Mu jpastik li kʼusitik chopol la spasik j-israeletike
LI J-ISRAELETIKE lek xa onoʼox snaʼojik li kʼusi chkʼanbatik yuʼun Jeova kʼalal mi ochik li ta Albil Balumile, yuʼun xi onoʼox albatik ta stojolal Moisese: «Nutsic loqʼuel scotol li bochʼotic te nacajtic ta banamile, xchiʼuc jinesbeic scotol li cʼusitic slocʼtaojic ti pasbilic ta ton xchiʼuc ta unijesbil taqʼuine. Lajesbeic scʼoplal scotol li yav bu chichʼic ta mucʼ sdiosic ta toyol vitsetique», xi (Núm. 33:52).
Li j-israeletike skʼan mu spasik trato xchiʼuk li jnaklometik ta balumil taje xchiʼuk mu stakʼ xnupun xchiʼukik (Deu. 7:2, 3). Ta melel, li tʼujbil jteklum yuʼun Diose xi laj yichʼ pʼijubtasele: «Mu me cʼusi xachapan achiʼuquic li bochʼotic te nacajtic ta banamil ti bu chaʼochic batele yuʼun jech mu xayalic ta lum ta scojic», xi (Exo. 34:12). Manchuk mi jech, li j-israeletike muʼyuk la xchʼunbeik smantal li Diose xchiʼuk itsʼujik ta junantik petsʼ. ¿Kʼusi ti ichʼayatik-oe? ¿Kʼusi xuʼ jchantik sventa mu jechuk jpastik ek? (1 Cor. 10:11.)
Li yamigoinel lumetike ch-ikʼvan batel ta yichʼel ta mukʼ yan kʼusitik
Li j-israeletike lik spasik ta kanal li jnaklometik ti te oyik ta Albil Balumile, yuʼun jaʼ chuʼuninik li balumil taje. Tana un, li j-israeletike muʼyuk bu la xchʼunbeik skotol li smantaltak Diose, yuʼun muʼyuk bu la snutsik lokʼel li yajkontraike (Jue. 1:1–2:10). Yuʼun kʼalal te xa chnakiik batel xchiʼuk li «vucub muʼctic lum» ti te oyike, solel lek xa chil sbaik xchiʼukik (Deu. 7:1). ¿Kʼu yelan ilbajinatik taje? Xi chal li Vivliae: «Laj yicʼbe sba squerem stsebic ta jujujot, xchiʼuc te lic yichʼbeic ta mucʼ li diosetic yuʼunique. Li israeletique chopol cʼusi lic spasic ta stojol li Mucʼul Diose; jaʼ lic tunicuc yuʼun li slocʼobaltac dios Baale xchiʼuc li slocʼobaltac dios Aserae. Jaʼ la scomtsanic o li Mucʼul Diose», xi (Jue. 3:5-7). Ta skoj ti lek xil sbaik li j-israeletik xchiʼuk li jnaklometik ta balumil taje, lik nupunikuk xchiʼuk li krixchanoetik taje xchiʼuk lik yichʼik ta mukʼ yan kʼusitik. Ti jech lik yakʼ sbaik ta nupunele, li j-israeletike toj vokol xa ta nutsel lokʼel chaʼiik li lumetik ti yantik kʼusitik chichʼik ta mukʼe. Isok li melel yichʼel ta mukʼ Diose, vaʼun li j-israeletike lik yichʼik ta mukʼ jecheʼ diosetik.
Li xchiʼinel krixchanoetik ti te nakalik ta Albil Balumile jaʼ akʼbat mas svokolik ta mantal, ti jaʼ mu sta jech ti skontrainoj sbaike. Tana un, jchantik yan ti kʼusi xuʼ van jaʼ isokesatik ta yichʼel ta mukʼ Diose.
Li tsʼunolajele ikʼvan batel ta yichʼel ta mukʼ Baal
Kʼalal ochik ta Albil Balumil li j-israeletike laj yiktaik komel li xanvile xchiʼuk ep buchʼutik lik yabtelanik li balumile. Li kʼuyelan ch-abtejike xuʼ van xkoʼolaj ti kʼuyelan toʼox stsʼunolajik li krixchanoetik ti te toʼox nakalike. Pe maʼuk noʼox kʼunkʼun lik xchanik li abtel kʼuchaʼal ch-abtej toʼox li krixchanoetike. Ta skoj ti laj yamigoin sbaik xchiʼuk li jcanaanetike lik xchʼamik li kʼusitik xchʼunoj jyanlumetik ti snitoj sba xchiʼuk li tsʼunolajele.
Li jcanaanetike ep Baaletik chichʼanik ta mukʼ, yuʼun chalik ti jaʼ la diosetik ti xuʼ spasik ti akʼo la lek xakʼ sat li tsʼunubale. Li j-israeletike maʼuk noʼox lik tsʼunolajikuk xchiʼuk ti la skʼajbeik sat li yabtelike, moʼoj, yuʼun kʼunkʼun lik yichʼbeik ta mukʼ li sdiostak jcanaanetike, ti tskuyik ti jaʼ chakʼ talel li kʼusitike. Ta skoj taje ep krixchanoetik ta Israele chichʼik ta mukʼ Jeova yileluk, pe li kʼusi melele jaʼ ti yakal svalopatinik komel li melel yichʼel ta mukʼ Diose.
