Keremetik, ¿mi oy ta avoʼonton chataik lekil abtel?
1. ¿Kʼusi ora skʼan xakʼ ta yoʼontonik spasel kʼusi chal 1 Timoteo 3:1 li chex keremetike?
1 «Jaʼ lequil abtel ti tscʼan tspasic li buchʼutic ta sloqʼuel yoʼonic» oy kʼusi tskʼan tstaike (1 Tim. 3:1, Achʼ Testamento, ta skʼop San Andrés). Li kʼusi laj yakʼ ta naʼel Dios taje jaʼ sventa tstijbe yoʼonton keremetik yoʼ xakʼ ta yoʼontonik stael abtelaletik ta tsobobbail. ¿Mi persa van skʼan mukʼta krixchanoot xa sventa xata taje? Ta melel, kʼalal keremot toe jaʼo lek tajek sventa xavakʼ ta avoʼonton stael lekil abtel. Mi jech chapase yakal chavakʼ ta ilel ti xuʼ lek xakʼot ta yajkoltaobba mol mi lakʼot ta mukʼta krixchanoe (1 Tim. 3:10). Mi chex keremot ti avichʼoj xa voʼe, ¿kʼusi skʼan xapas sventa xata taje?
2. ¿Kʼuxi xuʼ xanopes aba ti chavakʼ avokol chakoltavane xchiʼuk kʼuxi xuʼ xavakʼ ta ilel?
2 Yakʼoj svokolik ta koltavanej. Vuleso ta ajol ti jaʼ oy ta avoʼonton chata jun lekil abtele, maʼuk ti xavichʼ ojtikinele. Jech oxal, nopeso aba ti oyuk ta avoʼonton skoltael li ermanoetike. Jaʼ tskoltaot ti xanopbe lek skʼoplal li slekil talelal Jesuse (Mat. 20:28; Juan 4:6, 7; 13:4, 5). Kʼanbo koltael Jeova sventa oyuk ta avoʼonton li yantike (1 Cor. 10:24). ¿Mi oy van kʼusi xuʼ xakolta-o li mol meʼeletike xchiʼuk li buchʼutik ipike? ¿Mi oy ta avoʼonton chakoltavan ta xjachʼel o ta setel yaxal, xchʼubabel spat xokon salon xchiʼuk li kʼusitik skʼan pasel sventa lekuk noʼox xvinaje? ¿Mi oy ta avoʼonton chakoltavan ta yakʼel junuk mantal li ta Chanob vun sventa Kabteltik yuʼun Dios kʼalal oy buchʼu mu xuʼ yuʼune? Te chavakʼ venta ti chamuyubaj mi chakoltavane (Hech. 20:35).
3. ¿Kʼu yuʼun tsots skʼoplal ti lekuk oyot ta mantale xchiʼuk kʼusi xuʼ xapas sventa xata?
3 Skʼan lek oyot ta mantal. Taje toj tsots skʼoplal sventa xakʼot ta yajkoltaobba mol, jaʼ mu sta ti oy kʼusi xatojob spasele o ti ep kʼusitik xanaʼ spasele. Tstsak ta venta Jeova xchiʼuk Jesús li kʼusitik tspas jun vinik ti lek ta mantale (1 Cor. 2:15, 16). Jech xtok, chakʼ ta ilel «li yabtel Chʼul Espiritue» (Gál. 5:22, 23). Li buchʼu baʼyel chakʼ ta xkuxlejal li Ajvalilal yuʼun Diose baxbol ta xcholel mantal (Mat. 6:33). Kʼalal nopajtik noʼox chachanilan ta atuk li Vivliae xuʼ me xlik chʼiuk ta atojolal lekil talelaletik. Taje te smakojbe skʼoplal ti jujunuk kʼakʼal xachan li Vivliae, ti xakʼel skotol li revistaetik ¡Despertad! xchiʼuk Li Jkʼel osil ta toyole, skʼan xachapan aba xchiʼuk xabat ta tsobajel (Sal. 1:1, 2; Heb. 10:24, 25). Kʼalal la stijbe yoʼonton kerem Timoteo sventa xchʼi ta mantale, xi laj yal li Pabloe: «Qʼuelo me [...] lec ti cʼu xʼelan chachanubtasvane» (1 Tim. 4:15, 16). Li voʼot eke skʼan tsots xa-abtej sventa chajelubtas mantal li ta Chanob vun sventa Kabteltik yuʼun Diose. Chapano aba sventa chalokʼ ta cholmantal xchiʼuk nopajtik noʼox jech xapas. Abtejan xchiʼuk nopo jtosuk kʼusi chakʼan chata ta mantal. Jech kʼuchaʼal liʼe, xuʼ xa-och ta prekursor, chbat tunan ta Betel o ti xabat li ta Chanob vun ta Vivlia sventa Ermanoetik ti Chʼabal Yajnilike. Mi lek oyot ta mantale jaʼ tskoltaot sventa mu xapas li «cʼusi stalel ta scʼupin li queremetique» (2 Tim. 2:22).
