XCHANOBIL 24

Skartatak Pablo sventa tsobobbailetik

Li Pabloe tstak batel kartaetik sventa tstsatsubtasbe yoʼonton li yajtsʼaklomtak Cristoe

LI TSOBOBBAIL yuʼun yajtsʼaklom Cristo ti jaʼ to like, oy kʼusi tsots skʼoplal tspas sventa chkʼot ta pasel li kʼusi tskʼan yoʼonton Jeovae. Pe li yajtsʼaklomtak Cristoe laj yichʼik nutsel xchiʼuk oy kʼusitik xibal sba tsnuptanik li ta yut tsobobbaile. ¿Kʼuxi laj yutik ti tukʼ laj yakʼ sbaike? Li 21 kartaetik ti te tsakal ta Tsʼibetik ta Griego Kʼop ti chalbe skʼoplal Cristoe tsatsubtasbat yoʼontonik xchiʼuk akʼbatik li mantaletik chtun yuʼunike.

Jaʼ la stsʼiba Pablo li baʼyel chanlajuneb kartaetike, chlik ta karta sventa Romanos kʼalal ta karta sventa Hebreos. Li kartaetik taje jaʼ yichʼojbe sbi li buchʼu la stakbe batele, mi jaʼ jun krixchano o jun tsobobbail. Jkʼeltik jlomuk kʼusitik laj yalbe skʼoplal li jtakbole.

Li talelalile. Li buchʼutik chmulivajik, tsloʼla xchiʼilik ta nupunel o tspasik yan tsatsal mulil ti muʼyuk tsutes yoʼontonike «mu xuʼ chventainatic o yuʼun li Diose» (Gálatas 5:19-21; 1 Corintios 6:9-11). Li buchʼutik chichʼik ta muk Jeovae skʼan jmoj tsobolik akʼo mi jelel slumalik (Romanos 2:11; Efesios 4:1-6). Skʼan akʼo lekuk yoʼontonik xchiʼuk skoltaik li yermanotakik ta chʼunolajele (2 Corintios 9:7). Li jtakbole la stijbe yoʼonton sventa chalbeik Jeova li kʼusi oy ta yoʼontonike xchiʼuk xi albatike: «Cʼopanic Dios scotol cʼacʼal» (1 Tesalonicenses 5:17; 2 Tesalonicenses 3:1; Filipenses 4:6, 7). Pe sventa chchikintabat s-orasionik yuʼun Jeovae, skʼan oyuk xchʼunel yoʼontonik (Hebreos 11:6).

¿Kʼusi mantaletik laj yal Pablo ta sventa li utsʼ-alaletike? Li malaliletike skʼan chkʼuxubin yajnilik jech kʼuchaʼal skʼanoj sba stukike. Jech li ajnilaletik eke, skʼan xichʼ ta mukʼ ta sjunul yoʼontonik li smalalike. Jech noxtok, li Diose oy ta yoʼonton ti akʼo xchʼunbeik smantal stot smeʼik li alab-nichʼnabiletike, li totil-meʼiletik eke skʼan ta xkʼuxul yoʼonton stsʼites li yalab xnichʼnabike xchiʼuk ti jechuk kʼuchaʼal chal li mantaletik ta Vivliae (Efesios 5:22–6:4; Colosenses 3:18-21).

Li kʼusi tskʼan tspas Diose. Li sMantal Moisese la xchabi xchiʼuk la sbeiltas li j-israeletik jaʼ to kʼalal ivul li albil Mesiase, pe li yajtsʼaklomtak Cristoe mu xa persauk skʼan xchʼunik li mantal taje (Gálatas 3:24). Li ta skarta sventa Hebreose —yajtsʼaklomtak Cristo ti jaʼ judioetike—, li Pabloe laj yalbe smelolal kʼu yuʼun laj yichʼ akʼel li Mantale xchiʼuk li yabtel tspas Cristo sventa chkʼot ta pasel li kʼusi tskʼan yoʼonton Diose. Laj yal ti ep kʼusitik chal li Mantale jaʼ albil kʼopetik. Jech kʼuchaʼal liʼe, li milbil matanaletik chakʼike jaʼ skʼelobil li matanal chakʼ Jesús ta tsʼakale, ti jaʼ ta jtatik-o perton yuʼun jmultike (Hebreos 10:1-4). Jaʼ yuʼun, kʼalal cham li Cristoe muʼyuk xa sbalil kom li trato la spas Jeova xchiʼuk j-israeletike (Colosenses 2:13-17; Hebreos 8:13).