Tsatsal pʼijubtasel ta jventatik
Kʼalal ikʼotik ta Albil Balumil li j-israeletike xuʼ van mu toʼox bu snopoj mi tstikʼ sbaik ta yichʼel ta mukʼ li Baale. Pe li yamigoinel jnaklometik tee jaʼ ikʼatik batel sventa jech chopol spasik ek. Xuʼ van jech xkʼot ta jtojolaltik ek mi lek xkaʼitik xchiʼinel li krixchanoetik ti lek yoʼontonik yilele pe ti muʼyuk bu jech xchʼunel yoʼontonik kʼuchaʼal voʼotike, ti muʼyuk bu chchʼunik mantale xchiʼuk ti mu jechuk snopbenik kʼuchaʼal yajtsʼaklom Cristoe. Melel onoʼox ti ta van jchiʼintik krixchanoetik ti maʼuk jchʼunolajeletik li ta kabteltike, ta chanob vun xchiʼuk ta jnatik. Manchuk mi jech, li kʼusitik laj yil ta xkuxlejal j-israeletike chakʼ kiltik ti yamigoinel krixchanoetik taje jaʼ saʼel jvokoltik ek. Li Vivliae xi chal ta melele: «Me ta jchiʼintic li bochʼotic chopolique, chisoquesbutic li jlequil taleltique», xi (1 Cor. 15:33).
Avie oy ep prevaetik ta jnuptantik jech kʼuchaʼal la snuptanik j-israeletike. Li krixchanoetik avie oy ep kʼusitik chichʼik ta mukʼ, junantike jaʼ li takʼine, li krixchanoetik ti lek ojtikinbilik ta tajimol o ta chʼayob oʼontonale, li kʼusitik ta politikae, jbeiltasvanejetik sventa relijion xchiʼuk utsʼ-alalil. Kʼusiuk junukal taje xuʼ van jaʼ mas ep sbalil xlik kiltik ta jkuxlejaltik. Li yamigoinel krixchanoetik ti muʼyuk skʼanojik Jeovae xuʼ jaʼ xi smilutik ta mantal.
Li mulivajele jaʼ jtos ti kʼusi tsots skʼoplal sventa chichʼik toʼox ta mukʼ li Baale, vaʼun ep j-israeletik lajik ta loʼlael. Li avi eke, oy ep petsʼ ti yakal stsʼuj yuʼun li buchʼutik oyik ta steklumal Diose. Jech kʼuchaʼal liʼe, ta snetʼbel yuni chʼoal komputadora kʼalal stuk oy ta sna li jun krixchano ti tskʼan noʼox kʼusi tskʼel o ti muʼyuk pʼije, xuʼ x-ilbajinbat-o sjol yoʼonton. Toj chopol ti jech chlaj ta loʼlael junuk yajtsʼaklom Cristo ta pornografiae, ti te ta skʼel ta Internete.
«Xcuxet noʼox yoʼntonic li bochʼotic tscʼan chaʼibeic smantalta[ke]»
Ta jujuntal me ta jnoptik mi ta jchʼunbetik o mi moʼoj li kʼusi chal Jeova sventa li buchʼu ta xkamigointike (Deu. 30:19, 20). Jaʼ yuʼun staʼo ti xi jakʼbe jbatike: «¿Buchʼutik ta jchiʼinan kʼalal ta jkux koʼontone? ¿Kʼusitik mantal oy yuʼunik ta sventa li stalelalike? ¿Mi chichʼik ta mukʼ li Jeovae? ¿Mi jaʼ van tskoltaun sventa chi kʼot ta jun lekil yajtsʼaklom Cristo?».
Li jtsʼibajom yuʼun Salmoe xi la skʼejintae: «Xcuxet noʼox yoʼntonic li bochʼotic tucʼ cʼusitic tspasique, ti jaʼ noʼox tspasilanic o cʼusi chal li smantaltac Mucʼul Diose. Xcuxet noʼox yoʼntonic li bochʼotic tscʼan chaʼibeic smantaltac Mucʼul Diose, ti scotol yoʼntonic ta saʼilanique», xi (Sal. 119:1, 2). Ta melel, «xcuxet noʼox yoʼnton li bochʼo lec yichʼoj ta mucʼ Mucʼul Diose, ti jaʼ te chanov o ta lequil be yuʼune» (Sal. 128:1). Ta melel, kʼalal ta jtʼujtik buchʼu ta xkamigointike skʼan akʼo mu jpastik li kʼusitik chopol la spasik j-israeletike xchiʼuk ti jchʼunbetik smantal Jeova ta skotol kʼusi ta jpastike (Pro. 13:20).
[Lokʼol ta pajina 26]
Mi lek xkaʼitik xchiʼinel li krixchanoetik ti muʼyuk skʼanojik Jeovae xuʼ chikʼutik batel ta yichʼel ta mukʼ yan kʼusitik