Li Jesukristoe jaʼ li Mesias ti albil onoʼox skʼoplale

LI Jeova Diose ep kʼusi laj yakʼbe snaʼ li j-alkʼopetik ta Vivlia ta sventa li Mesiase, li Jpojvanej ti albil onoʼox skʼoplale. Muʼyuk bu vokol ta naʼel buchʼu jaʼ, yuʼun laj yalbeik skʼoplal bu chvokʼ, kʼusitik tspas xchiʼuk kʼu yelan chcham. Skotol li albil kʼopetik ta Vivliae kʼot ta pasel ta stojolal li Jesukristoe. Jech, toj labal sba chkiltik, yuʼun jech laj kʼotanuk ta pasel. Taje te chkakʼtik venta kʼalal ta jkʼeltik junantik albil kʼop ti yalojbe onoʼox skʼoplal ti bu chvokʼ li Mesiase xchiʼuk kʼalal chchʼi tale.

Li j-alkʼop Isaiase laj yalbe skʼoplal ti jaʼ te chlik tal ta yutsʼ yalal David li Mesiase (Isaías 9:7). Jaʼ jech kʼot ta pasel, li Jesuse jaʼ snitilul li ajvalil Davide (Mateo 1:1, 6-17).

Li yan yaj-alkʼop Dios ti Miqueas sbie laj yal ti chvokʼ ta «Belén Efrata» xchiʼuk ti chkʼot ta ajvalile (Miqueas 5:2). Kʼalal tal ta Balumil li Jesuse, oy chib jteklum ta Israel ti Belen sbie. Li june te toʼox oy ta snorteal Israel, ta stsʼel Nasaret, li yane te xkom ta Juda, ta stsʼel Jerusalen. Li ta stsʼel Jerusalene Efrata toʼox sbi ti jaʼ te vokʼ li Jesuse, jaʼ jech kʼot ta pasel li albil kʼope (Mateo 2:1).

Li yan albil kʼop ta Vivliae laj yal ti chikʼ lokʼel «ta Egipto» Xnichʼon li Diose. Jaʼ jech kʼot ta pasel ta melel, yuʼun laj yikʼik batel ta Ejipto kʼalal olol toʼox li Jesuse, ta mas tsʼakal kʼalal cham li ajvalil Erodese, sut batel li ta slumale. Jaʼ jech kʼot ta pasel li albil kʼope (Oseas 11:1; Mateo 2:15).

Li ta stavlail ta pajina 200, oy jun lista ti chal «albil kʼop» ti jaʼ li kʼusi yaloj Vivlia ta sventa li Mesiase. Avokoluk koʼoltaso li tekstoetik xchiʼuk li lista «kʼot ta pasel» xie. Mi jech chapase, mas to chachʼun ti melel li Skʼop Diose.

Kʼalal chakʼel li loʼiletik taje, mu me xchʼay ta ajol ti epal siglo toʼox skʼan xvokʼ Jesus kʼalal laj yichʼ tsʼibaele. Xi laj yal stuk li Jesuse: «Persa onoʼox ta xkʼot [ta] pasel skotol li jkʼoplal tsʼibabil ta Smantal Moises xchiʼuk li kʼusitik yaloj J-alkʼopetik xchiʼuk li kʼusitik tsʼibabil ta Salmose» (Lukas 24:44). Jech kʼuchaʼal chavil ta Avivliae, kʼot ta pasel skotol.