Yaloj ta melel chakʼ jun paraiso li Diose

LIʼE jaʼ slokʼol paraiso ti kʼuchaʼal van akʼbat yil yuʼun Dios li Isaiase. Mu toʼox sjaliluk xchamel Jonás kʼalaluk kuxi li Isaiase.

Li jpʼel kʼop paraisoe jaʼ smelolal «nichimaltik». ¿Mi oy kʼusi tsvulesbot ta ajol ti achanoj xa liʼ ta livroe? Jech, jaʼ li alakʼ sba nichimaltik ti la spas Dios sventa Adán xchiʼuk Evae. Pe ¿mi xuʼ van xkʼataj ta jun nichimaltik spʼejel li Balumile?

Li Jeovae la jyalbe Isaías, li yajchʼul alkʼope, ti akʼo stsʼiba ta sventa li achʼ Paraiso chtal ta mas tsʼakal ta sventa li steklumal Diose. Xi la jyale: Li okʼiletik xchiʼuk li chijetike muʼyuk xa ta xilbajin sbaik. Li uni chʼiom vakaxetik xchiʼuk li uni leonetike jmoj ta xveʼik, ololetik noʼox ta xchabiik li chonetik taje. Mi jaʼuk chlaj ta tiʼel li uni olol ti te chtajin ta stsʼel li kiletel chon ti oy svenenoale.

Xuʼ van xi ta xal jlom krixchanoetike: Taje muʼyuk bu chkʼot ta pasel. Oy onoʼox tajek vokolil liʼ ta Balumile. Muʼyuk bu chlaj-o skʼoplal, xuʼ van xiik. Pe nopo avaʼi, ¿kʼu x-elan ti bu nakiik li Adán xchiʼuk Evae?

Li Diose te la jyakʼ ta paraiso li Adán xchiʼuk Evae. Pe ta skoj ti muʼyuk la xchʼunbeik smantal li Diose la xchʼayik li alakʼ sba nichimaltike, xchiʼuk noxtok malubik xchiʼuk chamik. Li buchʼu skʼanojik Diose ta x-akʼbatik li kʼusi la xchʼayik li Adán xchiʼuk Evae, taje jech yaloj ta melel li Diose.

Li ta achʼ Paraiso chtal ta mas tsʼakale muʼyuk buchʼu ta xakʼ vokolil mi jaʼuk buchʼu ta sokes. Chtal tukʼil lekilal. Skotol li krixchanoetike muʼyuk xa bu ch-ipajik, jaʼ xa noʼox xmuyubajik kʼuchaʼal tskʼan onoʼox Dios ta slikebale. Ta mas tsʼakal ta jchantik kʼuxi ta spas Dios taje.