Tojobtaseletik sventa xchʼunel oʼontonal, talelal xchiʼuk kʼanelal

JAʼ TOʼOX xchaʼitsʼinabtak Jesús li Santiago xchiʼuk Judase, li Pedro xchiʼuk Juane jaʼ toʼox yajtakboltak. Ta xchanvoʼalike la stsʼibaik vukub kartaetik ti te ta jtatik ta Tsʼibetik ta Griego Kʼop ti chalbe skʼoplal Cristoe, ti jaʼ yichʼojbeik sbi li buchʼutik la stsʼibaike. Li kʼusi stu ti laj yichʼ tsʼibaele jaʼ ti akʼo skolta yoʼ tukʼ yoʼontonik li yajtsʼaklomtak Cristoe xchiʼuk ti mu xchʼay ta satik li Ajvalilal yuʼun Diose.

Yakʼel ta ilel xchʼunel oʼontonal. Mu baluk noʼox ti chkaltik oy chʼunel koʼontontike, skʼan chkakʼtik ta ilel ta kʼusitik ta jpastik. Jech kʼuchaʼal chal Santiagoe, «li xchʼunojel coʼntontic me muʼyuc yabtelale, chamen chcom» (Santiago 2:26). Li buchʼu oy xchʼunel yoʼonton tstsal prevaetike mas to tstsatsub. Jech noxtok, xuʼ skʼanbe spʼijil Dios, xuʼ spat yoʼonton ti ch-akʼbate. Mi tukʼ-o yoʼonton ta stojolal Jeovae, lek ch-ilat-o (Santiago 1:2-6, 12). Li Diose ta onoʼox skolta li buchʼu tukʼ stalelal xchiʼuk tukʼ yoʼontone. Jaʼ yuʼun xi chal li Santiagoe: «Nopajanic ta stojol li Diose, jech chnopaj ta atojolic ec» (Santiago 4:8).

Li yajtsʼaklomtak Cristoe skʼan stsatsubtas li xchʼunel yoʼontonik sventa chkuch yuʼunik li lajtsaele xchiʼuk li kʼusitik tsokesvane. Li Judas ti te nakal bu ep chmulivajike, chal mantal ti akʼo «[xakʼbeik] tsots yipal sventa li chʼunel oʼontonale» (Judas 3, NM).

Sakil talelalil. Li Jeovae tskʼan ti chʼulikuk xchiʼuk sakikuk ta skotol li yajtuneltake. Xi la stsʼiba li Pedroe: «Aqʼuic ta qʼuelel ti lecuc [chʼuluk] ti acuxlejalique, [...] yuʼun xi ta xal ti chʼul cʼope: “Mu xaticʼ abaic ta spasel ti cʼusi chopole, yuʼun ti vuʼune jaʼ Chʼul Diosun» (1 Pedro 1:15, 16, Ch). Sventa jech tspasike, xuʼ xchanbeik stalelal li Cristoe, yuʼun jech kʼuchaʼal laj yal li jtakbole, jaʼ akʼbat yilik komel «yuʼun jech acʼo [s]tsʼaclinic batel» (1 Pedro 2:21). Akʼo mi mu kʼunuk chaʼiik xchʼunel li smantaltak Diose, li kʼusi tsots skʼoplale jaʼ ti mu kʼusi xloʼilaj-o sjol yoʼontonike (1 Pedro 3:16, 17). Li Pedroe chal ti tsots skʼoplal ti sakuk stalelalike xchiʼuk ti akʼo xakʼik ta ilel ta kʼusitik tspasik ti yichʼojik ta mukʼ Diose yoʼ to tsmalaik chtal li sKʼakʼalil Chapanele xchiʼuk li albil achʼ balumile, ti «bu puru tucʼ xa cʼusitic te oye» (2 Pedro 3:11-13).

Yakʼel ta ilel kʼanelal. «Li Diose jaʼ stalel ta xcʼanvan o», xi chal li Juane. Li Jeovae laj yakʼ ta ilel kʼu to yepal skʼanojutik kʼalal la stak tal xNichʼon sventa chkʼot ta «milbil matanal [...] sventa jmultic». ¿Kʼusi tstij koʼontontik ta spasel taje? Xi chalbe smelolal li Juane: «Voʼoxuc ti lec jcʼanojoxuque, me jaʼ jech la scʼanutic li Diose, jaʼ jech tscʼan ta jcʼanan jbatic ec» (1 Juan 4:8-11). Jtos ti kʼuyelan chkakʼtik ta ilel ti jkʼanojtik li kermanotaktik ta chʼunolajele jaʼ kʼalal lek jnaʼ xi jchʼamvanutike (3 Juan 5-8).

¿Kʼu yelan chakʼik ta ilel li yajtsʼaklomtak Cristo ti skʼanojik Jeovae? Xi tstakʼ li Juane: «Me jcʼanojtic o li Diose, ta jchʼunbetic li smantaltaque. Muʼyuc tsots ta chʼunbel chcaʼitic li smantaltaque» (1 Juan 5:3; 2 Juan 6). Li buchʼutik chchʼunbeik smantal Diose snaʼojik ti xuʼ skʼupinik ti chkʼanatik-o yuʼun li Diose, li buchʼu «chacʼ [kuxlejal] sventa sbatel osile» (Judas 21).

(Lokʼem ta Santiago, 1 Pedro, 2 Pedro, 1 Juan, 2 Juan, 3 Juan xchiʼuk Judas.)