Vokʼ xa li jchapanej bee

Poʼot xa tajek xvokʼ sneneʼ li Elisabete. Oy xa ta yoxibal u te xchiʼuk Elisabet li Mariae. Li avi une jaʼ xa yorail tsut batel ta snorteal svitstikaltik Judea li Mariae, yuʼun te nakal ta Nasaret, nom to tajek ti bu chbate. Jaʼ jech ek, leʼtik xa noʼox batel ta vakib u ch-ayan li sneneʼe.

Vokʼ sneneʼ li Elisabet kʼalal mu toʼox jaluk sbatel li Mariae. ¡Xmuyubajik tajek ti lek la xkux li Elisabete xchiʼuk ti lek oy li yuni neneʼe! Laj yakʼbe yil slakʼnatak xchiʼuk yutsʼ yalaltak, vaʼun jmoj xkuxet yoʼontonik xchiʼuk Elisabet ti vokʼ yuni neneʼe.

Jech kʼuchaʼal chal li Smantal Dios ti akʼbatik li j-israeletike, skʼan la xichʼ sirkunsision ta xvaxakibal kʼakʼal li uni kereme xchiʼuk jaʼo te chichʼ akʼbel sbi xtok (Levítico 12:2, 3). Oy buchʼutik tsnopik ti jaʼ skʼan xichʼbe sbi stot li yol Elisabete. Pe xi tsots laj yal li Elisabete: «¡Moʼoj! Juan chichʼ akʼbel sbi» (Lukas 1:60). ¿Mi xvul ta ajol ti laj yal anjel Gabriel ti Juan skʼan xakʼbeik sbi li uni olole?

Pe xi laj yal li slakʼnatakik xchiʼuk yutsʼ yalalike: «Muʼyuk buchʼu jech sbi li ta avutsʼ avalale» (Lukas 1:61). Vaʼun lik sjakʼbeik Sakarias ta senya kʼusi sbi chakʼbe li skereme. Te une la skʼan jpech tavla sventa tstsʼibabe li sbie. Xi la stsʼibae: «Juan sbi» (Lukas 1:63).

Oy kʼusi toj labal sba kʼot ta pasel, ¡lik kʼopojuk li Sakariase! ¿Mi xvul ta ajol ti kʼu yuʼun mak yee? Jaʼ ti muʼyuk la xchʼun li kʼusi albat yuʼun li anjele, jaʼ xkaltik, ti albat ti chchiʼin yol li yajnile. Vaʼun kʼalal lik kʼopojuk li Sakariase, labal to sba laj yilik li slakʼnatake xchiʼuk xi laj yalbe sbaike: «¿Kʼusi van yabtel chbat li uni olole?» (Lukas 1:66). Jaʼ to te laj yaʼibeik smelolal ti jaʼ jech tskʼan Dios ti Juan tsbiin li uni kereme.

Vaʼun och chʼul espiritu ta yoʼonton li Sakariase, xi laj yale: «Akʼo yichʼ kʼupil kʼoptael li Jeovae, li Dios yuʼun Israele, yuʼun laj yakʼ sat ta stojolal li steklumale xchiʼuk ta skolta. Laj yakʼbutik jun tsatsal jkoltavanej li ta snitilulal Davide, jaʼ li yajtunele» (Lukas 1:68, 69). Li «tsatsal jkoltavanej» taje jaʼ li Kajvaltik Jesus ti muʼyuk to bu vokʼeme. Xi laj yal Sakarias ta sventa taje: «Sventa xakʼbutik [Dios] li matanal ta spasbel li xchʼul abtel ti muʼyuk xa xiʼel chkaʼitike, yuʼun laj xaʼox spojutik lokʼel ta skʼob li kajkontrataktike sventa tukʼuk koʼontontik xchiʼuk ti jaʼuk jpastik ta sjunul jkuxlejaltik li kʼusi tukʼe» (Lukas 1:74, 75).

Xi laj yalbe skʼoplal xnichʼon li Sakariase: «Li voʼote, uni olol, chavichʼ albel akʼoplal ti jaʼ yaj-alkʼopot li Buchʼu toj toyol oye, yuʼun voʼot jbabe chajelav ta stojolal Jeova sventa chachapanbe sbe, sventa chavakʼ ta ojtikinel li kolebal tsta li steklumal ta sventa ti chichʼ pasbel perton smulik ta skoj ti kʼuxutik ta yoʼonton li Dios kuʼuntike. Ta skoj li xkʼuxul oʼontonal taje ta xtal svulaʼanutik li sakil osil jech kʼuchaʼal li sakil osil ta sob ti likem tal ta toyole, sventa chakʼbe sakil osil li buchʼutik oyik ta ikʼal osile, li buchʼutik oyik ta snakʼobal lajelale xchiʼuk sventa tukʼ sbeiltas batel koktik li ta sbelel jun oʼontonale» (Lukas 1:76-79). ¡Solel tspat tajek koʼontontik li albil kʼop taje!

Te xa oy ta sna ta Nasaret li Mariae, pe muʼyuk to bu malijem yaʼel. Jaʼ yuʼun, ¿kʼusi van tspas ti poʼot xa xvinaj ti xchiʼuk yole?