Ti kʼuyelan ch-echʼ jujun kʼakʼale muʼyuk toj tsots skʼoplal
LI KOMKOM pʼijubtasel loʼiletik sventa kʼuyelan ch-echʼ jujun kʼakʼale oy noʼox ta buyuk jotukal balumil, jech kʼuchaʼal li komkom pʼijubtasel ta inglés ti xi chale: Tsajal vinajel ta akʼobaltik, smuyubajel jtsʼot varkoetik; tsajal vinajel ta jujun sobtik, ¡kʼelo me abaik jtsʼot varkoetik! Li avie, li buchʼu chchanbeik skʼoplal kʼuyelan ch-echʼ jujun kʼakʼale (meteorólogos) yakʼojik lek venta ti kʼuyelan vinajel ta jujun sobe, jaʼ senyail kʼuyelan ta x-echʼ li jujun kʼakʼale.
Jech ek, kʼalal liʼ toʼox oy ta Balumil li Jesuse, li krixchanoetike nopem xa onoʼox xaʼiik skʼelel vinajel sventa kak chalik ti kʼuyelan ch-echʼ li kʼakʼale. Jech kʼuchaʼal liʼe, li Jesuse xi laj yalbe jlom judioetike: «Cʼalal bat xa cʼacʼale, jech chavalic: “Ocʼome lec qʼuepel, yuʼun lec tsoj li vinajele”, xachiic. Ta sobe jech chavalic noxtoc: “Ta xtal voʼ tana, yuʼun tsoj vinajel xchiʼuc oy ep icʼal toc”», xut. Pe xi laj yal xtoke: «Xanaʼic sqʼuelel sqʼuelubil ta vinajel; ¿cʼu yuʼun mu xanaʼic sqʼuelel sqʼuelubil li cʼusi chcʼot ta pasel liʼ ta orae?», xi (Mateo 16:2, 3).
¿Kʼusi la skʼan laj yal Jesús kʼalal laj yal «sqʼuelubil li cʼusi chcʼot ta pasel liʼ ta orae»? Jaʼ laj yalbe skʼoplal skotol li epal senyailtak ti lek xvinaj ti chakʼ ta ilel ti jaʼ Mesías takbil tal yuʼun Dios li Jesuse. Li kʼusitik la spase jaʼ sprevail ti mu stakʼ chibal kʼoptaele, jech kʼuchaʼal li tsajal vinajel eke. Manchuk mi jech, jutuk mu skotoluk li judioetike muʼyuk la stukʼulanik li senyailtak ti chakʼ ta ilel ti kʼot xaʼox li Mesiase, jtos ti kʼusi mas toj tsots skʼoplal ti jaʼ xkom to skʼoplal snaʼel kʼuyelan ch-echʼ jujun kʼakʼale.
Li avi eke oy senyailtak ti jaʼ mas to toj tsots skʼoplale, ti jaʼ xkom to li senyailtak tsajal vinajele. Li Jesuse laj yal ti tsta yorail chchʼay batel li sokem balumil liʼe sventa chichʼ chaʼmeltsanel ta jun lekilal, vaʼun laj yal ti ep kʼusitik chkʼotanuk ta pasel —jech kʼuchaʼal mukʼtik milbail xchiʼuk viʼnal— ti chakʼ ta ilel ti jaʼ xa yorail ti poʼot xa xjel li kʼusitike. Laj yal ti kʼalal jech xaʼox chvinaj li kʼusitik taje, nopol xaʼox yorail chchapan Dios li kʼusitik liʼe (Mateo 24:3-21).
Li voʼot eke, ¿mi xavil li «sqʼuelubil li cʼusi chcʼot ta pasel liʼ ta orae»?