).
JCHANTIK TO BATEL MAS
Jkʼeltik batel avil kʼusi xuʼ xapas sventa jechuk-o xachan batel Vivlia akʼo mi xavichʼ kontrainel o kʼalal mu noʼox xaxokob yileluke. Mi laje, ta jkʼeltik batel kʼuxi tskoltaot Jeova sventa jechuk-o xachan batel li Vivliae.
4. Tsotsuk skʼoplal xavil li xchanel Vivliae
Bakʼintike, ep kʼusitik ta jpastik ti vokol xa chkaʼitik xchʼakbel yorail xchanel li Vivliae. ¿Kʼusi xuʼ jpastik un chaʼa? Kʼelik Filipenses 1:10 xchiʼuk albeik skʼoplal li sjakʼobiltak liʼe:
¿Kʼusitik xanaʼ «li kʼusi mas tsots skʼoplale»?
¿Kʼusi xuʼ xapas sventa tsotsuk skʼoplal xavil li xchanel Vivliae?
Mi baʼyel chakʼan chatikʼ yiʼ li ta jun vasoe, mu xa me epuk x-och yuʼun li tonetike.
Yan mi jaʼ baʼyel la atikʼ ochel li tonetike, jutuk mu x-och skotol li yiʼe. Jaʼ jech ek, mi baʼyel chapas li kʼusitik «mas tsots skʼoplale», xakʼ to me yorail avuʼun spasel li yan kʼusitike.
Kʼalal ta jchantik Vivliae, tskoltautik sventa xkojtikintik li Diose xchiʼuk ti xkichʼtik ta mukʼe. Kʼelik Mateo 5:3 xchiʼuk albeik skʼoplal li sjakʼobil liʼe:
¿Kʼusi sbalil ta jtabetik mi tsots skʼoplal chkiltik li xchanel Vivliae?
5. Mu me xavikta xchanel manchuk mi xavichʼ kontrainel
Bakʼintike, oy van buchʼu chalbot ti xavikta xchanel li Vivliae. Kʼelavil li kʼusi la spas Francescoe. Kʼelik li VIDEOE xchiʼuk albeik skʼoplal li sjakʼobiltak liʼe:
¿Kʼu yelan laj yaʼi yutsʼ yalal xchiʼuk yamigotak Francesco kʼalal laj yalanbe ti yakal xa chchan Vivliae?
¿Kʼusi sbalil la stabe kʼalal muʼyuk xchibaje?
Kʼelik 2 Timoteo 2:24, 25 xchiʼuk albeik skʼoplal li sjakʼobiltak liʼe:
¿Kʼusi tsnop avutsʼ avalal xchiʼuk avamigotak ta sventa li kʼusi yakal chachan batele?
Jech kʼuchaʼal chal li tekstoe, ¿kʼu yelan skʼan xavakʼ ta ilel atalelal kʼalal oy buchʼu chalbot ti akʼo xavikta xchanel li Vivliae? ¿Kʼu yuʼun skʼan jech xapas?
6. Pato avoʼonton ti tskoltaot li Jeovae
Kʼalal mas xa ox lek xkil jbatik xchiʼuk li Diose, mas xa oy ta koʼontontik ti xmuyubajuk kuʼuntike. Pe bakʼintike, vokol chkaʼitik ti jel jkuxlejaltike. Mu me xachibaj mi oy jech chavaʼi abae, jaʼ tskoltaot li Jeovae. Kʼelik li VIDEOE xchiʼuk albeik skʼoplal li sjakʼobiltak liʼe:
Jech kʼuchaʼal laj kiltik ta videoe, ¿kʼusitik la sjel ta xkuxlejal Jim sventa spas li kʼusi lek chil Jeovae?
¿Kʼusi mas lek laj avil li kʼusitik la sjel ta xkuxlejale?
Kʼelik Ebreos 11:6 xchiʼuk albeik skʼoplal li sjakʼobiltak liʼe:
¿Kʼusi tspas Jeova ta stojolal «li buchʼutik ta sjunul yoʼonton tsaʼike», jaʼ xkaltik, ti chakʼ yipalik ta yojtikinel xchiʼuk ti lekuk x-ilatike?
¿Kʼu yelan chil Jeova xanaʼ kʼalal avakʼoj persa xchanel li Vivliae?
