¿Mi xuʼ spatbun koʼonton li Vivliae?
Li kʼusi chal Vivliae
Xuʼ. (Romanos 15:4). Epal krixchanoetike tsots yakal chil svokolik xchiʼuk tsvul yoʼontonik, pe te staoj spatobil yoʼontonik ta Vivlia.
Li ta mantal liʼe, ta jkʼeltik junantik tekstoetik ta Vivlia ti xuʼ skoltaot kʼalal mi la vil avokol jech kʼuchaʼal liʼe:
Tsatsal vokolil
Salmos 23:4: «Akʼo mi te chixanav li ta stenlejaltik ti ikʼ tajeke, muʼyuk kʼusi ta jxiʼta, yuʼun te achiʼinojun».
Li kʼusi skʼan xale: Mi chakʼopon Dios xchiʼuk chasaʼ koltael li ta Skʼop ti jaʼ li Vivliae, chakʼbot avipal sventa xkuch avuʼun li avokoltake.
Filipenses 4:13: «Oy jtsatsal sventa jpas skotol ta skoj li buchʼu chakʼbun juʼele».
Li kʼusi skʼan xale: Li Diose xuʼ xakʼ avip sventa stsal avuʼun kʼusiuk vokolil xanuptan.
Kʼalal oy buchʼu chcham kuʼuntike
Eklesiastes 9:10: «Chʼabal xa cha˗abtej, chʼabal kʼusi chanop chapas, chʼabal xa kʼusi chavojtikin xchiʼuk chʼabal xa kʼusi chavaʼibe smelolal li ta [Mukinale]».
Li kʼusi skʼan xale: Li buchʼutik chamemike mu xa kʼusi snaʼik, jaʼ yuʼun muʼyuk chil svokolik xchiʼuk muʼyuk kʼusi xuʼ spasbutik.
Echos 24:15: «Chchaʼkuxiik».
Li kʼusi tskʼan xale: Li Diose xuʼ xchaʼkuxesan li buchʼutik chamem kuʼuntike.
Kʼalal oy tajek jmul chkaʼi jbatike
Salmo 86:5: «Kajval Jeovaa, yuʼun toj lek avoʼonton xchiʼuk chapalot sventa xachʼay mulil, toj ep tukʼil kʼanelal avuʼun ta stojolal li buchʼutik xvokoletik ta atojolale».
Li kʼusi skʼan xale: Li Diose chakʼ ta perton li buchʼu tsutes yoʼonton ta melele xchiʼuk ti muʼyuk xa chchaʼpas li kʼusitik chopole.
Salmo 103:12: «Jech kʼuchaʼal toj nom xil sbaik li slokʼeb kʼakʼal xchiʼuk smaleb kʼakʼale, jaʼ jech nom tajek yakʼoj batel ta jtojolaltik li jmultike».
Li kʼusi skʼan xale: Kʼalal chakʼutik ta perton li Diose, muʼyuk tsvules ta joltik sventa stikʼ ta jsatik xchiʼuk ti xakʼbutik˗o kastigoe, yuʼun nom tajek chakʼ batel ta jtojolaltik.
Vul oʼonton
Salmo 31:7: «Aviloj xa li jvokole; avakʼoj xa venta li kʼusitik kʼux tajek chkaʼie».
Li kʼusi skʼan xale: Li Diose snaʼoj lek li kʼusi yakal chavil˗o avokole, xaʼibe lek smelolal ti kʼu yelan chavaʼi abae akʼo me mu xaʼibeik smelolal li yantike.
Salmo 34:18: «Nopol oy Jeova ta stojolal li buchʼutik muʼyuk xa te tsakal chaʼi li yoʼontonike; tskolta li buchʼutik chat yoʼontonike».
Li kʼusi skʼan xale: Li Diose yaloj ta jamal ti te xchiʼukot kʼalal chavul avoʼontone xchiʼuk chakʼ avipal sventa xkuch avuʼun li avokole.
Chamel
Salmo 41:3: «Ch˗ikat yuʼun Jeova kʼalal telel ta stem ta skoj chamele».
Li kʼusi skʼan xale: Li Diose xuʼ xakʼbot jun oʼontonal, avipal xchiʼuk apʼijil sventa xanaʼ kʼusi chapas kʼalal tstsakot jtosuk tsatsal chamele.
Isaias 33:24: «Mi junuk jnaklej ta balumil xi chale: ‹Toj ipun›».
Li kʼusi skʼan xale: Li Diose yaloj ti slajesbe skʼoplal li chamel ta balumile, jaʼ yuʼun muʼyuk xa buchʼu ch˗ipaj.
Kʼalal mu xa jnaʼ kʼusi ta jpastike
Salmos 94:19: «Kʼalal mu xa jnaʼ kʼusi ta jpas yuʼun li vokolile, voʼot la apatbun koʼonton xchiʼuk la apasbun ta jun koʼonton».
Li kʼusi skʼan xale: Mi ta jkʼanbetik koltael Dios kʼalal mu xa jnaʼ kʼusi ta jpastike, tskoltautik sventa junuk noʼox koʼontontik.
1 Pedro 5:7: «Akʼbeik me sbain skotol li kʼusi chavul˗o avoʼontonike, yuʼun oyoxuk ta yoʼonton».
Li kʼusi skʼan xale: Li Diose stsakoj ta venta li kʼusi chkʼot ta jtojolaltike, jaʼ yuʼun tskʼan ti akʼo xkalbetik li kʼusi ta jvul˗o koʼontontike.
Paskʼop
Salmo 46:9: «Tslajesbe skʼoplal li paskʼopetik ta spʼejel balumile».
Li kʼusi skʼan xale: Li Ajvalilal yuʼun Diose jutuk xa skʼan slajesbe skʼoplal skotol li paskʼopetike.
Salmo 37:11, 29: «Yan li manxoetike jaʼ chuʼuninik li balumile xchiʼuk tskʼupinik tajek li jun oʼontonal ti muʼyuk spajebe». «Chuʼuninik balumil li buchʼutik tukʼike xchiʼuk te chkuxiik˗o sbatel osil».
Li kʼusi skʼan xale: Li krixchanoetik ti tukʼ chakʼ sbaike chkuxiik sbatel osil ta balumil.
Kʼalal ta jvul˗o koʼontontik li kʼusi chtal ta jelavele
Jeremias 29:11: «Xi chal li Jeovae: ‹Yuʼun jnaʼoj lek li kʼusi ta jpas ta atojolalike, chkakʼboxuk jun oʼontonal, sventa oyuk kʼusi lek xataik ta jelavel xchiʼuk sventa oyuk spatobil avoʼontonik›».
Li kʼusi skʼan xale: Li Diose yaloj ti oy kʼusi lek chakʼbe ta jelavel li yajtuneltake.
Apokalipsis 21:4: «Tskusbat skotol yaʼlel satik yuʼun li Diose, muʼyuk xa lajelal, muʼyuk xa at˗oʼonton, muʼyuk xa okʼel ta skoj vokolil xchiʼuk mi jaʼuk xa kʼusi kʼux chkaʼitik. Jelav xa skʼoplal skotol li kʼusitik oy toʼoxe».
Li kʼusi skʼan xale: Li Diose yaloj ta jamal ti slajesbe skʼoplal skotol li choplejal oy ta balumile.
a Jaʼ Jeova sbi li Diose (Salmo 83:18). Kʼelo li mantal ti xi sbie: «¿Buchʼu jaʼ li Jeovae?».