XCHANOBIL 17
¿Kʼu yelan stalelal li Jesuse?
Kʼalal ta jchantik batel kʼusi la spas xchiʼuk kʼusi laj yal kʼalal ay ta balumil li Jesuse, te chkiltik kʼu yelan stalelal Jesus xchiʼuk Jeova ti tsnopajesutik ta stojolalike. ¿Mi chakʼan chanaʼ junantik stalelalik ti toj kʼupil sbae? Xchiʼuk ¿kʼuxi xuʼ jchanbetik stalelal li Jesuse?
1. ¿Kʼusi xkoʼolajik-o li Jesus xchiʼuk Stote?
Li Jesuse ta smilal xa noʼox jabil laj yil kʼusi tspas li skʼanbil Tote xchiʼuk jech la xchan ek. Jaʼ yuʼun, jaʼ jech chaʼi sba kʼuchaʼal li Stote, koʼol kʼusi tsnopik xchiʼuk koʼol kʼusi tspasik (kʼelo Juan 5:19). Li Jesuse lek tajek la xchanbe stalelal li Stote, jaʼ yuʼun xi laj yale: «Yiloj xa Totil ek li buchʼu yilojune» (Juan 14:9). Mi laj avojtikin lek li Jesuse, chavojtikin lek li Jeova eke. Ti kʼuxubaj ta yoʼonton krixchanoetik li Jesuse, chakʼ ta ilel ti ep abalil chilot li Jeovae.
2. ¿Kʼuxi laj yakʼ ta ilel Jesus ti skʼanoj li Stote?
Xi laj yal li Jesuse: «Sventa snaʼ krixchanoetik ti jkʼanoj li Totile, jaʼ jech yakal ta jpas ti kʼu yelan yalojbun mantal li Totile» (Juan 14:31). Kʼalal ay ta balumil li Jesuse, laj yakʼ ta ilel ti skʼanoj li Stote, yuʼun la xchʼunbe-o smantal akʼo mi tsots kʼusitik la snuptan. Ta skoj ti skʼanoj tajek Stot li Jesuse, lek tajek chaʼi yalbel skʼoplal xchiʼuk la skolta yantik sventa xamigoinik li Diose (Juan 14:23).
3. ¿Kʼuxi laj yakʼ ta ilel Jesus ti skʼanoj li krixchanoetike?
Li Vivliae chal ti skʼanoj tajek xnichʼnab krixchanoetik li Jesuse (Proverbios 8:31). ¿Kʼuxi laj yakʼ ta ilel ti skʼanoj krixchanoetik li Jesuse? Jaʼo kʼalal la skolta xchiʼuk la spatbe yoʼontone. Ti jech la spase maʼuk ta skoj ti oy kʼusi smalaoj chichʼ akʼbele. Kʼalal oy kʼusitik labalik sba la spase, maʼuk noʼox laj yakʼ ta ilel ti oy sjuʼele, yuʼun laj yakʼ ta ilel ti oy xkʼuxul yoʼontone (Markos 1:40-42). Muʼyuk la stʼuj buchʼu chakʼbe ta ilel slekil yoʼonton. Jech xtok, la spatbe yoʼonton li buchʼutik chchikintaik kʼusi chale. Ta skoj ti skʼanoj krixchanoetik li Jesuse, laj yil svokol xchiʼuk cham ta stojolalik. Pe mas to skʼanoj li buchʼutik chchʼunik li kʼusi laj yakʼ ta chanele (kʼelo Juan 15:13, 14).
JCHANTIK TO BATEL MAS
Kojtikintik lek li stalelaltak Jesuse. Jech xtok, jkʼeltik kʼuxi xuʼ jchanbetik ti kʼu yelan chkʼanvane xchiʼuk ti kʼu yelan chakʼ ta ilel slekil yoʼontone.
4. Skʼanoj tajek Stot li Jesuse
Li Jesuse la xchanubtasutik kʼu yelan xuʼ xkakʼtik ta ilel ti jkʼanojtik li Diose. Kʼelik Lukas 6:12 xchiʼuk Juan 15:10 xchiʼuk 17:26. Kʼelik ta jujun li tekstoe, mi laje albeik skʼoplal li sjakʼobil liʼe:
Jech kʼuchaʼal la spas li Jesuse, ¿kʼuxi xuʼ xkakʼbetik yil Jeova ti jkʼanojtike?
Li Jesuse laj yakʼ ta ilel ti skʼanoj li Stot ta vinajele xchiʼuk nopolik noʼox tskʼopon.