JUNANTIKE XI TSJAKʼIKE: «¿Kʼu yuʼun yakal chachan li Vivliae?».
¿Kʼusi van chatakʼbe?
¿KʼUSI LA ACHAN?
Manchuk mi vokol chavaʼi xchanel li Vivliae, pe mi laj avakʼ persae, tskoltaot sventa xakʼupin akuxlejal ta sbatel osil. Li Jeovae chakʼbot amoton mi jech-o la apat avoʼonton ta stojolale.
Svulesobil ta joltik
¿Kʼu yuʼun oy sbalil chavil li kʼusitik yakal chachan ta Vivliae?
¿Kʼusi skʼan xapas ti laj xa avakʼ venta li kʼusitik mas tsotsik skʼoplale?
¿Kʼu yuʼun skʼan xakʼanbe Jeova ti skoltaot yoʼ jechuk-o xachan li Vivliae?
XUʼ TO XAKʼEL LIʼE
Kʼelavil chantos kʼusi spasoj yantik sventa stunesik lek li skʼakʼalike.
«¿Kʼuxi xuʼ jtunes lek li jkʼakʼaltike?» (¡Vikʼiluk me jsatik!, fevrero ta 2014)
Jun ants tskʼan ox ti lekuk x-ilat yuʼun li Diose, pe li smalale mu xaʼibe smelolal. Kʼelavil kʼuxi koltaat yuʼun Jeova li antse.
Kʼelavil kʼuxi la skolta smalal jun ants ta skoj ti muʼyuk laj yikta xchanel li Vivliae.
Oy buchʼutik chalik ti chchʼak utsʼ alaliletik li stestigotak Jeovae, ¿pe mi jech van?
«¿Mi chchʼak utsʼ alalil li stestigotak Jeovae?» (Xuʼ te xata ta jw.org)
-
-
Lekuk kʼusi xkʼot ta nopel kuʼuntik¡Kʼupino akuxlejal ta sbatel osil! Li Vivliae xuʼ skoltaot ta stael
-
-
XCHANOBIL 35
Lekuk kʼusi xkʼot ta nopel kuʼuntik
Jkotoltik onoʼox oy kʼusi ta jnop ta jpastik. Ta skoj taje, xuʼ me xijmuyubaj-o yuʼun o muʼyuk. Jech xtok, xuʼ lek xkil˗o jbatik xchiʼuk Jeova o muʼyuk. Liʼe jaʼ junantik li kʼusitik ta jnop ta jpastike: bu chijnaki, kʼuxi ta jtatik li kʼusitik chtun kuʼuntike, mi chijnupun o mi muʼyuk. Jaʼ yuʼun, mi lek li kʼusi chkʼot ta nopel kuʼuntike, xuʼ xijmuyubaj xchiʼuk chmuyubaj kuʼuntik li Jeovae.
1. ¿Kʼuxi xuʼ skoltaot Vivlia sventa lekuk kʼusi xkʼot ta nopel avuʼune?
Kʼalal skʼan to xanop kʼusi chapase, kʼanbo koltael li Jeovae. Jech xtok, kʼelo ta Vivlia k’u yelan chil Jeova li kʼusi anopoj chapase (kʼelo Proverbios 2:3-6). Bakʼintike, jamal chalbot Jeova li kʼusi skʼan xapase. Jaʼ yuʼun, mas lek mi la achʼune.
Pe ¿kʼusi van chapas mi muʼyuk jamal chal li Vivliae? Li Jeovae tsbeiltasot batel «ti bu beal skʼan xatam batele» (Isaias 48:17). ¿Kʼuxi tspas? Jaʼ ti chakʼbot beiltasel sventa xanaʼ kʼusi chapase. Li beiltaseletik chakʼ Vivliae toj tsots skʼoplal, yuʼun tskoltautik sventa xkaʼibetik smelolal kʼusi tsnop li Jeovae xchiʼuk kʼu yelan chaʼi sba. Bateltike, jaʼ te chkaʼibetik smelolal kʼalal ta jchantik li Vivliae. Kʼalal chkakʼtik venta kʼusi tsnop li Jeovae, tskoltautik sventa lekuk xil li kʼusi chkʼot ta nopel kuʼuntike.
2. ¿Kʼusi skʼan jtsaktik ta venta kʼalal oy kʼusi ta jnop ta jpastike?