4. ¿Kʼu yepal sbalil ti snaʼik ti spas avuʼun xchiʼuk ti xuʼ spat yoʼontonik ta atojolale?
4 Akʼbo snaʼik ti spas avuʼun xchiʼuk ti xuʼ spat yoʼontonik ta atojolale. Lek skʼoplalik, jaʼ xkaltik, nabil skʼoplal ti spas yuʼunik xchiʼuk ti xuʼ spat yoʼontonik ta stojolal li buchʼutik la xchʼakbeik sveʼel li yajtsʼaklom Cristo ti abol sbaik ta baʼyel sigloe. Ta skoj taje mu kʼusi la svul-o yoʼontonik li jtakboletike. Taje jaʼ koltaatik sventa jaʼ xakʼ ta yoʼontonik spasel li kʼusi mas tsots skʼoplale (Hech. 6:1-4). Jaʼ yuʼun, kʼalal cha-akʼbat junuk aparte ta tsobobbaile akʼo persa sventa lek xajelubtas. Chanbo stalelal Noé, yuʼun li stuke la xchʼun skotol kʼusi albat sventa spas li arkae (Gén. 6:22). Toj ep sbalil chil Jeova ti xuʼ spat yoʼontonik ta jtojolaltike xchiʼuk jaʼ svinajeb ti yijutik ta mantale (1 Cor. 4:2; kʼelo li rekuadro «Sbaliltak ti baʼyel chachapan abae»).
5. ¿Kʼu yuʼun skʼan oyuk ta yoʼontonik stael «lequil abtel» li keremetike?
5 Ta voʼne xa onoʼox albil ti chakʼ epajuk steklumal li Jeovae (Is. 60:22). Xkaltikuk noʼoxe, ta jujun jabile oy van 250 mil ti chichʼik voʼe. Ta skoj ti yantik x-epaj ti buchʼutik chojtikinik li kʼusi melele, skʼan oyuk viniketik ti lekik ta mantal yoʼ spasik li abtelaletik ta tsobobbaile. Li avie mas to ep kʼusi skʼan pasel li ta yabtel Jeova ti muʼyuk toʼox bu jech ilbile (1 Cor. 15:58). Keremetik, ¿mi oy ta avoʼonton chataik «lequil abtel»? Mi jeche, ¡jaʼ jun lekil abtelal li kʼusi oy ta avoʼonton staele!
[Tsʼib ti mukʼtik sletraile ta pajina 2]
Ta skoj ti yantik x-epaj ti buchʼutik chojtikinik li kʼusi melele, skʼan oyuk viniketik ti lekik ta mantal yoʼ spasik li abtelaletik ta tsobobbaile
[Rekuadro ta pajina 3]
Sbaliltak ti baʼyel chachapan abae
Li keremetik ti lekik ta mantale tstabeik sbalil kʼalal oy kʼusi ch-akʼbat spasike, taje jaʼ jech chchapan-o sbaik. Jun jkʼelvanej ta sirkuitoe te chotol tspatbe yoʼonton jun jcholmantal kʼalal laj xaʼox li tsobajele. Pe laj yakʼ venta ti te nopol vaʼal jun kereme, vaʼun la sjakʼbe mi jaʼ yakal chmalaat sventa xchiʼin ta loʼil. Li kereme laj yal ti jaʼ akʼbil ta sba spasel aspirar plataforma mi lokʼik xaʼox batel skotolik li ta jujun tsobajele. Akʼo mi tskʼan xa chbatik li stot smeʼe, li stuke mu skʼan xbat mi muʼyuk stsutses li yabtel akʼbile. Vaʼun ta sjunul yoʼonton lokʼ batel te li jkʼelvanej ta sirkuitoe. Xi to chale: «Li moletik ta tsobobbail taje chakʼbeik yabtel sventa chchapanik li keremetik ti lek stalelalik xchiʼuk lekik ta mantale. Ta skoj taje, kʼalal jaʼo te ta jvulaʼan li tsobobbaile mu onoʼox labaluk sba chkaʼi mi chalik moletik ti oy junuk kerem ti xuʼ xkʼot ta yajkoltaobba mole».