Kuxul ikomik ta nojelal ta voʼ

TA SKOJ ti kʼunkʼun epaj batel li jnaklejetik ta Balumile, li mulil xchiʼuk choplejale puk batel. Li Enoc, ti kʼajomal van jaʼ yajtunel Dios ta Balumile, laj onoʼox yal ti tslajes skotol chopol krixchanoetik li Jeovae. Pe li pʼijubtasel laj yakʼe xkoʼolaj kʼuchaʼal ta jatal koxtal ikʼot, yuʼun li choplejale mas to epaj batel. Jlom anjeletike la stoy sbaik ta stojolal Jeova, laj yiktaik komel li yavil akʼbilik ta vinajele, la spas sbaik kʼuchaʼal krixchanoetik xchiʼuk laj yikʼik epal antsetik. Ta skoj ti vaʼ yelan la spasike ayan mukʼta tsatsal krixchanoetik ti mu xkoʼolaj kʼuchaʼal yantike, ti nefilim sbiike, ti la snojesik ta majbail xchiʼuk ta chʼichʼ li Balumile. ¿Mi xnop kuʼuntik kʼu to yepal xkʼuxul laj yaʼi Dios kʼalal laj yil kʼuyelan chil svokol li spasbentake?

Kʼalal cham li Enoque, ayan jun lekil vinik ti Noé sbie. Li Noé xchiʼuk yutsʼ yalale laj yakʼbeik yipal sventa lek x-ilatik yuʼun li Diose. Jun kʼakʼale, li Jeovae la snop tslajes ta jun nojelal ta voʼ skotol li chopol krixchanoetike. Pe mu skʼan ti akʼo xlaj li chonbolometik xchiʼuk li tukʼil Noee. Jaʼ yuʼun laj yalbe Noé ti akʼo smeltsan junuk arkae, jaʼ xkaltik, jun mukʼta natil kaxa sventa te tsnakʼ sbaik ta yut xchiʼuk li jaytos stsʼunbal chonbolometike. Li Noee la xchʼunbe smantal li Diose xchiʼuk jalij 40 o 50 jabil sventa spas yuʼun li arkae. Ti vaʼ sjalil echʼe, li Noé xtoke «laj yalbe scʼoplal ti lequil tuqʼuil[ale]» (2 Pedro 2:5). Laj yalbe krixchanoetik ti jutuk xa skʼan xtal li Nojelal ta voʼe, pe muʼyuk buchʼu la xchʼun. Vaʼun kʼot yorail ti ochik ta arka li Noé, yutsʼ yalal xchiʼuk li chonbolometike. Te une li Diose la smak li stiʼ arkae xchiʼuk lik yakʼ voʼ.

Li tsatsal voʼ laj yakʼe, ti jalij 40 kʼakʼal xchiʼuk 40 akʼobale, la snojes ta voʼ spʼejel li Balumile. Mi jutebuk senyail kom li chopol krixchanoetike. Kʼalal echʼ xaʼox jayibuk ue, lik yaluk li voʼe, vaʼun li arkae kaji ta jun mukʼta vits. Jun xaʼox jabil echʼ kʼalal lokʼik ta arka li Noé xchiʼuk yutsʼ yalale. Sventa tstojbe ta vokol Jeova li Noee laj yakʼbe jun chikʼbil matanal. Li Diose laj yalbe ti muʼyuk xa chakʼ talel jun nojelal ta voʼ sventa tslajes li kuxlejaletik ta Balumile. Jaʼ yuʼun laj yakʼ li vaknakʼobale, yuʼun jaʼ sventa tsvulesbe ta sjol krixchanoetik li kʼusi yaloje.

Kʼalal echʼ xaʼox li Nojelal ta voʼe, li Diose laj yakʼ achʼ mantaletik. Laj yal ti xuʼ stiʼik chonbolometik li krixchanoetike, pe laj yal ti mu xuʼ slajesik li chʼichʼe. Xchiʼuk laj yal xtok ti akʼo spuk sbaik batel ta balumil li krixchanoetike, pe oy buchʼutik muʼyuk la xchʼunik. Li krixchanoetike lik stsob sbaik, pasbilik ta mantal yuʼun jun vinik ti Nimrod sbie, vaʼun lik svaʼanik jun mukʼta tayal kʼelob osil ta steklumal Babel, ti Babilonia laj yichʼ biiltasel ta tsʼakale. Li kʼusi la spasike lek jamal la skontrainbe li smantal Diose. Pe li Diose la sokes li kʼusi snopoj li jtoybaetike, la sokesbe li jun noʼox skʼopik chkʼopojike, vaʼun lik kʼopojikuk ta epal kʼopetik. Ta skoj ti mu xaʼibe sba skʼopike, lubtsajik, vaʼun la spuk sbaik batel.

(Lokʼem ta kapitulo 6 kʼalal ta 11 yuʼun Génesis xchiʼuk ta Judas 14, 15.)