¿Kʼusi chkʼot ta stojolal li  relijionetike?

1. ¿Mi lek skotol li relijionetike?

Li ta relijionetike oy krixchanoetik ti bikʼit yakʼoj sbaike xchiʼuk ti oy ta yoʼontonik li kʼusi melele. Li Diose oy ta yoʼonton xchiʼuk oy sbalil chil li krixchanoetik taje, jaʼ me jun lekil aʼyej taje. Chopol ta aʼiel, pe oy ep kʼusitik chopol spasojanik li buchʼutik oyik ta relijione (2 Korintios 4:3, 4; 11:13-15). Li notisiaetik ti chlokʼ ta television o ta radioe chalik ti oy jlom relijionetik stikʼoj sbaik ta terrorismo, ta smilel epal krixchanoetik, ta paskʼop xchiʼuk tsmajik o chchiʼinik ta vayel ololetik sventa chilbajinik. Taje tsvul-o tajek yoʼontonik li buchʼutik ta sjunul yoʼonton xchʼunojik Diose. Kʼelo Mateo 24:3-5, 11, 12.

Li melel relijione yakal chichʼ ta mukʼ Jeova, pe li jecheʼ relijione chopol chil. Yuʼun li jecheʼ relijionetike jutbil li kʼusitik chakʼik ta chanel ta sventa Diose, ta sventa ti bu oy li animaetike xchiʼuk yan kʼusitik ti mu jechuk chchanubtasvan li Vivliae. Li Jeovae oy yoʼonton ti akʼo xojtikinik lek li kʼusi melel ta stojolale. Kʼelo Esekiel 18:4; 1 Timoteo 2:3-5.

2. ¿Kʼusi chkʼot ta stojolal li relijionetike?

Li Diose mu xakʼ sba ta loʼlael ta stojolal li relijionetik ti chalik ti skʼanojike, pe ti jaʼ skʼanojik li sbalumil Satanase (Santiago 4:4). Kʼalal «Mukʼta Babilonia» xi li Vivliae, jaʼ chalbe skʼoplal skotol li jecheʼ relijionetike. Li Babiloniae jaʼ jech toʼox sbi jun voʼneal jteklum ti bu lik talel li jecheʼ relijion kʼalal echʼ xa ox li Nojelal ta voʼ ta skʼakʼalil Noee. Li Diose jutuk xa me skʼan xakʼbe slajeb li jecheʼ relijionetik ti jaʼ noʼox tsloʼla xchiʼuk chakʼbe svokol li krixchanoetike. Kʼelo Apokalipsis 17:1, 2, 5, 16, 17; 18:8.

Li Jeovae muʼyuk xchʼayoj ta sjol li krixchanoetik ti te oyik ta jecheʼ relijione xchiʼuk yakal xa tstsob lokʼel tal. ¿Kʼuxi tspas? Jaʼ ti yakal chakʼbe xchan li kʼusi melele. Kʼelo Mikeas 4:2, 5.

3. ¿Kʼusi skʼan spasik li krixchanoetik ti oy ta yoʼontonik li kʼusi melele?

Li Jeovae oy ta yoʼonton li buchʼutik lek chaʼiik li kʼusi melele xchiʼuk ti oy ta yoʼonton tspasik li kʼusi leke. Jaʼ yuʼun, chalbe ti akʼo xlokʼik li ta jecheʼ relijione. Mi skʼanojik ta melel li Diose, ta sjunul yoʼonton tsjel xkuxlejalik sventa lekuk x-ilatik. Kʼelo Apokalipsis 18:4.

Li ta baʼyel sigloe, epal krixchanoetik lek la xchʼamik li mantal laj yal jtakboletike. Li krixchanoetik taje la sjel xkuxlejalik: mas xa xmuyubajik, oy xa smelolal xkuxlejalik xchiʼuk oy xa spatobil yoʼontonik. Li voʼotik eke skʼan me jchʼamtik li mantal chal Vivlia ti akʼo xkakʼ baʼyel ta jkuxlejaltik li kʼusi tskʼanbutik Jeovae. Kʼelo 1 Tesalonisenses 1:8, 9; 2:13.

Ta sjunul me yoʼonton chchʼam Jeova li buchʼutik chiktaik komel li jecheʼ relijione xchiʼuk ti chchʼamik li mantale. Skotol li buchʼutik chiktaik li jecheʼ relijione lek chil sbaik xchiʼuk li Diose, chkʼanatik yuʼun li ermanoetik ta tsobobbaile xchiʼuk xuʼ xkuxiik sbatel osil ta balumil. ¿Mi oy ta avoʼonton chakʼupin li bendisionetik taje? Kʼelo Markos 10:29, 30; 2 Korintios 6:17, 18.

4. ¿Kʼusi tspas Dios sventa oyuk lekilal xchiʼuk muyubajel ta spʼejel balumil?

Kʼalal mi laj yakʼbe slajeb jecheʼ relijionetik li Jeovae, muʼyuk xa me chil svokol li krixchanoetike. Muʼyuk xa me tsloʼla mas krixchanoetik li relijione xchiʼuk muʼyuk xa chchʼak sba yuʼun. Skotol li krixchanoetike jaʼ xa noʼox me stuk chichʼik ta mukʼ li melel Diose. ¿Mi mu jaʼuk jun lekil aʼyej taje? Kʼelo Apokalipsis 18:20, 21; 21:3, 4.