¿Kʼuxi xuʼ xmuyubajik li utsʼ alaliletike?

1. ¿Kʼu yuʼun tsots skʼoplal li nupunel ta registro civile?

Li Jeovae, ti jaʼ jun Dios ti xmuyubaje xchiʼuk ti jaʼ yakʼoj tal li lekil aʼyejetike, tskʼan ti xmuyubaj li utsʼ alaliletike (1 Timoteo 1:11). Jaʼ la slikes li nupunele. Li nupunel ta registro civile tsots skʼoplal sventa lek stsʼites yalab xnichʼnabik li nupultsʼakaletike xchiʼuk jaʼ sventa oyuk muyubajel li ta utsʼ alalile. Li yajtsʼaklomtak Kristoe skʼan xchʼunik li smantaltak ajvaliletik ta sventa li nupunele. Kʼelo Lukas 2:1, 4, 5.

Li Diose tskʼan ti jaʼuk sventa sjunul xkuxlejal xilik nupunel li vinik xchiʼuk antse. Li Jeovae tskʼan ti tukʼ xakʼ sbaik ta jujuntal li malalil xchiʼuk li ajnilale (Ebreos 13:4). Li stuke tspʼaj li sutesejbail ta registro civile (Malakias 2:16). Akʼo mi jech, li Jeovae chal ti xuʼ sutes snup xchiʼil xchiʼuk xnupun yan velta mi mulivaj li snup xchiʼile. Kʼelo Mateo 19:3-6, 9.

2. ¿Kʼu yelan skʼan xil sbaik li nupultsʼakale?

Kʼalal la spas baʼyel vinik xchiʼuk baʼyel ants li Jeovae, jaʼ sventa koʼol skolta sbaik li ta snupunelike (Jenesis 2:18). Li malalile jaʼ jolil li ta yutsʼ yalale, jaʼ yuʼun, jaʼ oy ta sba saʼel li kʼusitik chtun yuʼun li yutsʼ yalale xchiʼuk ti xchanubtas sventa Diose. Jech xtok, ta skoj ti skʼanoj li yajnile, skʼan jaʼ mas oyuk ta yoʼonton, maʼuk li kʼusi tskʼan stuke. Li nupultsʼakale skʼan xichʼ sbaik ta mukʼ xchiʼuk skʼan sbaik. Ta skoj ti jsaʼmulil xchaʼvoʼalike, skʼan snaʼ xakʼ sbaik ta perton sventa xmuyubajik-o. Kʼelo Efesios 4:31, 32; 5:22-25, 33; 1 Pedro 3:7.

3. ¿Mi xuʼ xtuchʼ snupunel li buchʼu muʼyuk xmuyubaje?

Mi oy skʼopik junuk nupultsʼakale, skʼan xakʼik ta ilel ti skʼanoj sbaik kʼalal chchapanike (1 Korintios 13:4, 5). Li ta nupunele stalel onoʼox ti chlik kʼope, pe li Skʼop Diose muʼyuk chal mi jaʼ chchapaj-o mi la xtuchʼ snupunelike. Kʼelo Kʼelo 1 Korintios 7:10-13.

4. ¿Kʼusi oy ta yoʼonton Dios ta stojolal li alab nichʼnabiletike?

Li Jeovae tskʼan ti xmuyubaj li alab nichʼnabiletike. Jaʼ yuʼun, chchanubtas kʼuxi xuʼ skʼupin xkuxlejalik kʼalal kerem tsebik toe. Jech xtok, tskʼan ti stabeik sbalil li kʼusitik snaʼik li stot smeʼike xchiʼuk li kʼusitik xchanoj ta xkuxlejalike (Kolosenses 3:20). Pe li kʼusi tskʼan xtoke, jaʼ ti akʼo sta smuyubajelik kʼalal chtunik ta stojolale xchiʼuk ta stojolal li Xnichʼone. Kʼelo Eklesiastes 11:9–12:1; Mateo 19:13-15; 21:15, 16.

5. ¿Kʼusi xuʼ spas totil meʼiletik sventa xmuyubajik noʼox li yalab xnichʼnabike?

Li totil meʼiletike skʼan oyuk ta yoʼontonik xakʼbeik sveʼel, skʼuʼ spokʼ xchiʼuk ti bu xuʼ xnaki li yalab xnichʼnabike (1 Timoteo 5:8). Pe maʼuk noʼox taje. Yuʼun skʼan xchanubtasik sventa skʼanik xchiʼuk xchanbeik stalelal li Diose (Efesios 6:4). Kʼalal skʼanojik tajek Dios li totil meʼiletike, li alab nichʼnabiletike solel chtijbat yoʼontonik sventa jech spasik ek. Kʼalal chichʼik chanubtasel ta Skʼop Diose, xuʼ lek chbat li kʼusitik tsnopike. Kʼelo Deuteronomio 6:4-7; Proverbios 22:6.

Li alab nichʼnabiletike skʼan patbel yoʼontonik xchiʼuk kʼupil kʼoptael kʼalal oy kʼusi lek tspasike. Bakʼintike, lek ti chichʼik albel mantale xchiʼuk ti chichʼik tukʼibtasele, yuʼun jaʼ jech mu spasik li kʼusitik xuʼ sta-o svokolike (Proverbios 22:15). Akʼo mi jech, li tukʼibtasele skʼan me ta smeloluk noʼox, maʼuk ti batsʼi tsotsik tajeke. Kʼelo Kolosenses 3:21.

Li stestigotak Jeovae slokʼesojik epal livroetik ti jaʼ sventa totil meʼiletik xchiʼuk alab nichʼnabiletike. Ta Vivlia lokʼesbil skotol. Kʼelo Salmo 19:7, 11.