Tojbo ta vokol Jeova xchiʼuk Jesus li kʼusi la spas ta atojolale

¿Kʼu yelan chavaʼi aba kʼalal chakʼbot amoton junuk avamigoe? Xamuyubaj van tajek xchiʼuk chakʼan chavakʼbe yil avamigo ti toj ep sbalil chavil li matanal laj yakʼbote. Li Jeova xchiʼuk Jesuse laj yakʼbutik jun matanal ti stuk xa noʼox jeche, jaʼ ti la spojutike. Jkʼeltik batel kʼuxi xuʼ jtojbetik ta vokol.

1. ¿Kʼuxi xuʼ jtojbetik ta vokol Dios xchiʼuk Jesus li kʼusi la spasik ta jtojolaltike?

Li Vivliae jamal chal ti xuʼ xkuxi sbatel osil li «buchʼu chakʼ xchʼunel yoʼonton» ta stojolal li Jesuse (Juan 3:16). ¿Kʼuxi chkakʼtik ta ilel ti oy xchʼunel koʼontontik ta stojolale? Jaʼo kʼalal oy kʼusi ta jnop ta jpastike xchiʼuk kʼalal oy kʼusi ta jpas ta jkuxlejaltike (Santiago 2:17). Mi chkakʼtik ta ilel ti oy xchʼunel koʼontontik ta sventa li kʼusitik ta jpastike xchiʼuk li kʼusitik chkaltike, mas to lek chkil jbatik xchiʼuk li Jesuse xchiʼuk li Jeovae (kʼelo Juan 14:21).

2. ¿Bu yan xuʼ jtojbetik ta vokol Jeova xchiʼuk Jesus li kʼusi la spasik ta jtojolaltike?

Kʼalal jun xa ox akʼobal skʼan xcham li Jesuse, laj yalbe yajchankʼoptak ti kʼuxi yan xuʼ stojik ta vokol ti laj yakʼ xkuxlejale. La slikes jun tsobajel ti stuk noʼox jeche, «Veʼlil ta bat kʼakʼal yuʼun Kajvaltik» sbi o Snaʼobil slajel Kristo (1 Korintios 11:20). Li tsobajel taje jaʼ sventa svules ta sjol jtakboletik ti laj yakʼ xkuxlejal li Jesuse xchiʼuk ti jechuk-o svules ta sjolik li melel yajtsʼaklomtak avi eke. Jaʼ yuʼun, xi laj yal komel mantale: «Jech xapasilanik-o sventa jnaʼobil» (Lukas 22:19). Mi chabat li ta Snaʼobil slajel Kristoe, jaʼ jech chavakʼ ta ilel ti chatojbe ta vokol Jeova xchiʼuk Jesus ti skʼanojutik tajeke.

JCHANTIK TO BATEL MAS

3. ¿Kʼuxi chvinaj ti ta jtojtik ta vokole?

Nopo noʼox avaʼi ti lapʼaj yalel ta ukʼume, pe ti mu xanaʼ xanuxinaje. Vaʼun, oy buchʼu ay xjochot lokʼel kʼalal chajikʼav xa oxe. ¿Mi chchʼay noʼox van ta ajol li kʼusi la spas ta atojolale o mi chakʼel kʼuxi xuʼ xatojbe ta vokol?

Jaʼ jech skʼan jtojbetik ta vokol Jeova ek li kʼusi la spas ta jtojolaltike. Kʼelik 1 Juan 4:8-10 xchiʼuk albeik skʼoplal li sjakʼobiltak liʼe:

• ¿Kʼu yuʼun jaʼ jun matanal ti stuk xa noʼox jech ti laj yakʼ xkuxlejal li Jesuse?

• ¿Kʼu yelan chavaʼi aba ta skoj li kʼusi la spas ta atojolal li Jeova xchiʼuk Xnichʼone?

¿Kʼuxi xuʼ chkakʼbetik yil Jeova xchiʼuk Jesus ti ep sbalil chkiltik li kʼusi la spasik ta jtojolaltike? Kʼelik 2 Korintios 5:15 xchiʼuk 1 Juan 4:11 xchiʼuk 5:3. Kʼelik ta jujun li tekstoe, mi laje albeik skʼoplal li sjakʼobil liʼe:

• ¿Kʼuxi chkakʼtik ta ilel ti ta jtojtik ta vokole?