Li Vivliae chal ti «buchʼu pʼije tsnop lek li kʼusi tspase» (Proverbios 14:15). Taje jaʼ skʼan xal ti skʼan jchotan jbatik ta snopel li kʼusi ta jkʼan ta jpastike. Kʼalal ta jkʼeltik li kʼusi ta jnop ta jpastike, xiuk jakʼbe jbatike: «¿Kʼusi beiltasel ta Vivlia tskoltaun ta sventa liʼe? ¿Bu junukal ti jun koʼonton chikom yuʼune? ¿Mi tstaik van ta makiel yantik li kʼusi ta jnop ta jpase? Pe li kʼusi mas tsots skʼoplale, ¿mi chmuyubaj˗o van kuʼun li Jeovae?» (Deuteronomio 32:29).
Li Diose jaʼ oy ta sba yalel li kʼusi lek xchiʼuk li kʼusi chopole. Kʼalal chkojtikinbetik lek li smantaltake, li beiltaseletik yuʼune xchiʼuk ti ta jkʼan ta jchʼuntike, jaʼ jech ta jchanubtastik lek li jol koʼontontike o li jnopbentike. Li jnopbentike jaʼ chalbutik li kʼusi leke xchiʼuk li kʼusi muʼyuk leke (Romanos 2:14, 15). Kʼalal lek jchanubtasoj li jnopbentike, jaʼ tskoltautik sventa lekuk li kʼusi xkʼot ta nopel kuʼuntike.
JCHANTIK TO BATEL MAS
Jkʼeltik batel kʼuxi tskoltautik li beiltaseletik ta Vivlia xchiʼuk li jnopbentik sventa lekuk kʼusi xkʼot ta nopel kuʼuntike.
3. Jaʼ akʼo sbeiltasot li Vivliae
¿Kʼuxi tskoltautik li beiltaseletik ta Vivlia kʼalal oy kʼusi ta jnop ta jpastike? Kʼelik li VIDEOE xchiʼuk albeik skʼoplal li sjakʼobiltak liʼe:
¿Kʼusi yakʼojbutik ta jujuntal li Jeovae?
¿Kʼu yuʼun laj yakʼ Jeova ti xuʼ jnop jtuktik li kʼusi ta jpastike?
¿Kʼusi yakʼojbutik Dios sventa lekuk kʼusi xkʼot ta nopel kuʼuntike?
Sventa xakʼelbeik skʼoplal junuk beiltasel ta Vivliae, kʼelik Efesios 5:15, 16. Mi laje, albeik skʼoplal kʼuxi xuʼ lek jtunestik ‹li jujun kʼakʼal chjelav› sventa...
... jchan Jvivliatik jujun kʼakʼal.
... masuk lekil malalilutik, ajnilalutik, totil meʼilutik o alab nichʼnabilutik.
... xijbat li ta tsobajeletike.
4. Chanubtaso anopben sventa lekuk kʼusi xkʼot ta nopel avuʼun
Kʼalal oy jun mantal ti jamal chal kʼusi skʼan jpastike, mas kʼun chkaʼitik ti lek kʼusi xkʼot ta nopel kuʼuntike. Pe ¿mi chʼabal une? Kʼelik li VIDEOE xchiʼuk albeik skʼoplal li sjakʼobil liʼe:
Jech kʼuchaʼal laj kiltik li ta videoe, ¿kʼusi la spas li ermana sventa lekuk kʼusi xkʼot ta nopel yuʼun xchiʼuk ti xmuyubajuk yuʼun li Jeovae?
¿Kʼu yuʼun muʼyuk lek ti xkalbetik yantik yoʼ xalbutik li kʼusi xuʼ jpastike? Kʼelik Ebreos 5:14 xchiʼuk albeik skʼoplal li sjakʼobiltak liʼe:
Mas onoʼox kʼun ti oyuk buchʼu xalbutik li kʼusi skʼan jpastike, pe ¿kʼu yuʼun tsots skʼoplal ti xijtojobuk stʼujel jtuktik li kʼusi leke?
¿Kʼusitik xuʼ skoltautik sventa jchanubtas li jnopbentike xchiʼuk ti lekuk kʼusi chkʼot ta nopel kuʼuntike?
