Jaʼ noʼox xatunes ti bu akʼbilote

LI Vivliae tskoʼoltas kʼuchaʼal jbekʼtaltik li tsobobbaile. Akʼo mi toj tsots skʼoplal jujutos li stsʼak jbekʼtaltike, «mu parejouk yabtelik jujutos». Jech li voʼotik eke, skʼan xkakʼbetik yipal sventa lek spas kuʼuntik li kabtel kichʼojtike. Taje smakojbe skʼoplal ti oyuk sbalil xkiltik li jpartetike xchiʼuk ti lek jchapan jbatike, jech xtok mu me jnoptik ti muʼyuk sbalil li jlom temaetik ta skoj ti oy jlom ti mas lek ta aʼiele (Rom. 12:4-8). Li tukʼil xchiʼuk pʼijil mosoile jaʼ sbainojik yakʼel li veʼlil ta mantal «ta yoraile» (Mat. 24:45). Kʼalal ta jtunes jpʼijiltik sventa ta jchapan jpartetik jech kʼuchaʼal albilutike, jech chkakʼtik ta ilel ti ta jtojtik ta vokol ti kʼu yelan chapanbil li veʼlil ta mantale xchiʼuk sventa lek ch-abtej skotol li tsobobbaile.

¿Kʼusitik xuʼ xkalbetik skʼoplal? Jaʼ noʼox me xavalbe skʼoplal li tema akʼbilot li ta Chanob vun sventa Kabteltik yuʼun Diose, mu xavalbe skʼoplal yan tema. Jutuk mu skotoluk velta chavichʼ albel bu skʼan xalokʼes li apartee. Xuʼ xalokʼes ta yan vunetik mi muʼyuk chavichʼ albele. Akʼo mi jech, teuk me ta ajol ti jaʼ noʼox skʼan xavalbe skʼoplal li tema akʼbilote. Sventa xanaʼ kʼusi xuʼ xavalbe skʼoplale, tsako me ta venta li buchʼutik te ta tsobobbaile.

Chano lek li bu chalokʼes apartee xchiʼuk li tekstoetik yichʼoj tale. Nopo kʼuxi lek xuʼ xatunes sventa stabeik lek sbalil li buchʼutik chchikintabote. Kʼalal chajelubtas apartee, tʼujo chib o oxib li kʼusitik mas tsotsik skʼoplale. Jech xtok, tʼujo li tekstoetik chakʼele xchiʼuk ti anopoj chavalbe smelolale.

¿Mi ep skʼan kʼusitik xaval? Jaʼ noʼox xaval ti kʼu yepal xuʼ avuʼun yalbel lek smelolale. Mas me tsots skʼoplal ti lek xachanubtasvane, maʼuk ti ep kʼusi chavalbe skʼoplale. Jaʼ noʼox akʼo ta avoʼonton yalel li kʼusi tskolta yantike sventa spasik li kʼusi chakʼan chata ta apartee xchiʼuk jaʼ xaval li kʼusitik mas oy kʼusi chakʼbe xchan li buchʼutik chaʼibote xchiʼuk ti xuʼ stabeik sbalile. Li kʼusi chchanubtasutik li xchanobil liʼe, maʼuk ti kʼu yepal xuʼ kuʼuntik yalele, jaʼ ti jtunestik li bu akʼbilutik kʼalal chkʼetes jpartetike.

Maʼuk noʼox me skʼan ti ta jpʼelchaʼpʼel noʼox kʼop xaval sjunul li aparte akʼbilote. Chapano aba sventa xajambe mas smelolal jlomuk li kʼusitik tsotsik skʼoplale, albo mas skʼoplal, tuneso lokʼolkʼop xchiʼuk xuʼ xavalbe junuk skʼelobil ti kʼuxi xuʼ xakʼ ta xkuxlejalike. Mi oy to kʼusi chavalbe skʼoplale, jaʼuk me sventa lekuk xcholet xbat ta alel avuʼun smelolal li kʼusi mas tsotsik skʼoplal ta apartee, maʼuk sventa chajel li kʼusi akʼbilote.

Li buchʼutik chchanubtasvanik li ta Tsobajel sventa Tunelale jaʼ ermanoetik ti xtojobike, jech xtok snaʼojik lek ti skʼan te slokʼes sparteik ti bu akʼbilike xchiʼuk ti mu stakʼ sjelike. Li buchʼutik chetʼes li Mantal sventa skotol krixchanoetike chichʼik jlik svoskejoik, akʼo mi xuʼ sjelik jutuk, jamal onoʼox chal li kʼusitik mas tsotsik skʼoplale, ti kʼu yuʼun jech chale xchiʼuk li tekstoetik skʼan skʼel o chapta sventa chetʼes li spartee. Kʼalal chchanik lek stunesel ti bu akʼbil tslokʼes sparteike, jaʼ chchapanatik sventa sjelubtasik yan mantaletik.

Mi la achan spasel li xchanobil liʼe, tskoltaot me xtok sventa mas xatojob ta yakʼel chanubtasel ta Vivlia ti xuʼ xchʼiik ta mantal li krixchanoetike. Akʼo mi lek ta aʼiel li yantik aʼyej eke, chatojob batel mi jaʼ noʼox chatunes li kʼusi yakal chachanike, jech xtok maʼuk xa me xaval li kʼusi muʼyuk snitojbe sba skʼoplal xchiʼuk li kʼusi yakal chachanike xchiʼuk li kʼusi mu to persauk skʼan snabe smelolale. Mi laj avaʼibe smelolal li xchanobil liʼe, maʼuk me skʼan xal ti solel mu xa stakʼ xavalbe smelolal li kʼusi tsjakʼbot li buchʼu chachanubtas ta Vivliae.