Yakal chaʼiik kʼusi chal jlik skarta Pablo jun stsobobbail yajtsʼaklom Cristo ta baʼyel siglo

Ti kʼuyelan lek chapanbil li tsobobbaile. Li viniketik ti chichʼ akʼbel yabtelik ta tsobobbaile oy kʼusi chichʼik kʼanbel ta sventa stalelalik xchiʼuk ti spasuk yuʼunik li kʼusitik skʼan pasel chal Vivliae (1 Timoteo 3:1-10, 12, 13; Tito 1:5-9). Jech noxtok, tsots skʼoplal ti stsobilan sbaik li yajtuneltak Diose sventa chichʼik mantaletik ti toj tsotsik skʼoplale xchiʼuk ti stsatsubtasbe sba yoʼontonike (1 Corintios 14:26, 31; Hebreos 10:24, 25).

Kʼalal la stsʼiba li slajeb skarta Pabloe —li xchibal sventa Timoteoe— te chukul yan velta ta Roma, ti te tsmala kʼusi ora chchapanate. Junantik noʼox yajtsʼaklom Cristo ti mu snaʼ xiʼik ti ay svulaʼanike. Ta skoj ti snaʼoj ti jutuk xa skʼan xchame, xi laj yale: «Ivuʼ xa cuʼun stsalel li cajcontrae. Icuch xa cuʼun li tsots anil jbatsʼil toʼoxe. Staoj yav oy xchʼunojel coʼnton o» (2 Timoteo 4:7). Xuʼ van mu xa jaluk kuxul, yuʼun laj yichʼ onoʼox milel. Akʼo mi jech, li skartatake la skoltaan batel li melel yajtsʼaklomtak Cristo sventa tukʼ xtunik ta stojolal li Diose, jech-o li ta jkʼakʼaliltike.

(Lokʼem ta Romanos, 1 Corintios, 2 Corintios, Gálatas, Efesios, Filipenses, Colosenses, 1 Tesalonicenses, 2 Tesalonicenses, 1 Timoteo, 2 Timoteo, Tito, Filemón xchiʼuk Hebreos.)

¿BUCHʼU JAʼ LI ALBIL NITILULALE?

Kʼalal tsʼujik xaʼox ta mulil li Adán xchiʼuk Evae, li Diose xi laj yalbe ta lokʼolkʼop li kiletel chone: «Ta xcacʼ ti acontra abaic chacom o achiʼuc li antse. Jech ta xcom o cʼalal ta avalab anichʼnab xchiʼuc syalʼalabtac li antse. Li syalʼole ta to xlic xvochʼbot ajol; yan li voʼote jaʼ noʼox chatiʼbe xchac yacan» (Génesis 3:15). Jech kʼuchaʼal chal Apocalipsis 12:9, «li chon ta voʼonee» jaʼ li Diabloe. Pe ti buchʼu jaʼ li syal-ol o snitilulal ti chpechʼbe ta tekʼel sjol li kiletel chone muʼyuk toʼox buchʼu snaʼoj, epal siglo ta kʼunkʼun laj yalbe smelolal li Vivliae.

Chaʼmil jabil ta mas tsʼakal kʼalal tsʼujik ta mulil li Adán xchiʼuk Evae, li Jeovae laj yal ti ta snitilulal Abraham chlik talel li albil Jpojvaneje (Génesis 22:17, 18). Epal siglo ta tsʼakale, li jtakbol Pabloe laj yal ti sbavokʼal nitilulale jaʼ li Mesiase, jaʼ xkaltik, li Jesuse (Gálatas 3:16). Jech kʼuchaʼal chal Génesis 3:15 li Cristoe laj yichʼ tibel «xchac yacan» kʼalal chame. Manchuk mi jech, li Diose la xchaʼkuxes li Jesuse, «ichaʼcuxi xchiʼuc achʼ sbecʼtal ta sventa Espíritu» (1 Pedro 3:18).

Jech noxtok, li Diose la snop ti akʼo oyuk 144,000 krixchanoetik sventa chkʼotik ta xchaʼvokʼal nitilulale (Gálatas 3:29; Apocalipsis 14:1). Mi chamike chichʼik chaʼkuxesel kʼuchaʼal espirituetik ta vinajel xchiʼuk jmoj ch-ajvalilajik xchiʼuk Cristo (Romanos 8:16, 17).

Li Jesús ti jaʼ li Ajvalil ta vinajele, poʼot xa skʼan xakʼbe slajeb li Diablo xchiʼuk snitilulale, ti jaʼ li pukujetike xchiʼuk li chopol krixchanoetik ti oyik ta stojolal Satanase (Juan 8:44; Efesios 6:12). Li ajvalilal tspase chichʼ talel lekilal xchiʼuk muyubajel ta stojolal li buchʼutik tukʼ oyik ta stojolal Diose. Ta slajeb une, li Jesuse chvochʼbe ta tekʼel sjol li kiletel chone, tslajesbe skʼoplal (Hebreos 2:14).