5. Li Jesuse oy ta yoʼonton li buchʼutik chtun yuʼunik koltaele
Li Jesuse laj onoʼox svul yoʼonton ta stojolal stuk, pe mas to ta stojolal li yantike. Akʼo mi lubem tajek, la xchʼakbe yorail sventa skolta li yantike. Kʼelik Markos 6:30-44 xchiʼuk albeik skʼoplal li sjakʼobiltak liʼe:
Jech kʼuchaʼal chal li tekstoe, ¿kʼutik yelan laj yakʼ ta ilel Jesus ti oy ta yoʼonton li yantike? (Kʼelik li versikulo 31, 34, 41 xchiʼuk 42).
¿Kʼu yuʼun la skolta Jesus li krixchanoetik taje? (Kʼelik li versikulo 34).
Ta skoj ti chchanbe stalelal Stot li Jesuse, ¿kʼusi chakʼ achan ta stojolal li Jeovae?
Jech kʼuchaʼal la spas li Jesuse, ¿kʼuxi xuʼ xkakʼtik ta ilel ti oy ta koʼontontik li yantik eke?
6. Toj lek yoʼonton li Jesuse
Akʼo mi muʼyuk mas kʼusitik oy yuʼun li Jesuse, laj yakʼ ta ilel slekil yoʼonton. Taje tstij koʼontontik ti jechuk jpastik eke. Kʼelik Echos 20:35 xchiʼuk albeik skʼoplal li sjakʼobil liʼe:
Jech kʼuchaʼal laj yal li Jesuse, ¿kʼusi ti chakʼ jmuyubajeltike?
Kʼelik li VIDEOE xchiʼuk albeik skʼoplal li sjakʼobil liʼe:
¿Kʼusitik xuʼ xkakʼtik akʼo mi muʼyuk mas kʼusi x-ayan kuʼuntik?
¿Mi chakʼan to chachan mas?
Kʼalal oy kʼusi ta jkʼanbetik ta orasion li Jeovae, li Vivliae ta xalbutik ti skʼan jkʼantik ta sbi li Jesuse (kʼelik Juan 16:23, 24). Mi jech la jpastike, chkakʼtik ta ilel ti oy sbalil chkiltik li kʼusi la spas Jesus sventa xkamigointik li Jeovae.
JUNANTIKE XI CHALIKE: «Li Diose muʼyuk ta yoʼonton li krixchanoetik ti chil svokolike».
Ta skoj li kʼusitik la spas Jesus kʼalal ay ta balumile, ¿kʼuxi laj yakʼ ta ilel ti oyutik ta yoʼonton li Jeovae?
¿KʼUSI LA ACHAN?
Li Jesuse skʼanoj li Jeovae xchiʼuk li krixchanoetike. Ta skoj ti koʼol stalelalik xchiʼuk li Stote, xuʼ me mas chavojtikin Jeova mi laj avojtikin lek li Jesuse.
Svulesobil ta joltik
Jech kʼuchaʼal la spas li Jesuse, ¿kʼuxi xuʼ xkakʼtik ta ilel ti jkʼanojtik li Jeovae?
Jech kʼuchaʼal la spas li Jesuse, ¿kʼuxi xuʼ xkakʼtik ta ilel ti jkʼanojtik li krixchanoetike?
¿Kʼusi stalelal Jesus ti mas lek chavilbee?
XUʼ TO XAKʼEL LIʼE
Kʼelavil junantik stalelal Jesus ti xuʼ jchanbetike.
«Chanbo stalelal li Jesuse» (Li Jesuse: jaʼ li bee, jaʼ li melele, jaʼ li kuxlejale, pajina 317)
Kʼelavil kʼu yuʼun skʼan jpastik orasion ta sbi li Jesuse.
«¿Kʼu yuʼun ta sbi Jesus skʼan jpastik orasion?» (Li Jkʼel-osil ta toyole, avril-junio yuʼun 2008)
¿Mi chal Vivlia kʼu yelan xvinaj spat xokon li Jesuse?
«¿Kʼu toʼox yelan spat xokon li Jesuse?» (Xuʼ te xata ta jw.org)
¿Kʼusi chakʼ jchantik ta stojolal Jesus ti kʼu yelan la xkʼuxubin li antsetike?
«Li Diose ep sbalil chil xchiʼuk tstsak ta venta li antsetike» (Li Jkʼel-osil ta toyole, xchanobil)