Li jnopbentike xkoʼolaj kʼuchaʼal jun mapa, yuʼun jaʼ tskoltautik sventa jnaʼ kʼusi xuʼ jpastik.
5. Tsako ta venta li kʼusi tsnop yantike
Ta skoj ti jelelutik ta jujuntale, jelajtik li kʼusi chkʼot ta nopel kuʼuntike. ¿Kʼuxi xuʼ xkakʼtik ta ilel ti ta jtsaktik ta venta li kʼusi tsnop yantike? Jkʼeltik chibuk skʼelobil.
Baʼyel: Jun ermana ti lek chaʼi tsbon sbae o ti tspas sba maquillare chbat ta jun tsobobbail ti bu chopol chil ermanaetik ti tsbon sbaike.
Kʼelik Romanos 15:1 xchiʼuk 1 Korintios 10:23, 24 xchiʼuk albeik skʼoplal li sjakʼobil liʼe:
Li versikuloetik liʼe, ¿kʼuxi van xuʼ xakʼ ta xkuxlejal li ermanae? ¿Kʼusi van xuʼ xapas mi mu xakʼ snopben chaʼiik spasel yantik li kʼusi lek chavaʼi voʼote?
Xchibal: Jun ermano snaʼoj ti muʼyuk chal Vivlia ti chopol mi ta spʼisol noʼox chkuchʼtik poxe, pe kʼotem ta nopel yuʼun ti muʼyuk chuchʼ jsetʼuke. Jun kʼakʼale, laj yichʼ ikʼel batel ta jun kʼin, vaʼun te laj yil ti chuchʼik pox li ermanoetike.
Kʼelik Eklesiastes 7:16 xchiʼuk Romanos 14:1, 10 xchiʼuk albeik skʼoplal li sjakʼobil liʼe:
Li versikuloetik liʼe, ¿kʼuxi van xuʼ xakʼ ta xkuxlejal li ermanoe? ¿Kʼusi van xuʼ xapas mi mu xakʼ snopben chaʼiik spasel yantik li kʼusi lek chavaʼi voʼote?
¿Kʼusitik xuʼ xapas yoʼ lekuk kʼusi xkʼot ta nopel avuʼune?
1. Albo Jeova ti xakʼ avil li kʼusi xuʼ xapase (Santiago 1:5).
2. Sabo skʼoplal ta Vivlia xchiʼuk ta vunetik ti lokʼem ta Vivlia sventa sbeiltasote. Jech xtok, jakʼbo ermanoetik ti ep xa kʼusitik xchanojik ta Vivliae.
3. Nopo kʼu yelan chavaʼi aba ta tsʼakal xchiʼuk kʼu yelan chaʼi sba yantik ta skoj li kʼusi chkʼot ta nopel avuʼune.
JUNANTIKE XI CHALIKE: «Paso li kʼusi xal avoʼontone. ¡Mu ventauk li kʼusi chal yantike!».
¿Kʼu yuʼun skʼan jtsaktik ta venta kʼu yelan chaʼi sba Dios xchiʼuk li yantike?
¿KʼUSI LA ACHAN?
Mi ta jtsaktik ta venta kʼusi tsnop Jeova xchiʼuk ti kʼu yelan chaʼi sbaik li yantike, lek me kʼusi chkʼot ta nopel kuʼuntik.
Svulesobil ta joltik
¿Kʼusi xuʼ xapas sventa lekuk xil Jeova li kʼusi chkʼot ta nopel avuʼune?
¿Kʼusi xuʼ xapas sventa xachanubtas li anopbene?
¿Kʼuxi xuʼ xavakʼ ta ilel ti chatsak ta venta li kʼusi tsnop yantike?
XUʼ TO XAKʼEL LIʼE
¿Kʼuxi xuʼ xavamigoin˗o Dios ta sventa li kʼusitik chkʼot ta nopel avuʼune?
Kʼelavil kʼu yelan tstojobtasutik li Jeovae.
Kʼelavil kʼusi koltaat˗o jun vinik sventa lekuk kʼusi xkʼot ta nopel yuʼun manchuk mi mu kʼunuk laj yaʼi.
Kʼelavil kʼuxi xuʼ xmuyubaj avuʼun Jeova kʼalal chachʼun li kʼusi mu jamaluk chal ta Vivliae.
-