4. Jchanbetik li kʼusi la spas Jesuse

Yan kʼuxi xuʼ xkakʼtik ta ilel ti ta jtojtik ta vokole jaʼ ti jchanbetik li kʼusi la spas Jesuse. Kʼelik 1 Pedro 2:21 xchiʼuk albeik skʼoplal li sjakʼobil liʼe:

• ¿Kʼuxi xuʼ xatsʼakli o xatʼun batel lek li yav yok Jesuse?

5. Batan li ta Snaʼobil slajel Kristoe

Sventa xanaʼ kʼu yelan laj yichʼ pasel ta sba velta li Snaʼobil slajel Kristoe, kʼelik Lukas 22:14, 19, 20. Mi laje, albeik skʼoplal li sjakʼobiltak liʼe:

• ¿Kʼu yelan la spasik li Snaʼobil slajel Kristoe?

• ¿Kʼusi senyail li pan xchiʼuk vinoe? (Kʼelik li versikulo 19 xchiʼuk 20).

Li Jesuse tskʼan ti akʼo spasik yajchankʼoptak jujun jabil li snaʼobil slajele. Jaʼ yuʼun, li stestigounkutik Jeovae ta jpaskutik jujun jabil li Snaʼobil slajel Kristoe, jaʼ jech ta jpaskutik kʼuchaʼal la slikes komele. Sventa xanaʼ kʼu yelan chichʼ pasel li tsobajel ti tsots skʼoplal taje, kʼelik li VIDEOE. Mi laje, albeik skʼoplal li sjakʼobil liʼe:

VIDEO: Jvules ta joltik li slajel Jesuse (1:42)

• ¿Kʼu yelan chichʼ pasel li Snaʼobil slajel Kristoe?

Li pane jaʼ noʼox senyail li sbekʼtal Jesus ti muʼyuk xchopolil ti laj yakʼ ta jtojolaltike. Jech xtok, li vinoe jaʼ noʼox senyail li xchʼichʼele.

¿KʼUSI LA ACHAN?

Kʼalal chkakʼ xchʼunel koʼontontik ta stojolal li Jesuse xchiʼuk kʼalal chijbat li ta snaʼobil slajele, jaʼ jech chkakʼtik ta ilel ti ta jtojbetik ta vokol li kʼusi la spas ta jtojolaltike.

Svulesobil ta joltik

• ¿Kʼuxi chvinaj ti oy xchʼunel koʼontontik ta stojolal Jesuse?

• ¿Kʼuxi chatojbe ta vokol Jeova xchiʼuk Jesus li kʼusi la spasik ta atojolale?

• ¿Kʼu yuʼun toj tsots skʼoplal ti xijbat ta Snaʼobil slajel Kristoe?

XUʼ TO XAKʼEL LIʼE

Kʼelavil kʼusi tstij koʼontontik spasel ta skoj ti cham Kristo ta jtojolaltike.

Li Jesuse laj yichʼ ta mukʼ Jeova xchiʼuk li stukʼil kuxlejale (9:28)

Chanbo mas smelolal ta sventa li xchʼunel oʼontonale xchiʼuk ti kʼuxi xuʼ xavakʼ ta ilele.

«Kakʼ ta ilel ti jchʼunojtik lek ti chkʼot ta pasel yuʼun Jeova li kʼusi yaloje» (Li Jkʼel-osil ta toyole, oktuvre ta 2016)

Jelbat˗o xkuxlejal jun ants kʼalal laj yaʼibe smelolal ti cham Jesus ta stojolale. Kʼelbo avil sloʼil xkuxlejal, «Sakun, kuxulun xchiʼuk jun koʼonton chkaʼi jba».

«Jelbat-o xkuxlejalik yuʼun li Vivliae» (Li Jkʼel-osil ta toyole, oktuvre-disiembre ta 2011)

Kʼelavil kʼu yuʼun jutuk noʼox buchʼutik tsveʼik pan xchiʼuk chuchʼik vino li ta Snaʼobil slajel Kristoe.

«¿Kʼu yuʼun li stestigotak Jeova jelel ti kʼu yelan tspasik li Veʼlil ta bat kʼakʼal yuʼun Kajvaltik kʼuchaʼal li yan relijionetike?» (Xuʼ te xata ta jw.org)