Skarta li Jtsop Jbeiltasvaneje

Kuni ermanotak, voʼoxuk ti chavalbeik skʼoplal li Ajvalilale:

Jnoptik ti jaʼutik junuk yajtakbol Jesus ti te oyutik ta vits Olivatike. Jaʼtik to laj yakʼ sba ta ilel Jesus ta jtojolaltik xchiʼuk xi laj yal komel kʼalal jutuk xa ox skʼan xmuy batel ta vinajele: «Chavichʼ atsatsalik kʼalal mi vul ta atojolalik li chʼul espiritue, vaʼun chavalik batel jkʼoplal ta Jerusalen, ta sjunul Judea, ta Samaria xchiʼuk kʼalal to ta namal balumil» (Ech. 1:8). ¿Kʼu van yelan chkaʼi jbatik?

Xuʼ van chijxiʼo li abtelal taje xchiʼuk xi van ta jnoptike: «¿Kʼuxi xa noʼox ch-al batel kuʼuntik kʼalal to ta namal balumil ti muʼyuk eputike?». Xuʼ van chtal ta joltik ti xi laj yal komel Jesus kʼalal jun xa ox akʼobal skʼan xchame: «Maʼuk mas mukʼ skʼoplal ta stojolal yajval li mosoile. Mi la skontrainikun li voʼone, jaʼ noʼox jech tskontrainoxuk ek li voʼoxuke; mi la xchʼunik li jkʼop laj kalbeike, jaʼ jech ta xchʼunik ek li akʼop chavalbeike. Pe skotol li kʼusitik vaʼ yelan tspasboxuke jaʼ ta skoj jbi, yuʼun mu xojtikinik li buchʼu la stakun tale» (Juan 15:20, 21). Ta skoj ti jech yelan laj yal Jesuse, xuʼ van xi xkaltike: «¿Kʼuxi xa noʼox ta jcholtik mantal ti ep chkichʼtik kontrainele?».

Jaʼ xa jnopbetik skʼoplal li abtelal ta jpastik avie. Li abtelal jtaojtik li stestigoutik Jeovae jaʼ ti jcholtik mantal kʼalal to ta namal balumile xchiʼuk ti jtatik ta kʼoponel li krixchanoetik ta skotol jteklumetike (Mat. 28:19, 20). Pe ¿kuxi xa noʼox tspas kuʼuntik mi chkichʼtik tsatsal kontrainel jech kʼuchaʼal chal Vivliae?

Li slivroal Echose chalbutik kʼuxi koltaatik yuʼun Jeova li jtakboletik xchiʼuk li ermanoetik ta baʼyel siglo sventa spas yuʼun li yabtelike. Li livro liʼe laj yichʼ pasel sventa jvules ta joltik li kʼusi kʼotanuk ta pasele. Ta jkʼeltik batel ti ep kʼusitik xkoʼolaj-o li kʼusitik la spas yajtsʼaklomtak Kristo ta baʼyel siglo xchiʼuk li kʼusitik yakal ta jpastik avie. Maʼuk noʼox chalbe skʼoplal li cholmantal ta jpastike, yuʼun chalbe skʼoplal xtok ti kʼu yelan ch-abtej li j-organisasiontike. Kʼalal ta jkʼelbetik batel skʼoplale, mas to jpʼel ta koʼontontik ti tskoltautik Jeova sventa jpastik li kabteltik jech kʼuchaʼal la skolta li s-organisasion ta voʼnee.

Ta jpaskutik orasion sventa masuk to xapat avoʼontonik ta stojolal Jeova kʼalal chachanik batel li slivroal Echose xchiʼuk ti tskoltaoxuk li xchʼul espiritue. Jnaʼojkutik lek ti jaʼ tstij avoʼontonik sventa jechuk-o xapukbeik batel skʼoplal li Ajvalilal yuʼun Diose xchiʼuk ti xavalbeik yantik sventa stamik batel ek li sbelel kolebale (Ech. 28:23; 1 Tim. 4:16).